Brother’s & Sister’s Day

Brother’s & Sister’s Day

Nute’ Ni hong kibawl simin, Nu neiten anute uh pahtawi lingling uh a, kei kahih leh kiukhat pan kanu phawk in, khitui naptui tawh kaki dik simsim hi. Pate’ Ni hongtun simin zong, Pa neiten apate uh pahtawi lingling uh a, kei kahih leh kiukhat pan kapa phawk in, khitui naptui tawh kaki dik simsim hi.

Pawlkhat ten Nu le Pa neilo ci in hong engbawl sawnsawn uh a, ka lungtang sungah na kasak dan pen thautang tawh hong kaplum hizaw leh ka cici hi. Tukum Nute’ Ni kibawl khit ciangin, Kalaymyo ah aom ka-u leh Yangon a om kanau kahopih pah hi. Amau zong kei thuak dan mah in nathuak tek uhhi.

Kei adingin, ka it mahmah kanu le kapa mel in muh theih nawnlo uh ahih manin, ka nisim nuntakna ah nu le pa banga kangaihsut ding kasanggamte bek mah ahihi. Leitung ah mipil tampi ten aneih ngei nailoh uh leh angaihsut bat loh uh Brother’s & Sister’s Day ci in, ka sanggamte pahtawina leh itna kapia hi.

Tua mah bangin kei sanga genthei zaw, nu le pa, sanggam cih anei vetlo, nu le pa mel a mukha ngeilo mi pawlkhat om lai uhhi. Tuate kangaih sut pih ciangin, amau zong a ut pen uh hihetlo, Singhawm Suanghawm a piang hituanlo ci in, amau ading zong ngaihsut pihna leh lung ngaihna kanei zel hi.

Zomite sungah Nu le Pa aneilai ten Nu le Pa itsiam zahtak siam ding mangngilh lo in, nisim in Nu le Pa te Ni hisak ni. Nu neilo Pa neilo tenzong I sanggamte itsiam in khual tinten ni. Nanu le Napa ten no
unau ki it lingling a na vaihawm khop, nasep khop uh hong munuam mahmah uhhi.

Dal Sian Hung kiplet Thu 3 teng:

– Nang hamphatna hangin, mi asukhalo nasep “Mission” sem inla, mi suplawh nadingin hamphatna ngahsawm keizaw in!”

– Mite’ khasiat nadingin, na hauhna zangkhia kenla, mite’ phattuam nadingin naneihsa, napilna leh nasiamna zek khia siam zaw in.

– Mite’ huh ding lametna tawh nalianpi nasep sangin, nang le nangin nek tawm kicing neihzawh sawm lecin mi thupi na hizaw hi.

Dal Sian Hung