British nupi khatin atanu kum 9 aphakdong anawipia

British nupi khatin atanu kum 9 aphakdong anawipia

England gamsung aom British nupi khatin atanu pen kum 9 aphakdong anawipia ciliang hi. Naungek te sawtvei pipi nawipiak Breastfeeding pen hoihmahmah a, kum 9 aphakdong nawi apiakna hangin khatlekhat ki itna khangsak semsem cihi.

Tua nupi nupen amin Sharon Spink kici a, amahpen kum 50 aphakhinta ahihi. England, North Yorkshire, Elmet aom Sherburn vengsung ah ateeng hi a, ta 4 nei hi. Atanu aneupen Charlotte kici a, tua aneupennu kum 9 aphakdong anawi kapia hi ci’n genkhia hi.

Atanu in “Nu nawiduh” “Mummy milk” ci’n anget nawnlohdong nawi apiakzelzel hi a, tuapen kum 9 aphakdong apiatoto cimawk hi. Tua nupinu in Daily Mail te tungah agenkhiatna ah Breastfeeding nawipiak pen ki itna kizopna kipsak semsem a, tuaban ah amahzong nawi apiangsak theiding Nutrients nektheih tuamtuam hangin cidam in anawitui zong hoihhi ci’n genkhia hi.

Leitung cidamna lamsang avaihawm te ahi World Health Organisation te’nzong naungek tepen atawm penpen kha 6 dong anu nawizu piak hamtangding hanthawnden uhhi.

Kha 6 aphak khitciangin anu nawitui pen damdam in khiaptheih hi a, adang naungek te nektheih tuamtuam tawh helhkawmkawm in piaktohtohding hi. Tuabangin atawmpen kum 2 sungbang piaktoh suaksuakding hoihhi ci’n WHO te’nzong genkhia uhhi.

More: Malaysia, Johor Baru ah naungek bawngnawivui atuh honkhat kiman

Tua nupinu in atanu nawipiak pen bangmah nawngkaina om asakloh hangin midang pawlkhat te’n gensia uh a, naubang bawlsiatna “Child abuse” namkhat hi ci’n amawhsakzong omleuleu hi. Sawltak #zomidaily