Anungta Pasian leh apiansak minamte ii angtan huai gamtat, luheek
Tua ahihman in Pasian in amaute’ Pasian kahihi acihding maizumlohi. (Heb. 11 : 16)
Kawlgam mi, laigelhsiam, Theologian leh Pawlpi Makai Tanlyan Phe Twin in, “Numei ginalo phengtat khat na tate’ Nu ding in na deih hiam” ci-in khangnote thudotna lianpi khat nei ngeihi.
Kawlgam kitelpi November 06, 2015 (Sunday) ni in nei ding hang aa, leitung bup in lunglut mahmah uhhi. Banghang hiam cihleh:
Kawlgam bup mailam koi lam ong kihei ding, kidodo lai ding maw, minam tawm leh minam tamte sung kisimmawhna, kinetniamna, kithupi sanlohna, zawhthawhna, kideidanna cihte aa kipan a etlawm hetlo bek hilo Pasian zia hetlo gamtatnate zomzom laiding cih leh
Belpawl khawm gam hihna tawh kizui in minam khat leh khat, biakna pawl khat leh pawl khat, minam tam leh minamtawm, mihing kideidanna om hetlo in ki-it kilemna, ki hehpihna, kilainatna, thuman, thutak tawh lungnuamtak in tengkhawm ding cih khensat hun ahihman ahihi.
Zomi ulehnau aw,
I mailam nuntakzia ding ei ong kikhensat sak hun ong tungtahi. Galkapte leh anungzuite tawh akizom USDP leh NUP in a omsa Kawlgam ki ukna laihsawmlo khin uhhi. Minam tam Kawlte leh amau biakna bek a gumh ding thukhun ahihi. Anungta Pasian in Ama’ mite’ Makai ding tel khuan ngahlo in, khatpeuh ong guat makai in a makaih ding i phal hiam? Tualo theithei dingin kawlzangteng a kalsuan laitak minam tawm Zomite’n i hanciam sawm kei leh ong zumhuai huai mahmah dinghi.
Hizah aa Thukhun hoihlo na tate’ Nu dingin na deihhiam?
Vantung ah Topa deihna akisep mahbang in leitung ah a semdingte ihihi. Leitung ah minam kideidanna, kisim mawhna, kidona, kithahna, khelbawlna cihte aa kipan gitlohna bulphuh party ah Makai lianpi in na om kha phial zongin, hih Thukhun dungzui aa asem, abawl, tha apia nahih nungsang, “Ih Pasian nangawn Pasian icih khaak ding na maizum dinghi.”
Mimal angsung huaiham, thuneih nading aa gamhtat, ngongtat, thukhualna omhetlote’ Pasian akicih ding, gam mite simmawhte Pasian ahihding a maizum khol in ka umhi.
Hausa, upate aw,
Tulaitak aa hausa, upa na sepna in tutak aa ong uk partyte ong piak hihetlohi. Tutung kitelna ah party dang ong kah zongin no lo tawh I gam kilam thei tuanlohi. I gam ah hausa upa ki tasam theilo, kitat theilohi. Hausa hoih, upa hoih kideih den hilelhi.
Kumpi nasemte aw,
Tu aa kumpi (party) ong kah mapek in hih nasep nangah khitsa uh hi aa, kuakua ong kah zongin na nasepna uh khahsuah hetlo ding no lotawh kumpi khat (run) kilam theilohi. No teng na khawl ni uh Kawlgam ki ukna a khawlni ahihi. Ei pilna, siamna tawh kituak nitha, khasum, “tuni aa ikhamkhop ding an” angah zo nai hetlo ihihi. Golhguk neek, guktaak a nuam hihetlo aa nek akullo kumpi a omlua ahihi.
Kilaihna omlo in I nuntak nuamzaw lo ding aa, ki ukna gina, kumpi gina lotawh i ngei aa ngei laiding cihna ahihlam ong ngaihsun un.
USDP leh NUP makaite aw,
Mimal kihuatna, kimuhdahna in na la kei un. Na party policy uh mipi ki ukna, adiakdiak minam tawmte mailam ding Thukhun gina hilo ahihman ahihi. Ih Topa Pasian, ‘ka Pasian hi’ icih ding amaizumloh ding thu ong ngaihsun un. Tua in tawntung vai ahihi. *Asian in hihbang Thukhun kemcing dingin ong piangsak hetlohi.
Mipi ulehnau, taangpi taangtate aw,
Party khat Thukhun leh tup leh ngim in, i Thungetna, i Topa deihna, i Laisiangtho tawh kituak ahihding thupihi. Minam buaina, minam kisimmawhna, kinuainetna, kikhelbawlna, minam manthansaknopna Thukhun ahihloh ding, tua Thukhun nuai aa Makai ihihloh ding, tua thukhun apanpih, tha apia mipi i hihkhaakloh ding lungngaikik dihni.
Zomi aw,
Na tate’ Nu ding bangcinam numei na deih hiam?
Na tate’ mailam gelding bang cinam ki ukna a lunggulh party na deihhiam?
Mimal in etsawm lehang kei sang aa tu aa ong uk kumpi thapia zawding Zomi sung ah om in ka um keihi. Leitung bei dong i minam mailam ding i ngaihsutna hangbek ahihi.
Na piakding pa/nu nadeih mahmah keilehzong mitsi liang, awkliang in napia photphot dihin.
Tuahileh, i Pasian in amaute’ Pasian kahihi a ki cihding maizum lodinghi.
Khang tangthu hoih zuihna leh khang tangthuhoihlo khelngamna in Topa angtang sakhi.
Hang Khan Lian
Nov 03, 2015, Singapore
Comment piaknop aomleh...