Bang lungkham haksatna nei na hihiam? ~ David Tuang

Bang lungkham haksatna nei na hihiam? ~ David Tuang

Mi kimin lungkham haksatna khat ciat kinei hi. Bang bang lungkham haksatna ahi phial zongin, hihte sung panin hong huh/panpih thei ding Pasian i neih lam tak i phawk gige ding kisam masa hi. Pasian in, hih i lungkham i haksatnate sung panin hong honkhia zo takpi ding hi, cih upna leh muan’na i nei ngam hiam?

Tua bang upna leh muan’na nei ngam i hih leh ama kiangah thungen loin i om ding hiam? Ama adingin i hih theihna bang bang tawh mapang loin i om ding hiam? Topa’ adingin i sepna zahzah tungah gualzawhna thaman a ngah dingte ihi hi. Lungkham haksat hunin Pasian leh ama kammal ana cicite mah a tawpna-ah hong gualzo in hong lawhcing ding uh hi.

Thu-um mite’ tungah hong kilang ding Pasian’ vangliatna pen, upna, muan’na leh ngak siamna cihte kisam masa den hi. Tua ahih manin, hi bang lungkham haksatnate i thuak hun ciangin, i nuntak na sungah thunei pen dingin, Pasian leh ama kammal mah i koih masa ding hi. Tua bang hi peuh leh ahun tun’ ciangin Topa hoihna leh ama vangliatna i mu ding hi.

Pasian in, “Ka tanu/tapa aw bang lungkham haksatna nei na hi hiam, “ci-in hong dongdong hi. Na lungkham haksatnate ama tungah ko lo, gen loin om kha kei in. Bang hang him cih leh eite’ biak Pasian in, itna leh hehpihna tawh kidim ahih manin, amah asam mite’ a dawngkik dingin a baihsa in om den hi. Topa hoih hi, a tawntung in. Haleluijah!

I phawk gige ding khat ah; “Upna leh muan’na takpi tawh ama zia a ngak siam mite’ adingin Pasian ziakai ngei lo hi,” cih thu ahi hi.

Lai sim mimal kim tungah, Topa’n thupha hong pia ta hen. Amen. Khazih sungah, David Tuang