Australia ah Kanza (Marijuana) ciintheih nading phalna Licence kipiata

Australia ah Kanza (Marijuana) ciintheih nading phalna Licence kipiata

Australia gamsungah Marijuana kici Kanza ciintheih nadingin phalna Licence kipia khiata cih AFP News pan kiza hi. Hih Kanza “Marijuana” pen zatui in zatding “Meical Marijuana” hi a, guihtheih khamtheih bangin khangno te’n utbangin tepgawp theihnading phalna akipia cihbang hilo hi. (Note: Marijuana pen Cannabis zong kici hi)

Marijuana pen khangno pawlkhat in zatep bangin tepgawp uh a, guihtheih khamtheih namkhat ahih zenzen hangin, zatuisiam siavuan te’n natna lianpi damsak nading inzong zangthei uhhi. Tua ahih manin Australia kumpi inzong agamsungah “Medical Marijuana Farm” ci’n hoihtak in ciintheih nadingin phalna Licence apiakhia ahihi.

Phalna Licence angah Company pen khatbek hipan a, tuate pen “Cann Group Limited” kici te ahi uhhi. Nungkha sungin hih Company te’n “Marijuana Research Licence” a ngahkhin uh hi a, tu’n Research bawlbek hilo in, ciintheihna Cultivation Permit zong a ngahta uh ahihi.

Australia Health Minister Greg Hunt in agenna ah Marijuana pen gamsung ah kiciingthei tading ahih manin, Australian gammi cina “Patients” te adingin zatui bawlkhiatna baihsaktuam mahmahding hi ci’n genkhia hi.

Tuaban ah hih Kanza pen khuasung mipi te khutsung ah amawk tungloh nadingin akiciinna huante hoihtak in Security Guard kikoihcipden dinghi cihzong genkhia hi.

Kanza pen vankham, guihtheih khamtheih khatin akiciamteh ahih manin, Australia gamsungah ciintheih nadingpen hamsasak mahmah uhhi. Hih Lincence apiak uh Company tezongpen hoihtakin sitcianna Security Assessment abawlbawl khit uhciang in apiapan uh ahihi.

Mailam ah adang Company tezong Licence kipiakbeh khathei laiding cih kiza hi.

Kanza zatpen Australia kumpi in phallo, illegal in aciapteh hi a, ahi zongin abeisa kha 12 hunlai akipan Federal Laws in cina te bawlnading zatui “Medical Purposes” ahih nakleh kanza pen zattheihding phalna piata uhhi.

Abeisa hunsung ah Australia gamsungah zatding Kanza pen gamtuamtuam panin International Suppliers te tungtawnin Government in a lutsak, Imports abawlsak ahihi. Ahi zongin Wednesday ni, Licence apiakkhiatni akipan gamsung panin bawlkhiat kipan tading uhhi.

More: Theihhuai kiallap Upadi ~ Pa Lian Khen Nang

2015 kumin aki suakkhiasak “Journal of the American Medical Association” te Research muhkhiatna ah kanza Marijuana pen “Chronic Pain” akici adamtheilo kumlui natna te bawlnading hoihmahmah ci uhhi. “Chronic Pain” pen Kawlpau in နာတာရွည္ ေရာဂါ acihte hidinghi. Ahi zongin Kanza pen zatkhialhding zong lauhuai mahmahzel hi. ZD Sawltak #zomidaily