US papi khatin atanu kawnggak tawh zepgawp in asamzong mettolsak
USA, Louisiana State sung aom papi khatin kawnggak tawh atanu azekgawpna Video pen Social Media ah kikhahkhia hi. Atanu in SnapChat kici Multimedia Messaging App khat download ahih manin, mawhnadaan piakna in atanu pen kawnggak tawh azepgawp hi a, tuabek thamlo alu mettolsaklai cimawk hi.
Tua papipa ii amin pen Alex J. Harrison kici a, kum 33 aphakhin khat ahihi. Tua papipa in hihbang in angong gamtatna pen kisial sawnsawn a, Facebook leh Snapchat tungah atanu agawtbawl laitak Video pen amahngiat in khahkhia sawnsawn hi.
Tua Video pen Social Media ah aki thehzakzawh asawtlo in tuapapipa pen naupang bawlsiatna “Child Cruelty” tawh Police te’n mankhiapah uhhi.
Video sungah atanu agawtbawlding akipatma in atanu ataw asatding leh asam amettol sakdingpen genkhia masa in, sangnaupang pen sanglai sepding hi, Snapchat kisamlo hi. Snapchat tawh amah akisaina omlo hi. Na en tapeuh un” ci’n genkhia masa in, tuakhit ciangin asatgawp laitak Video kizaihsak cihi.
Tua atanu pen Tan 9th Grader ci a, kum 14, 15 pawlding in ki ummawh hi. Hihvai tawh kisai in atanu pen a innmah ah omlai hiam, ahih keileh kumpi thunei te’n kem uhhiam ci’n Ferriday Police Department te tungah Friday ni in kidong a, ahi zogin Police te’n bangmah genkhia nuamlo uhhi. Ahi zongin athupen hoihtak in aki kanciansan laitak hi ci’n genkhia uh cihi.
Tua Video pen ageipan in mikhat in azaihsak hiding kici a, atanu ii atawbo pen kawnggak tawh satcihtak in satsakgawp hi. Atanu in na salua mahmah in kapkap in awngawng himahleh thudonlo in satsuak veve hi. Akizom in asatgawp pen 50 vei mahmah hiding kici hi.
Tuabang in asat kawmkawm in atanu pen zahko kawmkawm in, na nildanna “Tampon” nangawn hoihtak khektheilo ci’n atanu ii Personal Hygiene pen zahkosak kawmkawm cihi.
Tuabang in atanu kawnggak tawh azepgawpkhit ciangin adang inndei khatah paipih a, alu mettolsak leuleu hi. Hihbangin atanu asatgawpna hangin hihpa pen nung Monday ni in Police te’n mankhiakhin uh a, thusitna akibawlsan laitak cih kiza hi.
More: Apa in atanu kum 2 sungbang zawhthawh thutawh buanzel cih aki theihphet in kiman
Ferriday Police Department te’n ahihleh hihbang naupang bawlsiatna “Child Abuse” cihpen Video sungah kiciantak in kimuthei hi ci’n genkhia uhhi. US gam penpen ah naupang hibang in asatgawppa pen kumpi thunei te’n mawkkoih hetlo khading hi. Sawltak #zomidaily
Comment piaknop aomleh...