Antangpham hong kipatna ~ Rev. Gin Khan Nang

Antangpham hong kipatna ~ Rev. Gin Khan Nang

Ni khat Khasi leh Jaintia gam Presbyterian te laibu “Book on Revival” kici Khasi gama khanlawhna thu ka sim leh hih a tunga “Antangpham” a kipat dan ka sim kha hi. 1904 kumin Welsh gamah khanlawhna tungin tua panin 1906 kumin Khasi gamah khanlawhna na tung hi.

Gammial nasepna thupi ngaihsut mahmah uh a, Kum 1907 kumin Khasi gam Mawrong khua-ah Sawltak Babu Joel Gatphoh kici khat in gammial nasepna dingin inn kim in anhuan sialin khut pham khat ta antang pia ding ci-in na hanthawn hi. Mawrong khua panin a kima khuate Mawtari, Korhadem cihte ah na zang uh a, tua panin Khasi gambupah kizang hi.

A phuankhiapa Joel Gatphoh pen “Antangpham mukhiapa” (Father of Handful of Rice Collection) cih min kingahsak liang hi (Book on Revival 2006:6). Tua panin Mizogam, Manipur gam, Zogam nangawnah Antangpham kinei ta hi. Tua pen Antangpham hong pian khiatna ahi hi.

Gam dangah antangpham nei om lo hi kici hi. Hih a phuankhiapa Joel Gatphoh kici pen School Inspector sem hi a, a pianthak ciangin a kumpi nasep tawpsanin sawltak (evangelist) sem hi. Kumpi ulian ahih manin Babu Joel ci uh hi. Joel pen a Khristian min hi a, Babu cih pen Kala pau-in, Pu (officer) cihna hi.

Antangpham in a deihna bang hiam cih leh, gammial nasepna ding ahi hi. Tua hun lai-in a phuankhiate in gammial nasepna ding, mission school leh missionaryte vakna dingin a bawl uh ahi hi. Antang pham mante tawh missionary leh mission sangsiate khasum na pia uh hi.

“Hih antangpham panin na tampi tak semkhia uh a, gammial tampi takin khuavak muhlawhin mi tampi Khristian suaksak hi” kici hi. Tuhun ciangin ei ZBC Pawlpi sung en lehang Antangpham pen Numeite kipia a, amau sum ngahna danin kikoih hi. Meigong leh cimawh huhnain kizangin, ahih kei leh Pawlpi inn sung vanzat (furniture) leina khawngin kizang hi.

Hih pen a sia hi het lo hi. Ahi zongin a phuanpa’ deihna bangin kizang nawn lo kha ahi tam cih huai hi. Gammial nasepna ding, missionary, sawltak, mission school huhna-in kizang leh a phuankhiate ngimna leh deihna dan hi zaw leh kilawm hi. BWS deihsak lohna hi loin a kipatzia leh a pankhiate deihna genna hi. Rev. Gin Khan Nang