Antang panpihna ~ Lian Tuang

Antang panpihna ~ Lian Tuang

COVID-19 hang in mipi sungah nekledawn ding cimawh dongtuak In meikhu paisuak ding khat peuh a om ding kipatau mahmah ciat hi. COVID-19 tawh buaina nungah a kisam le a deih teng kipia ni cileng i neihsa in cin zolo deuh ding ahih manin antang panpih zia ding nam thum kigel in tua siksan in antang kihawm hi.

• 1) khua sung hausa upa, khangno makai le veng le pam khat peuhpeuh in huhtak hi ci in a ngaihsutte antang in panpih pah ding.
• 2) Lei ding antang a omlo ahih leh antang lei theihna ding vaihawmpih ding.
• 3) Antang lei nading sum a lem pak nailo deuh a om leh tuate ading vaihawm pih ding. cih dan ahi hi.

A tunga paizia dung zui in antang ip 370 val bang kizekkhia khin ta hi. A khuakhua a munmun panin ZCRC tawh kizopna ding lem thei khin lo ding ahih manin nasep le kizopzia a lem pen dingin phualpi 6 ki gelkhia a, tua tungtawn in kizop tohtoh ding cih ahi hi.

Phualpi 6 sehna a nuaia bang hiding hi.

• 1. Cikha khua le akim akiang khua teng ading ZYA Cikha (Phone 09265113750)
• 2. Tonzang khua le akim akiang khuate ading ZYA Tonzang (Pupu Thang 09253534987)
• 3. Tedim khua le akim akiang khua teng ading COVID-19 Emergency Committee, Tedim CSO. Phone Pa Thawng Sian Tung 09253283651
• 4. Tamu khua le akim akiang khua teng ading ZYA Tamu (Pa Enthawn 09256155953)
• 5. Thangkai kuam a om khuate ZCRC EC Member Pa Zamthuam Khaikam Phone 09400307982
• 6. Kawlzang kuam a omte akhuakhua a ZYA makaite in pan hong lading hi.

Nekledawn cimawh dongtuak kha peuhmah in kisuan ngaihsut loin lungmuang tak le maingal takin a tunga mun 6 te tungtawnin kizom ziauziau ni.

I u i nau i khua i tui teng mahin a kisam bangin zat dingin ong khenkhiatsa teng mah a zek kik hi hang. Itna lainatna tawh ong kipiakhia hi a, a kisap le akisap bangin i zat ding ahi hi.

A langkhat lam ah hih bangin mipi ading antang apiakhia nuam i om leh zong ip khat 23000 ks ( tul sawm nih le tul thum) manin kipiakhia thei hi cih zong kithei sak nuam hang.

More: Antang ip 1000 muibun takin zekkhawm ni ~ Lian Tuang

COVID-19 Virus vai pen bangtan sawtin, bangteng kituak kha to laiding cih bangmah kigen khol theilo ahih manin, i vekpi in kipawlkhawm in lung kituak takin ma i pankhop tohtoh loh phamawh ding hi. Topa’n Zomite hih gentheihna pan hong suakta sakkim ciat ding i thungetna lianpen hi. Lian Tuang, President (Zomi COVID-19 Response Committee) May 15, 2020