Zoom Meeting ah Pu Hau Do Suan thugenna

Zoom Meeting ah Pu Hau Do Suan thugenna

Myanmar gambup adingin Tedim khuapi ah Covid-19 positive case – 1 hong kimuh tak ciangin i zato innpi dinmun leh van neihte kicing het lo cih muthakin khanlawhna hong om hi. Bang taktak kisam ihi hiam? Bang thupi pen hiam? I deih i sapnate bangci ngah theih ding ihi hiam? Hih i tuah khak thu pen i khanlawhna – wakeup call khat hong suak hi.

Leitungbup dongtuahna Covid-19 hangin Zomite kithuza khawm, thu kikum khawm, thasan khawm lungsim gawm khawm thei ihih manin kamsiatna kawmkal pan kamphatna lianpi khat hi, ci-in ngaihsun ing. Hih pen i mit hong vaksak eye opening khat hi ta hen, ci-in thu na ngen ing.

I kisapte lakah inn leh lo, van leh na hi bek loin lungsim puakzia, nasep siam dan, i deih khat koici ngah ding, cih lampi teelsiamna leh zuih siamna kisam leng kilawm hi. Tua adingin sepkhop siam ding leh pankhop siam ding kisam mahmah hi. I attitude mahmah zong lim ngaihsut ding thupi hi, ci-in mu ing. I lungsim puakziate kitukalh lo ding, sak leh khang, Falam, Khalkha, khanglamte… cih bangin kibat lohna tampi om hi. Ahi zongin Constructive attitude i neih ding kisam mahmah hi.

I pahtaak khol lohte tawh koici pankhop theih ding? Kei zong bel keima mimal feeling lianpi khat zong om mah hi. Chin State leh gambup kumpi in bangci bangin ngaihsun uh hiam, cih zong phawk huai hi. Hih bang hun ciangin heh phangphang (Confrontation) lam hi loin alampi zui-in i deih khat ngah theihna dingin mi tawh kithuah siam (Cooperation) kisam mahmah hi. State Counselor leh Chin State video conference sungah Aung San Suh Kyi in Tedim pen deihsak masa ding, hong ci ahih manin tua pen i deih pen hi, ci-in ngaihsun ing. Tuamah hi ven maw i deih pen.

Tua ciangin i gam administrative kilamzia leh a dawldawl a thuvaihamna leh thuneihna a om ahihna limtak theih ding hoih sa ing. I deihna i ngah theihna dingin na bangci bangin sem thei ding, cih limtak ngaihsut kul hi. Kumpi nasemte, vuanzite, MP te leh mipite i vekin pang khawm a, i kisapnate kigenin kitawsawn a phut dan siam ding kisam hi.

Ka gen nop lai khat ah CSO te role pen thupi mahmah hi. UNO bangah CSO te pen nasia mahmah in agenda te nangawn ah kumpite sangin khat veivei hong lim pan lua kha dekdek uh in hi liang sam kei veh aw, a kici zah phial dongin hong thahat uh hi. CSO te nong hat ding uh lunggulh ing. Tua banah Media i zat siam ding, thupi sa mahmah ing. Thukizakna lam zong hanciam semsem lai ni.

Covid-19 tawh kizomin Tedim khuapi cimawh kisa-in i mangbat laitak Suantuang Siamnu in Zoom Cloud meeting hong pan khia a, tua online holimna ah Pu Hau Do Suan in April 25, 2020 ni-in a thusunna Zomi Broadcasting facebook page panin Tedim Post tanute in atomin kilasawn hi. Pu Hau Do Suan pen Myanmar gambup aitangin UNO ah Permanent Representative dinmun tawh New York khuapi ah 2016 pan kipan tuni ciang dong nasemin a om Myanmar gambup muan leh suan khat ahi hi. Guest Editorial/ Tedim Post