Anei na hi hiam? Athei?

Anei na hi hiam? Athei?

Tulai leitung paiziate en a i ngaihsutsut ciangin na khat peuhpeuh pen ngeina bang a pai cih om thei nawn loin kilehbulh gawpta cih ding hi. Siatna leh manthat theihna nam tuamtuam piang deuhdeuh a, amaan leh a maanlo cih zong tel zawh loh zah dongin siatna in masawn tektek hi.

Tua bang leitung a nungta i hih manun Khristian/thu-ummi a kicite zong bit tuan loin i niteng nuntakna uh hong nawk kha den a, bektham lo-in i khalam nuntakna mah zong bah tektek a, Pasian sangin leitung nate in i nuntakna uh hong zo gawpta in, Pasian sangin a thuphate ah kibuai tamzaw ta a, Pasian thu pen kineu ngaihsut tektek ta bang hi. Tua bang a sep leh bawl a thupha i ngahte kithupisimzaw ta ahih manin, Pasian phat a biakinn kai zong kitawm deuhdeuh ta hi.

Tua bang dinmun a i om laitakin hih a tunga thulu “ Anei Na Hiam, Athei?” cih tawh kisai tulai thu-ummite eimah mimal tek kidot ding pen kul leh poimawh sa ing. Theihna bek tawh kinga a, neih ding pen i neih khak kei leh poi mahmah kha ding hi. I tenna uh Lamka leh akiim a kiang et in a tamzaw in, “Kei Khristian ka hi,” i kici dinga, Khristian zakhat omna lakah 90% in, “Kei pen piangthak ta ka hi,” i kici ding hi. A percent et in piangthak a kici pen hoih mahmah hi, ahih hangin i pianthakna pen koi lai ah koih a bangci a a met bawl a zang i hi hiam, kingaihsuthuai hi. Pianthakna pen kuamah muh loh dinga selcip in, ei pen ut leh dah a gamtang hilehang kilawm bang hi.

Pawlkhatte’n a pianthakna uh tawh bazar sung lutin zuau thu teng siakhia uh a, pawlkhatte’n a pianthakna mah uh tawh kizuakna inn ah lutin tua mah bangin pawlkhatte zu zuakna inn ah lutin tua mah bangin pawlkhatte leuleu lah khamtheih hih kawmin Pasian thu gen bang siam mahmah, pawlkhatte lah nupi papi sa hitase leh poisakna nei lo pianthakna tawh zawlsai den kei banah nekguk takguk phamawh sa lo tua bangin i pianthakna uh nam tuamtuam ah kizanga koi pen maan a koi pen maanlo cih zong theih zawh loh zah dongin i nuntakna uh kisia ta hi. Tua bang dinmun i hih manun “Anei na hi hiam, Athei? cih pen kidot tuak mahmah ta hi.

I Lai Siangtho ah Topa Jesu in Nikodemas kiangah, “Na suahkik ding ahi,” ci hi (Joh.3:7).
Nikodemas pen Judah biakna zuite thuhilhsia leh ulian muanhuai mahmah ahi cih pen Jesu kammal panin kitheithei hi. Amah pen mi mawkmawk hi loin, biakna makai khat dinmunah na dinga, Pasian thu theihna lamah zong theihna hoihtak tawh mipite na pi-in na makaih taseleh NIKODEMAS in kha lamah pianthakna diktak (Jesu Khris Gumpa leh Tonpa a sanna, Pasian hotkhiat hih kitheihtelna, tawntung nuntakna leh sih khamuanna) na nei lo bek tham loin na thei kha vet lo hi.

Nikodemas mah bangin tulai Khristian kici mi tampite zong Pasian tawh kizopna maan/diktak nei loin Pasian thu pen a theih a theih thawh in nuntakpih lo kitam lua ta hi. Tua ahih manin theihna pen neihna hi loin neihna pen theihna tung panin kingah thei hi. Athei bek hi lo-a, anei leh azui hih ding kisam hi. Camp leh Cialpi khawng nei in Pasian thu gensiam taktakte thugen tampite ngaikhia in, “Thugen nuam mahmah ei, thugen siam taktak ei,” cih tawh i hun teng bei zel a, anung a bang teng phattuampih a nuntakpih i hi hiam cih zong tel mel lo kitam ta hi. Lai Siangtho Jeims 1:23 in bang gen hiam cihleh, “Mi khat in thu a zak bek tawh maisakin a zakna bangin a zuih kei leh limlangah a maitang a ki-en mipa tawh kibang bek hi,” ci hi.

Tuni’n sanggamte aw, na nuntakna ki-enphakik in, anei na hi hiam, athei? Mi pawlkhatte in, “Piangthak sa ka hi, zu leh sa ne in dawn in paktat takin om leng zong ka pianthakna pen bei thei tuanlo ding hi,” ci uh hi. Hih bang kammal a zangte pen mi kamsia tawpte hi uh hi. Bang hang hiam cih leh Pasian pen dangnal/kamsiam tawh khemzo lo ding hi hang. I pianthakna pen beithei lo mah ding hi, ahih hang a piangthak taktakte in tua bang zu leh sa ne in dawndawn lo ding uh hi. Lai Siangtho 1Joh.3:6 in bang gen hiam cih leh, “Khris tawh a kipawl mite in mawhna bawl nawnlo uh a, mawhna a bawl lai teiteite pen Pasian amu ngei lo, athei ngei lo ahi uh hi,” na ci ngiat hi. Piangthak ka hi cinapi a, zu dawn den kei, mawhna bawl den kei, omna dinga kilawmlo mun a om biakinn kai ngei lo cih pen Lai Siangtho tawh kituak lo hi.

Pasian thu pen atheih in thei in, na neih kei a, na nuntakpih kei leh limlang ah maitang ki-en mipa tawh kibang ding hi teh, tua ahih manin ANEI NA HI HIAM, ATHEI?

Pro Pastor T.Ding Gin Lian
Lungdamna Aw