Ama’n Kei Hong It Hi!
Kum 4 bek a pha pan Mary Ann kici numeino khat biakinn sunga a tutna ngei tutphah ah a nu tawh tu uh hi. Kikhop kipan kuan ta-in organ kitumtum ta a, tua naupangnonu in a mai-a Topa Zeisu lim kisuang en gige hi.
A nu’lamah kiheii-in tua Topa Zeisu’ lim kawka, a nu kiangah, “Ama’n kei hong it hi ve’n” ci-in huau phei hi. Hi lua, Mary Ann, Ama’n nang hong it takpi hi ven!
Tua naupangno sanga a kum tamzaw, thu zong a thei zaw eite in zong lungdamna takpi tawh Pasian’ hong itna thei thei zen lehang maw! Sawltak Paul in, “Amah in kei hong it-a kei’ adingin Amah mah hong kipia hi” (Gal.2:20) a cih bangin ei zong i lungsim takpi tawh ci thei den lehang!
Hih leitung hun a bei dong ahi zongin, hih leitung hun khempeuha bei khit ciangin tawntung hun nangawna i theih dinga kisam a thupipen hih kammal te ah kim pah lel hi. Leitung in hong mudah maw? Ama’n hong it hi! Nuntakna haksa-in na lampi mialcip-a, ni khat a bei ding haksa-in zante sau lua ahi hiam? Ama’n hong it hi! Lawm leh gual nei lo-in pawlsam na kisa lua hiam? Ama’n hong it hi! Mailam hun ding peuh na ngaihsut kholh ciangin na lungkham-in na lungsim peuh bei huaihuai mai-a na tha peuh dah ngaungau mai ahi hiam? Ama’n hong it hi! Ama’n hong it-a, hong itna kikhel ngei lo hi. Tawntung itna-in hong it hi.
Tua ahih kei leh ka mawhna hangin kisuanga ka lungsim hong patausak den ahi hiam? Ka lungsim kisuang gega mai ka hiam? Lunghimawh kei ning, bang hang hiam cih leh, “Ama’n kei hong it-a kei’ adingin Amah mah hong kipia hi.” Ka mawhna khempeuh Calvary ah paipih khin-a, hong itna sungah diah khin ta hi. Ka leiiba hong lohsak khin-a, ka
mawhna khempeuh hong puaksak khin ta hi. Kei’ thuak ding khempeuh thuak khin hi. Ama’n a vekin thuak khin – kei’ adingin Amah mah hong kipia hi!
Nisim-in hih thu tawh nungta lehang e! Zingciang zingsang, a ni buppi mahmah, nisim ngiat-in, khamuanna tawh nungta thei ding hi ve hang: Ka Honpa in hong it! Kei’ adingin Amah mah hong kipia khin!
Mary Ann kici naupangnonu in a nu’ maitang en to kikkek-a, “Ama’n kei hong it hi ven” a cih theih mahbangin, ei zong lungdamna tawh vantung lam en to-in hih bangin ci thei den lehang:
Oh! Zeisu’ hong itna a sanna aw!
Vantungte sangin sang zaw lai,
Tuipi thuk sang zong thukzaw,
A tawngtungin kip den lai;
Lamdang lua sa’ng! – hong zonga hong mu itna
Amah ka zon loh laitak hong mu itna.
Rev. Zam Khat Kham
Comment piaknop aomleh...