Alzheimer natna

Alzheimer natna

Alzheimer pen a theihnop dingin khuak lam natna nam khat ahi hi.Hih
natna a vei ten thuciamteh thei lo in mangngilh kik pah pah uh hi.A
omdan uh leh a khuasak zia uh zong kilamdang gawp hi.Tu ma lam in kum
upa lam bek in hih natna vei ding dan in kingaihsun hi.Ahizongin
sincianna pan in kum 40/50 kiim ten zong a vei lam uh kimukhia
hi.Alzheimer natna veite midangten a theih khiat khit kum 8 bang
nungta uh hi.Ahizongin a cidamna uh leh a kum upatna tawh zong kisai
hi.Kum 20 kiim a nungta lai zong om veve hi.Hih natna pen tudongin a
damsakna damdawi om nai tadih lo hi.

Alzheimer natna a kilat khiatdan a tuam tuam om thei hi.A kilat
khiatna a theihnop pen khatah thu ciamteh thei lo in mangngilh pah pah
uh hi.Lungmawk mah mah uh cihna hi.Thupiang khat peuh ciapteh haksa in
nithupi te nangawn mangngilh zen uh hi.A sep leh bawl ding natawm uh
mangngilh uh hi.Tua bek tham lo in mi’ min ciapteh haksa in mangngilh
pah zel uh hi.A theihna uh hoih nawn loh ahihmanin geelna kician zong
bawl thei lo uh hi.Nidanga olsam taka vaihawm meng meng napi in hih
natna a vei tak ciangun vaihawmna kician nei thei nawn lo uh
hi.Haksatna neucik nangawn vengsak zo nawn ta lo uh hi.

Alzheimer natna veite in nisima nasepte nangawn mangngilh uh
hi.Nidanga aki mawl siam mah mah Game te natawm kimawl siam nawn lo
thei uh hi.Motor a hawl ngei ten zong Motor hawl ding haksa ta uh hi.A
thupi khollo a ki ngaihsun te nangawn sem thei nawn lo mawk uh
hi.Alzheimer natna vei ten hun leh nite khen tuam thei nawn lo uh
hi.Hun leh munte khensiam nawn lo uh hi.Tua bek tham lo in
zong(Colour) zong khensiam nawn lo uh hi.A mit khua muhna uh zong deih
bangin hoihzo nawn lo hi.

Alzheimer natna vei te laigelh leh kampau ah buai thei zel uh
hi.Khatvei vei a thugen kimlai nangawn uh mangngilh thei zel uh hi.A
thugen khat uh khawlsan in adang tawh zom pongmawk uh hi.Khatvei veil
ah a banzopnang thei lo in a gensa peuh uh genkik zel uh hi.Alzheimer
natna vei te a thuciaptehna uh hoih lo ahihmanin a van koihna uh
mangngilh thei zel uh hi.Mipi omkhawmna khawng nuamsa lo in cimtak
thei uh hi.Midangte tawh kizopna hoih nei thei lo in phun hat mah mah
lai deep uh hi.

Pau Tun Thang