Alamdang Pasian’ zia pawlkhat ~ Pu Thangboi

Alamdang Pasian’ zia pawlkhat ~ Pu Thangboi

Ka nuntakna sungah lamdang kasak mahmah Pasian’ Zia pawlkhat ka theikha hi. Tu dong mah kizom toto lai ahih man in tawmkhat kong hawmsawn nuam hi

Anunungpen Masak Ding

Katuah khak nunung pen hong suut masa ning. Angah nailo te’n zong kidop theih ding in gen vet leng: Sikhum ih neih nak leh sawt leh Lungtang leh Kal (kidney) sukha hamtang hi. Tua ban ah pumzaw natna zong kingah thei tolai ci hi. Sikhum neih loh ding thupi pen a, ih neih khak zenzen leh zong control zawh ding thupi mahmah hi

Gilbem sung ah kum 4 sung ready-made (instant food) vive kanekna pan in sikhum kangah hi. Ka sikhum in ka lungtang thakiam sakta ahih man in Heart Failure kangah hi. Nih vei vilvel tua tawh ka si dektak khin hi

Sikhum za metformin nak neklua kahih man in ka Kal (kidney) na sukha to leuleu a tu’n ka kal thanem ta hi ci’n siavuan te’n hong gen hi. Sinkha sung ah suang na omta lailai hi.

Tuateng tawh tulaitak abuaibuai kahi mai hi. Khat khit khat ban lah ngiatngiat kul hi. Siavuanpi (specialist) te’ om nana zuat kul ahih man in tambei mahmah hi

Cimawhta

Sikhum leh Lungtang specialist te’n “Na kal thanem ta ahih man in kal specialist tawh kilak in” hong ci uh hi. Neih leh neih loh tawh kisailo in kakan leh kal specialist minthang khat a tutna ka theikhia hi. Upna tawh booking kala pong hi

Booking kalak pong hang ka sum ding om nawn peuhmah lo hi. Kacihna ding theilo in Pasian’ tungah kap ngeungeu in ka kiko hi.

Pasian in Maryland, USA a om atapa Pu Tuang Mung nalawng hiau ahih man in om khong thei nawnlo in ka kidney vai kilahna ding abei teng ka kilah ni ding lap in hong khak lian mawk hi

Kinaina kitanauna malkhat zong om hetlo mah tase leh Pasian’ sawlna mang ngiungeu in hong khak lian ahih man in kalung lah dam in thupi lah kasa mahmah hi

Ka Siapipa’ Hong Gen

India, Bangalore a Berean sang ah LST sang kakah lai in ka Siapipa uh ahi Rev. Dr. Jacob L. Chelli in “Pasian in khutdawh ngen ding in kuamah sam ngeilo hi. Pasian’ nasemte pen khutdawh ngen dingte ih hi kei hi” hong cih pen ka bilkha ah luai den in ka nuntak pih det thu khat ahi hi.

Hamsatna khatpeuh katuah ciang in ahih theih laisiah kuama’ kiang’ ah kagen kei a Pasian’ tungah ka kiko zaw hi. Ka kisik ngei het kei hi

$ 50,000/- hongpia Pa

2016 kum ZIUSA te’ thusiamna tawh US kapai laitak in ka lungtang buaipih in zato kalum hi. Zomite’ khuapi Tulsa a om St. John zatopi ahi hi. Asiding hong kisa ahih man in mi tampi in hong delh hi

Ni 10 sung kalup khit ciang in Pasian’ thupha tawh cidam in katuak kik hi. Zato lupna a bei $ 50,000/ vilvel hong maisak sitset (100% write off) mawk uh hi. Tua ban ah tua zawh kha 6 sung ka cidamna tawh kisai abei khempeuh tavuan hongla lai uh hi

Tutung kidney specialist tawh kilahna ding sum omnawnlo in Pasian’ kiang’ ka kiko tak teh thudang hong gen hetlo in “$ 50,000/- hongpia thei Pa hilo kahiam?” hongci kiau ziau mawk in tuazawh asawt hetlo in Pu Tuang Mung’ kiang’ pan a huhna hong tung lian hi

Lungsim Puakzia Ding

2018 kum zinei ta ding kahih man in medical check-up kabawl hi. Tua lai ah Hep-C (C puu/ပိုး၊) tawh kisai a result ka kansak leh tua alen siapinu in phone sung ah “Na lungsim na khauhsak in maw” hongci masa mawk hi. Tua khit teh awzol tak in “Hep-C positive mawk ei” hong cihiau hi

Tua hong cih laitak lian mah in kasung ah lungnopna (Shalom) hong omlian se hi. Kei zong kalung nuam tuan samlo ahih man in ka lawmnu kagen a “atawmpen kha 6 sung bang alumkhawm thei nailo ding himawk hang ei” kacih leh “Bang ih cih tadeh” hong ci hi

Kawlgam ah atawmbei pen Hep-C kibawlna mun kakan leh North Okkalapa zato nahi hi (Tua hunlai in). Ka delh pah hi. Siavuanpinu in ka tangthu teng hong dot khit teh “Anei ngei na hih leh na khan tawn positive alak den ding mah hi e. A lungno a omkei nak leh bangmah cikei inteh” hong ciziau hi. Ka zuanmang nuam liang hi. Zato mai ah lungno om leh omloh ka ensak pah a om peuhmah lo hi. Nuamlua kisa in ka lengmang dektak hi

Tua a kipan “Aw siavuante khawng ih cidam lam hong gendingte nahi zawmawk veh e” cih kaphawk hi. Zato inn hoih khawng kamuh teh “Hih te’n ka damloh khak ding patau mahmah uh ei” kaci theita hi. Hotel hoih khawng ka muh teh “Hih te’n ka tawl damloh ding patau ngel ve uh e” kaci thei ta hi

Hotel Ah Giak Kha

2017 kum Magwe gamke sungah gospel kapai kawikawi hi. Chauk khuapi a Emmaus Pawlpi vaan ding in Magwe pan Sia Gin Ngaih Thang tawh kapai uh hi. Chauk katun uh teh hotel kilam thak ahoih mahmah khat na om hi. Sia Thang’ kiang’ ah “koi dih o vadawp himhim dih ni” kacih leh lawptuak hetlo in alu khuat mualmual hi. Kei zong kapa’ lamsa hi acibang kek khat in kava vel ngingei hi. Ka vel kawmkawm in bel ka lungsim sungah thu ka ngetsak hi

Emmaus Pawlpi katun zawh uh asawtlo in Shan gam pan mi honkhat mawtaw 3 tawh genkhol lo in gospel hong pai hethat mawk uh ahih man in omna ding mun kicin loh tawh kei leh Sia Thang inntek te’n hong aanaa lua uh ahih man in den a kadawp uh Hotel pen ah hong giaksak uh hi

Hotel room sung ka lut uh teh Sia Thang tawh ka kinuihsan uh hi. Inntek te’n zong hong limbawl mahmah uh hi. Zingsang teh Hotel ah breakfast deihtak kanek kawmkawm un “Zin tung khempeuh in ei’ nekzah tek nemawk le uh kikaih kei ven cia” kaci sim khinkhian hi

Pasian in lungsim puakzia ding LST sungah Ong hilhsa luat hi a ih phawkkha kei pahpah hi. Luka 10: 5-6 sungah:
5. Inn khatpeuh mah na lut uh ciangin, ‘Hih inn sungah thupha om ta hen,’ ci-in a masa-in na gen un.

6. Tua innah thupha deih mi a om leh, note thupha a tungah a tung ding hi. A om kei leh, note kiangah hong kileh kik ding hi.

Naci ngiat hi. Mi thupha paihpaih leng en zong thupha kingah nahi mawk hi. Millionaire suakthak khawng a om leh lungsim sung pan thungen in thupha paih ding ahi hi. Mi lawhcing mi daupai khat ih muh ih zak leh zong ih lungsim sung pan thupha paih ding nahi mawk hi

Leitang Thupha

Mi’ leitang khawng zong haza selo in thupha paihpaih ding ahi hi. Kawlgam ah missionary a hong pai Korean te Pastor Cho akici khat om hi. ICC pawlpi ah hong kikhawm zel hi

Yangon ah leitang khat leiding in zongzong hi. Azon zawh kum 1 bang phata in adeih mu nailo hi. Citak lua mahmah ahih man in kuamah in anung zui nuam nawnlo hi.

Nikhat kamphen ding hong huh in ci’n hong cial a kava zuih leh tuani lian in leitang adeih khat mulian a teng 800 tawh leipah lian hi. Alungdam lua ahih man in Love-gift tul 70 hong pia lai hi

Pasian in hongpia nuam peuh leh thupha pen mun khempeuh pan in hong paithei lel hi. Pitazuh bang asum ding Topa Zeisu in ngasa kam sung pan lasak lel hi. Pasian in hih nuam peuh leh na khempeuh ATM set asuak thei lel ahi hi

Hallelujah !!!

Tutung cihmawhna pan Pasian in hong honkhia leuleu ahih man in kalung dam lua a tu a teng hong suutsuk detdat kahi hi. Suut ding tampi omlai mah leh sau Lua kha leh tutung tu a zah ciphot ni. Lungdam, Pasian’ it mahmah, Mung Laan Thang (Yangon)