Paak kiphah lampi hilo ~ Evan. Suangh Dal
1. Na galte it in. Amau tungah na hoih sem in. Sum hong leitawi leh pia in. Bangmah hong thuhkik ding lamen ken. Tua hileh na thamanh lian dinga, a lianpen Pasian tate na hi ding hi. Banghang hiam cihleh Pasian pen a lungdam theilo mite le siatna a bawl mite tungah zong thukhual Pa ahi hi.
2. A tumdang mahmah Jesuh Khrih Pasian ahihna na up keileh kuakua na hi zongin Christian taktak hi lo cihna hiteh.
3. Hell in a lau, Vantunggam in a deih, Leitung in a lamet et min pen Jesuh Khrih bek ahi hi.
4. Christian taktak na hihleh Vantung lam zuan-a hih leitung na khualzitna lampi a nuam lampi hi hithiat ngei lo hi, cih phawk in. Midangte mah bangin natna satna, supna baina, dahna thumna, lungkham sin-gimna i tuah leh lamdang sak ding hi lo hi. Pasian in ka mite aw hih leitungah na pianthak zawh uh-a kipan natna satna cihte, zawnna ngauna cihte khat zong na tuak ngei nawn kei ding uh hi, cih bangin hong kamciam lo hi. Ama hong itna lian mahmah ahih manin hih leitung thupha kikamciam ciang ding bek ading neu lua hi.
✓ Tuhun teh Lungdamnathu pen cihtheihna, lawhcinna (prosperity gospel) ciang bek a suah mite in, tuhun pen nidang Christian te banga thuakthuak hun hi nawn lo, a thupha san hun hi ta, gentheih hamsat tuahtuah hun hi nawn lo, lam hamsa tottot hun hi nawn lo, nop sak ngiat hun, hauh ngiat hun, cihtheih ngiat hun hi ta. Lam nuam tot hun hi ta, ci-in kihilh uh hi. Zuau thei gospel pai Penglam galkap te in hih dan nam hong bulphuh mahmah den ding uh hi. ကားတိုင်လမ်းဟာ ပန်းခင်းလမ်းမဟုတ်ပါ။
A kibang lel teng tawh a kibang lo Biakna
Mite in “Biakna tampi a om hangh a min bek a kilamdang hi a, a thuhilh uh a kibang vive mah hi lel hi” ci uh hi. Hih ngaihsutna pen maan lo hi. Leitungah biakna pi nih om hi. Christian Biakna ahi lo biakna peuhmah a min bek a kilamdang hi mah-a, a thu hilh uh a kibang vive ahi hi. Tua in, naa hoih sem in. Siatna bawl kei in. Na siat gamtat pen na hoih gamtat in a lek zawh leh hotkhiatna na ngah ding hi, cih bangdan pian vive tek ahi uh hi. Ahi zongin Christian Biakna pen tua ii a langkhat ah om lian hi. Christian Biakna ah hotkhiatna pen hehpihna hang bek tawh hi-in thalawhna tawh hi ngei lo hi. Kuamah in a sepna thamanh tawh diksakna ngah ngei lo hi. A sepna thamanh tawh mawhsakna ngah bek hi. Mi khat midik-a a kiciapteh theihna thu pen Jesuh Khrih ii hong thalawhsak nasepsa upna hang bek tawh ahi hi.
✓ Christianity is not just a religion. It is faith in the person of Jesus Christ. Christian Biakna pen biakna vai hi loin Jesuh mimal tungah ki-nga upna thu ahi hi.
Leitungah biakna khempeuh a kibang lel hi loin a kibang lel teng tawh a kibang lo khat om a, tua tawh biakna Nam pi nih a om ahi hi. Tua ahih manin – leitungah a kibang lel teng tawh a kibang lo Biakna khat om-a tua pen Christian Upna ahi hi. Evan. Suangh Dal
Comment piaknop aomleh...