Aki piakhiazo khangno tampi kisam ~ Khup Lian Thang

Aki piakhiazo khangno tampi kisam ~ Khup Lian Thang

Lamet hetloh hun le I lamet hetlo laitakin Kawlgam ah a masapen Covid-19 natna pen Zogam, Tedim khuapi le Yangon ah Weibagi zato pan hi citciat hi. Tedim pan aa pen 13 March ni in USA pan Kawlgam hong ciah hi in, Yangon aa cina pen UK pan in 21 March ni in hong ciah hi. Kumpi lam thunei te hitaleh, Siavuan lamte hitaleh, Media tuamtuam le mimal khempeuh in hih theihna le lunghimawhna ciat tawh a kihawm sawn tuamtuamte hangin thulela tampi zong kiza le kisemta ahihna kimu thei hi.

Sen gam panin kipanin tuni in ahihleh leitung gam khempeuh phial ah kizelta a, tuni 24 March ciangciang pen mimal 381,000 tung kilawhta aa 16,500 tak si khin ta hi, ci-in CNN in gen hi. Cina khempeuh ii 100 ah 4 bangin sihlawh in kiciamteh a, tampi tak mah pen cidam takin zato panin innlam zuan khin zong om tham hi.

Natna Tungah A Gualzo Zawdeuh Gamte Dinmun

A kipatna pen Sengam, Hubei gam huam, Wuhan khuapi pan hi in tua panin leitung kiu 4 ah akizel ahi hi. Wuhan ah 2019 kum bei December kha sungin hong kipan khia aa natna a khauhpai semsem ciangin a khuabup a gam bup uh khakcip in, tu in ahihleh damdam in a gualzo a nawkzo lam hita hi. A kipatna Sengam ah pen hoihtakin kikemzo ta uh hi.

Leitung ah khualzin le sungtum pusuak a tampen na gam ahi Singapore gam in zong tua natna a kipat hun le hong khangkhiat ciangin in nakpi takin kigin pah uh a, Siavuan siamahte kuamah a kisamlo pi in nasep khuan(Leave) lasak nawnlo in a lakhinte zong phiatkik sak hi. Kumpi in nipi naisim in Media te tungtawnin mipi tungah kikep kikhoi dan ding, kiginkholh dan dingin hilh den zasak den hi. Natna nei mi pen nisim in kibehlap in a khang tohtoh sam hangin kumpi in kiciantak le hoihtak in nasem khawm ahih manin mipite dinmun pen tuni ciangciang hileh lunghimawh nading om loin, maban kizom toto thei hi.

Singapore gam bangmah in Taiwan, Korea gam te in zong nakpi takin mipite kidawmin, kumpi in a sawl bangin thumang uh in, akisam bangin kigin kholhna, inn sungah kibilh cipna, natna neite tawh a ki sukha te in amau theih ciatna lungsim tawh amau le amau kipulak in kikem uh ahih manin hih natna pen a kipat cil lai danin khang hanhan nawnlo in hoihtakin kem cip zo pianta uh hi.

Tulaitak A Thuak Mahmah Gamte

Hih natna akipat ciangin Singapore danin a navak gam pawlkhat in a kigin mahmah sam hangin, gam tampi mah in na awlmawh lo kha uh ahihmanin tu in thuak cihtakin a thuak gam pawl khat om hi. A diakin Europe gamte ahi Italy, Germany, Spain te ah suksia zaw deuh aa, tua mah bangin Europe gam tuamtuamte leh American Continent aa gamte in tulaitak a thuak mahmah laitak ahi hi. Hih zah takin a khanna a hangpen, mipilte genna ah, Sengam tawh kigamla mahmah lel ahihmanin hong tung zolo ding hi cih lungsim nei in kidawm lo uh hi.

Natna a kipat ciangin zong mipi kikhol khopna pawi tuamtuamte khiam tuanlo in, night club te a bar tuamtuamte uh khak nai tuanlo uh hi. Mikangte ngeina ah khatlekhat kimuh ciangin khut kiletna ahi zong kinapna ahi zong zang uh aa zato lam mipilte in kidop ding a gen hangin na thusimlo kha uh hi. Tua in thuak cihtakin thuakin Italy gam bangin hih natna hangin a si pen Sengam aa a si sangin tamzaw tham ta hi. Tampi kibehlap lai hong si lailai ding uh hi. Tuin ahihleh amau zong kihta taktak lautaktak ta uh ahihmanin kidawmta uh a, a gam bup uh zong na khempeuh, sai khempeuh, a vekin khakcip phial ta uh hi.

Natna Omna Zogam Maban Ah

1) Zogam, Tedim gam in zong gam lianpite sepziate etteh ding kisam a, Sengam in a gam bup, a khuabup a khakcipna hangin tu in gam sungah daihna om zaw ta hi. Singapore gam mah bangin hihnatna akipat phetin kigin dingte kiging pah, a sia pen dingin kigin kholhpah theih ding kisam hi. Tedim ah, kumpi thuneite in Tedim gambup a khakcip ding kisam ding hi. Tua dingin a kisam bangin kumpite a kalsuan nadingin mipi in panpihin tawsawn ding kisam ding hi.

2) Europe gamte bangin hih natna neu ngaihsut ding hihetlo ahihna pilhuai hi. Kilawhna manlang lua mahmah a, natna neisa te le kumtam khin sa te in lel deuh ahihmanin ken thuakzo ing, ci hetlo in mimal kim kidop ding kisam hi. Mimal sianthona ah Zato lamte le a thei a siamte genna om bangin zuih pah ding kisam ding hi. Kikhopnate khawl phot ding, Sai khante khawl phot ding, nasepnate khawl phot ding, khualzin nate khawl phot ding kisam pelmawh ding hi.

3) Gamgi pen Tedim khua nawl panin Kawlpi/Falam lam paina teng khak ding, Tonzang lam paina zong khak ding, India lam paina zong khak ding, Tedim khuasung khakcip dingin lampi a hoih theithei tawh mapan ding ahi hi. Tua mah bangin Kaptel khuazong khakcip photphot loh phamawh hi.

4) Hih natna pen Tedim ah kipan ahih manin khat bek tawh khawl lo ding hi. Sanggampa a ciah zawh pen 10 bang hita ahimanin ut in ut kei leng, mi tampi tungah kilawhta ding ahihna kician mahmah hi. Tua dingin sang khol sa in, tua a kizoppih khempeuh pen koici lampi tawh kikem kibawl thei ding cih, Zato te nasepna ah mimal kimciat in panpih ding kisam pelmawh ding hi.

5) Pasian mah muangin sun le zanin thungetna tawh maban ciat ding thupi ding hi.

6) Hih natna pen bangtan sawt ding cih kuamah in gen theilo hi. A kician ah pen kha 1-2 bang hi thei ding, kikepzawh kei zenzen le tua sangin zong kaizaw thei ding hi. Tua ahihmanin hih hun sungin nisim nuntakzia ding, Zato sia siamahte, Kumpi nasemte, cina lunate a sawt loin hong gim hong thabei kha ding uh hi. Khuasung aa om mimal kimte’ nisim neek la dawn, zattawm ding ci le sathau, tuisiang te hong kicing nawnlo ding hi.

7) Zomite adingin a thupi pen ah, hih bang hun sungin a tangzang ding khangto thahat tampi kisam ding hi. A kisapleh zato ah Siavuan siamahte’ nasep huh kul ding hi. A kisapleh neek ding dawnding neilo te adingin antang tuibuk te zon sak kul dinga, zattawm ding tui zong puakkul ding hi.

Kumpite nasepna ah kisapna aomleh a gen ding a hangsan kisam ding hanga kumpi makaite tawh na sepkhop loh phamawh ding hi. Gamgite kikhak mang ding ahih manin a kisam bangin lampi tuamtuamtawh, mipite’ zattawm ding neek le dawnte a lut theih nadingin lampi zongin Kawlpi panin a makaite tawh hoihtakin na a sem khawm thei ding mi kisam ding hi hang.

Zato lamte a panpih ding, Kumpite a panpih ding, pitek putekte le koimah ah a vakkhia theilo ding mipi khempeuh a panpih dingin tangzang takin a diang khia ding, nasep ding, itna deihsakna a nei khangno tampi tam kisam hanga, tua teng a gawmtuah thei ding kipawlna tuamtuam panin makaite khut kilen ding na sepkhop loh phamawh ta hi. Khup Lian Thang