Kalkawm lunggulh manin na Kal mansuahken

China gam Sichuan khuasung aom University sangnaupang nungakno khat Saturday zanin Night Club khatah vapai hi. Amahzong ki suaktasaklua in gualnuamtak in zu vadawngawp hihtuak hi. Tualeh pasalno melhoih mawhlo khatin vahopih in, ongki holim semsem, ki maingap semsem uh a, a nunung ciangin tua Night Club tawh akinai aom Luxury Hotel khatah zankhat giakkhawm dingin hongpaita uhhi.

Hotel atun uhciang inzong tangvalpa in zu dawnpih leuleu a, anih un leitung mangngilhliang in nuamsa mahmah uhhi. Tuakhit ciangin lupnatung hong kidenna uh a (aban no ngaihsut siam dandan………)

Ahi zongin tua nungaknu hong khanlawhkik ciang aci asa hikmiaimuai in, aki heisawmleh kisilna Bathtub sungah tuikhal honkhat tawh aki koihlam hongphawkpan hi. Tua Bathtub gei ah tangvalno pa’n laituisan tawh agelh laidal khat leh nungaknu phone na nusia hi. Nungak nu’nzong alai asimleh “Emergency Hotline 120 amanlang in sam in, nasap keileh siding hiteh” kici mawk hi.

Nungaknu zong lauthawng mahmahkawm in tua nambat ongsampah a, ama omziateng genpah samsam hi. A Phone ki hopih pen Doctor khat hi a, tua Doctor pa’nzong na nunglam ah letmat 9 dingkhawng aki atkek munnih aomhiam zawtin cimawk hi. Nungaknu’n zong tuabanglian in anungah aki atkek atheihciangin hong patau semsem hi. Doctor pa’nzong tuikhal Bathtub sungah nalumsukkik inla, natang ngawhken, a honkhiading in hongpaiding hi ung ci’n vaikhak hi.

Hihpen numeinu’ Kal (Kidneys) ana kiguksak himawk hi. China gam Black Market te ah Kidneys pen Chinese Yuan 300,000 bangin kizuakthei ahih manin hihbangdan in aki gukkhiatsak hihtuak liang hi. Doctor te genkhiatna ah Hotel atun uhciang nungaknu dawnkhak zu lakah Anesthetic kici ihmutza kihel ahih manin, tangvalpa’n nungaknu Kidneys a atkhiatsak ciangin ana aphawklo ahihi cimawk hi.

Tua nungaknu pen zato ah Kal ahawmding “Kidneys Donor” a ngakkawm in a nuntakna beilawh mawk hi.

Hihthu pen China, Sichuan khuasung pan apiang taktakthu hi a, khasiat huai mahmah hi. Night Club nopsakna, numei pasal tawmveisung ki lunggulh pakna cihte hangin supna tampitak in ana sulzuihpah nahimawk hi.

Hih thupiang hangin eizong bang Lesson lading, bang kidopding thupi penpen hiam?

Na theihngeiloh midang khatin zu ahih keileh nektheih dawntheih khatpeuh ongpiak ciangin sangkei lel in.
Natheih ngeiloh midang khatpeuhtawh Hotel khawngah lupkhop pakding baih ngaihsut luakei-in.

Agel siamding in Topa’n thupha hongpia tahen! ZD Sawltak #zomidaily