Aki dop huai pasal nawi Cancer natna, pasal Breast Cancer nei tamsemsem

Aki dop huai pasal nawi Cancer natna, pasal Breast Cancer nei tamsemsem

Nawi Cancer “Breast Cancer” thu akigen ciangin numeite bek ii neihtheihding kisakha pahpah theihi. Ataktak in pasal te’nzong Breast Cancer aki ngahtheilua hi a, tulamlam ciangin pasal Breast Cancer angahpen tamsemsem kici zawlai hi. Leitung gamtuamtuam bekthamlo, Myanmar gamsung nangawn ah pasal Breast Cancer neipen khangsemsem kici hi.

Tua ahih manin, Breast Cancer pen numeite bekthamlo, pasal te’nzong aki lauthawng mahmah natna gilo namkhat ahihi.

Hihvai tawh kisai in Taxi hawl U Onn akici kum 40 gual papi khat in 7Day Daily te tungah agenna ah “pasal te’nzong Breast Cancer ki ngahthei cihpen zangei hetlo hi’ng, tu’n kazak cilna hi. Numei te bekin Breast Cancer angah theiding kasak hiven. Tuabang ahih mawkleh nisim in keilehkei kanawi kaki Check zelzel kulmawk lodiam” ci’n genkhia hi.

Yangon General Hospital ah Record aki ciaptehna aki etkik ciangin pasal te Breast Cancer ngahna pen akumkum in khangsemsem cimawk hi. Breast Cancer angah pen 2013 kumin mi 1, 2014 kumin mi 1, 2015 kum ciangin mi 6 cihbang in khangto cihi. Tuapen Yangon General Hospital khatbek ii ciaptehna hi a, pasal tezong Breast Cancer ngahkhakding kidop huai cih hong phawksak hi.

Pasal te’n banghangin Breast Cancer ngahtheihiam cih athu kiciantak in aki muhkhiat nailoh hangin, atamzaw pen zatepna hang, zudawnna hang, Exercise bawlngeilo, thauvallua cihte hangin Breast Cancer ki ngahbaih phadiak hi ci’n Study bawlciatciat in akankhia te’n pulak uhhi.

Yangon General Hospital panin Dr. Khin Cho Win in agenkhiatna ah pasal te banghangin Breast Cancer ngahhiam cihpen angahtheihna atamzaw ahihleh zudawnna leh zatepna hang hipipen hi. Tuaban ah athauvallua tezong Breast Cancer angah omthei uhhi ci’n genkhia hi.

Breast Cancer apianna ahang taktak kiciantak in aki genkhiat theihloh hangin apiangsa leh apiangsakthei cihbangin namnih in kikhenthei hi. Zudawndawn, zateptep te, athauvallua te, numei nau asuak ngeilo te, numei naudalna azangte, Exercise bawllo te, Breast Cancer khanggui anei te cihte pen Breast Cancer ngahthei uh cihi.

More: Broccoli ankamlum te’n Cancer natna dalthei

Dr. Khin Cho Win in agenbehna ah pasal tepen apianpih anawi uh aneucik khat hi a, Breast Cancer aneihkhak zenzenleh anawi golsuah in numei te sangin theihbaihzaw cihi. Theihcil phetin zato ah kilakpah leh zatui ahunlap in kibawlthei pahhi. Ahi zongin pasal Breast Cancer pen numei te sangin abawl hamsazaw cicitciat hi.

Pasal tepen anawi uh Color akilaihkhawng aomleh amanlang in Doctor tetawh kilahpahding thupi a, Breast Cancer angahte ahunlap in zatui kibawl in, zu leh za azatkei nakleh adamkiktheih nading lametna tampi om cihi. Hihlai nasimkhit ciangin nanawi navelpah in. Sawltak #zomidaily