Ahoih vive hilel ei ~ Dong Mung

Ahoih vive hilel ei ~ Dong Mung

Khuaneu khat a teeng puteekpa khat in Sakol khat a nei hi. Ni khat tua a Sakol innpan gamsungah pai a, ni bangzah hiam khat innlam ciahlo in a om hi. Tua ciangin khuamite’n puteekpa kaamsia sa lua uh ahih manin hong pai ngeingai in hehnem uh a, tha a pia uh hi.

Tua ciangin Puteekpa’n, “Kaamsiatna hiam; kaamphatna hiam thei keng… Ahi zongin a piang khempeuh ahoih vive hilel ei,” a cihsan hi.

Kalkhat bang khit ciangin tua a Sakol innah hongciah a, Sakol dang thum hong tonpih hi. Tua ciangin khuamite in puteekpa hampha sa lua in lungdampihna hong gen ngeingai leuleu uhhi.

Puteekpa’n, “Kaamphatna hiam; kaamsiatna hiam thei keng… Ahi zongin a piang khempeuh ahoih vive hilel ei,” a cihsan hi.

Tua Sakol dang thumte a zual theih nading, tungtuan a phal theih nadingun puteekpa tapa’ in a pantah hi. Tua banga tungtuan phal in a zual theih nadingun a sinsakna ah Sakol tungpan kia in a khe langkhat a kitansak kha hi. Tua ciangin khuamite’n puteekpa hong hehnem in tha hong pia ngeingai zel uh hi.

Puteekpa’n, “Kaamsiatna hiam; kaamphatna hiam thei keng… Ahi zongin a piang khempeuh ahoih vive hilel ei,” ci-in a gen hi.

Tua bangteng tawh tawlkhat khit ciangin a khuavuah galkapte hong pai uh a, a cidam khangnote galkap dingin a la uh hi. Puteekpa tapa’ bel a khe langkhat hoihlo ahih manin kila khalo hi. Khuamite’n kaampha luateh ci ngeingai leuleu uh hi.

Ama’n, “Kaamphatna hiam; kaamsiatna hiam thei keng…. Ahi zongin a piang khempeuh ahoih vive hilel ei,” ci-in a gen hi. (Taangthu laksawnna – ဗန်း​မော်​သိန်း​ဖေး – မျှ​ဝေ​သော အ​တွေးများ (၁) – page 44-45)

Thalakna

I nuntakna sungah i tuah i thuak haksatna, guallelhna, maizumna, dahna, lunglen lungzuanna, mindaina, thanemna..cih bangin a sia lam thute hangin kaamsia zong i kisa thei a, mite’n zong kaamsia hong sa in hong hehpih kha thei hi. Ahi zongin na khempeuh, ei tunga hong tung a piang thu khempeuhte in ahoih vive ahi hi.

I nuntakna ah i lawm le gual, i u le nau, i mi i sate tungpan ngah dinga i lamet deihsakna, lainatna, panpihnate ngah kha loin hong mangngilh bawl, hong kinawlkhin, hong phawkkha lo, hong deihsaklo ciangin khasia in i thanem kha thei hi. Ahi zongin amaute tungpan ahihloh hangin ei hong deihsak, hong panpih nuam, hong phawk, hong khual mi na om thei veve lai hi.

Bangbang ahi zongin i tunga hong piang khempeuh ei adingin ahoih vive hilel hi. Tuni a guallelhna tawh i khitui luannate zingciang gualzawhna tawh i khitui luanna hun hong tung ding hi.

Tuni a nawlkhinna i thuak hang zingciang angvanna i ngah ni hong suak ding hi. I lungkhamna kuampite kametna kongpi hong suak ding hi. Tuni i tuah thute pen zingciang adingin lesson hoihpen hilel hi. Ei adingin ahoih vive hilel ei. Lungdam, Dong Mung 29 June, 2018