Afghanistan ah US te Bomb khiatna hangin asi kibehlap, IS migilo 92 si

Afghanistan ah US te Bomb khiatna hangin asi kibehlap, IS migilo 92 si

Afghanistan gamsung IS migilo te omna munah US galkap te’n Thursday ni in MOAB Bomb khiatsuk uh a, tua Bomb hangin IS migilo 36 si hi ci’n Afghan Offcials in pulakna neikhia masa uhhi. Tua Bomb kikhiatna munteng US-led Forces leh Afghan Officials te’n siansuahna “Clean-up Operations” bawl uh a, IS migilo asi honkhat kibehlap cih AFP News pan kiza hi.

US Military te khiatsuk Bomb pen amawkmawk hetlo, Bomb khempeuh ii apianna tuunnu ci’n minneu Nickname akivawhliang “Mother Of All Bombs” ahihi.

Afghan Officials in apulak masakna ah IS galkap 36 si ci uh himahleh Bomb aki khiatnamun Achin District Governor Esmail Shinwari in agenna ah atawmpenpen IS galkap 92 siding hi ci’n Saturday ni in AFP te tungah genkhia hi. Aki zakmasakna sangin asi pen azahthum dektakbang phatota hi.

MOAB pen amalkim ‘Long Form’ in “Mother Of All Bombs” hitaktak samlo a, “Massive Ordnance Air Blast” akicihna hizaw hi. Amalkim taktak in “GBU-43/B Massive Ordnance Air Blast Bomb” ahihi.

Hih MOAB Bomb pen United States Military in 2002 kumin bawl akipatkhiat uh ahihi. Bawlkhiattheih nadingin ngaihsutna aneikhia pen Air Force Research Laboratory panin Albert L. Weimorts, Jr. kici hi.

Hih MOAB Bomb pen akibawlkhiat laitak in US te galvan “American Arsenal” khempeuh lakah Nuclear Weapon lobuang dingin akhauhpenpen in aki ciamteh ahihi.

Hih MOAB Bomb pen gollua mahmah in agihna bekbekzong 21,600 Pound (9800 kg) pha ciliang hi. U.S. Air Force te’n genna ah hih MOAB Bomb khatbekbek abawlnading inzong sum $170,000 bei ciliang hi. MOAB Bomb pen tampi zong kibawllo a, avekpi in akibawl pen 15 bek ahihi. Hih Bomb pen 2002 – 2003 kumsung in akibawlkhia hi a, Afghanistan gamsung ah Thursday ni in aki zatlohbuang, gal kidona ah kizangngei nailo hi.

Russian Military te’nzong 2007 kumin “Thermobaric Weapon” kici Bomb lianmahmah khat bawlkhia uhhi. Tua Russia te bawlkhiat Bomb zong mawkmawktuak hetlo a, amin mahmahzong Bomb khempeuh ii apianna zuapa “Father of All Bombs” ci’n minneu Nickname kivawh leuleu hi.

US Military te bawlkhiat “Mother Of All Bombs” sangin Russia Military te bawlkhiat “Father of All Bombs” pen azah 4 in khauhzaw cilai uhhi. “Mother Of All Bombs” pen 2002 kumin akibawl hi a, “Father of All Bombs” pen 2007 kumin akibawl ahih manin, akhauhna leh Technology zong khangto khathei mahding hi.

More: Russia gamsung meileng khatah Bomb puakkham in mi 11 si, 45 liam

Bangbang ahi zongin Bomb khempeuh ii apianna zuapa leh tuunnu te hongki totlohding uh thupi dinghi. Banghanghiam cihleh Tuunnu leh Zuapa kitawngleh innkuansung nopngei loding hi. ZD Sawltak #zomidaily