AD Kum 2011 – Kualalumpur aa kibawl Zomi Nam Ni pan Zo suante tung phawn thakna – 4

Kipawlna, mipi makaite
Zomite kipumkhat lo in vai kihawm thei nawnlo hi. Namdangte kipumkhat mahmah uh ahihman in kum 100 sungin Zaw(Zo) minam bup amau aa suah aa, kum 800 sungin minam lianpi omsa nangawn valhtum zo uhhi. Zomite zong kithutuahna a i neih kei leh asawtlo in ong kivalhtum ding, kician mahmahhi.

Tua muhkholhna leh kiim leh paam thu tuamtuam teng i kaihkhop na tungtawn in 2010 November kha, Tedim khuapi aa kibawl Kum 100 cin, CCJC Pawipi pan Zomite mailam kalsuanna ong makaihding Biakna Makaipi 5 kiseh khia aa, tuateng in ih minam mailam kalsuan zia ding ong vaan ding uh, cih ahihi. Hih Makaite teng ong kiseh khiatna tungtawn in dotna tampi ong ompah hi. Kipawlna amin ding banghiam? cihmah, bang ong sem ding uhhiam? cihmah, muan huai ding uhhiam? cih mah dotna tampi ginghi. Kei mimal muhna ah amin, apuam athupi masa kasa kei aa, makai omlo, ahizelzul, ei tumtak tek aa kalsuan sang minambup ai hibang khat nei lehang kalsuanna, sepkhopna ah mui bun zaw veve ding ci-in ka umhi.

Hih makaiteng pen apil pen, asiam pen, ahoih pen, mawh baang lopen ci aa kiseh hilohi. Amau zong pil pen ung, siampen ung, genbang kei pen ung ong cizong hizenzen lo uhhi. Zomite’n nu aa pa aa neihding, thusia, thupha i tun nading mun khat neih ding, ih lungsim ngaihsutna i gawm theih nading, mipi lunggulhna tungtawn aa ong piangkhia ahihi.

Hihteng in Zomite zingvai nitaak vai ong vanding uh aa khua hun ong khua daak ding uhhi.
Ahihhang amau 5 teng tawh bangmah piang zolo dinghi. Hih 5 tengin Zomi bup ong kamvaak ding sa kei ni. Amau 5 tungtawn in mipi in i ngaihsutna gawmkhawm, sungkhawm ding hang aa, tua tungtawn in ei mah ciatmah kipeei aa i sepding ahihi. Amau lam ong lak ding cih hibek aa, asem abawl ding ahihleh ei mah ciatmah hiding hihang. Hihpen 2010 CCJC pawikhit aa ong piangkhia kalsuanna thak hi aa, Zomi bup in i san theih photphot ding thupi dinghi. Zomite lungtang khat in, ei i kihel kei leh langpan ding, thupi sim lo ding, gensia ding cih hiden aa, tua lungsim paai khia tading hihang.

Hih kalsuanna thak pen hih ciang(Zomi teng kithutuah, kilungtuah ciangbek) tawh atawp hilo in, i Zomipih veve ahi Chin akici te’n zong Dr. Hre Kio makai in Global Chin Christian Fellowship cih khat nei uh aa, 2010 November kha sung mah in Kualalumpur khua ah kikhop lianpi khat sam uhhi. Dotna a om zelzel khat in, Hihbang Zomi teng atuam aa neihna in i Zomi aneuseek i hihiam? Banghang GCCF tawh sem khawmlo in tuamtat i hiam? Thu tangpeek vai hilo hiam? Tuagenloh, banghang ZND tuambvawl in CND tawh kigawm lo ihiam cih dotna tam mahmah hi.

Tuabang hilo hi. Zomi aneuseek, atuamtat, athutangpeek hilo in, kipawlna lianpi leh ataangzai lua in tu laitak aa i Kawlgam kalsuan zia, khua hun tawh kituaklo hi. I ngaihsun kha ngei hiam? I kipawlna aciip mahmah, angaat mahmah abit mahmah ding kisam hi. Sunggal, pua gal tam lua hi. Dawi havang kal aa thu ki vaihawm ahihi. Zomi kamphen kullo teng tawh icih ciang kipawlna lah agollua, ataangzai lua hilo, bangmah sem zolo zah aa aneulua lah hilo ahoihbek kalsuanna ahihi. Kipawlna ataangzai, agol athupi masa hilo in(tu tadih a ding), kithutuak leh nasem ding athupi masa ahihi.

Lungsim kitaang zai sak, thupi kikhualsak in agolpi huam sawm kei ni. Tua ban ah, tutadih Zomite i dinmun in, angsung leh sum leh paai vai ah thanem mahmah lai ihihman in, kithupi khualsak huai nailo hi(Gtn. in CCOC sum a tamciang, zahtaak om nawnlo, kih taak bei, azang ding kituhteh, aituam CCC lam, dinmun hilai lel hihang aa hihteng mah makaihna hilai ahihman in kigawm hang a ngei mah ngei lel dinghi). Tua ahihman in idinmun i zaisak nop hang, i lungsim zai zo nailo hi. Tua hi aa aneuseek hilo in, pauban omlo na sepna aa muibun ding cihna hizaw hi. Sazuk kipuak aa puakdng lel ahihleh bel a zaai theithei thupi mah aa, khau gui kawm aa awk nalel a suah ding ngaihsut huai hi. Tua ahihman in na lung alen ngap leh GCCF ah paiding, sepkhop ding hi aa kikhaamna omlohi. Mindeih lel nahihleh koikoi ah na pai zongin na tatzawh nading omlo ding hilelhi.

Etteh huai
Tutung Zomi Nam Ni, KL ah vaihawmna picing mahmah aa, Pawlpi khempeuh amau’ biakpiak kikhopna phiat in mipihteng tawh kipawl khawm in ZND kibawl khawmhi. Tuabek hilo kipawlna khempeuh, innpi khempeuh kihelkim in thangah huai mahmah aa, abeisa kum aa kipan Khuado leh Zomi Nam Ni semkhawm, bawlkhawm, nopci mahmah hi. Etteh huai mahmah din mun atungta uh ahihi(Ki pumkhat na ah)

Tuni tuhun Malaysia Zomite kalsuan zia ka etciang, kipawlna, Pawlpi mipi kikaihkhopna ah makaite dinmun athupitna ong lak kasa hi. Adiakdiak Pawlpi makai, Pawlpi Siate muhna taangzai mahmah aa, i minam bup kingak theih nading phualpite ahi uhhi. Zomite makaihna Pawlpi 30 val a om KL khuapi ah mipi leh Siate ZND ah, avek mah in ong paikim uh aa tha ong piaciat uh ahihman in makai Siate, Pawlpi upa te in i minam vaai apuapua ta uh ahihi. Lungdam mahmah hang.

Makaite tawh kisai in ngaihsut huai mahmah thu tampi ong musak hi. Nidang aa kithutuah lohna, kikhenkhapna pen mipi kikhenkham, kithutuaklo hilo in makaite ahihzawkna siangtak in kimu khia tahi. Makai sung ah thu tangpeek, angsung thei, thu khuallo, min deih, thu lang gen khat leh nih a om ciang kipawlna buaisak in, mipi kikhensak na hi gige aa, makaite ei leh ei ki-et kik hun mahmah kasa hi. Tua bang makaite mipi in damdam in i nilkhiat ding kisam mahmah tahi. Kipawlna, Pawlpi khat ah ei deihna, ei cih, ei ngaihsut, bek icih leh kihotheihna asia hipah hi.

Tutung CND bawlna ah CNF te’n amau dial khai zangding cih ong gin ciang i tuambawl tha ong suak hipahhi. Tua mah bang inZND bawlna mun khat peuhpeuh ah, LZI, WZC, ZNC, ZRO, NLD… in ko’ dial khai zatloh pha mawh ong ci uh hileh, minam bup nasepna ah apianglo ding hipah hi. Angsung lungsim icih in hih lungsim puakzia ahihi. Ei party, ei Pawlpi, ei kipawlna taangkona, zuakna ding mun hizenzen lohi.

Tua ahihman in Kipawlna, Pawlpi ah ei utthu tawh makai ding kipia hizaw lo in mipi deihna, thuumna tawh hizaw leh deih huai kasa aa, khatleh nih hangin mipi kithutuahna akiam ding ahihleh siangtak, teltak aa kigen mai hunta kasa hi. “Hihpa, hihnu hang in hihbang thupiang ahihman in kipawlna ah na zang kei un” kicih hunta kasa hi. Tualo in akipia zopeuh, a utpeuh, akizen peuh i zat ciang makai theilo honkhat hang in kikalsuan theilo aa, kisel, kitot, kitapna tampi piangsakhi. Makaite’n zong ei leh ei ki enkik in, bangpi asemkhialo, ihsep hang kitapna apiangsak ihihlel leh ei leh ei kihep khiatding dap khawl huai kasa hi. Zomi lak ah makai ut pong makai theilo, kitap, kikhen, kitot, kiseelna apiangsak lel makai, tutak tampi om hihang. Angsung ngaihsutna tawh makai ut tampi om hihang. Tuate hang in ih minam sung kipumkhatna, kiho theihna asia ahih gige lam mipi mahmah in ih makaite sittel huai aa makai khat leh khat sung ah zong ki etcik huai kasahi.

Hang Khan Lian