AD Kum 2011 – Kualalumpur aa kibawl Zomi Nam Ni pan Zo suante tung phawn thakna – 3

Banghangin Zomi hizah mangthang in thelthang ihihiam? Hih dotna dawn kikna dingin, banghangin minam pawlkhat namdang valhtum hat ahihiam? cih enkik lehang kician penpen hi.

Mi thelthang i suahna pen
1. Zomite’n ihihna thupi simlo hihang. Zomi, Zo cih min nei gige Chin kicih ding hi peuh cici lai hihang. Zum ngaihsut kha hihang. I hih bangbang gending zum huai hetlo aa, aval aa gen kidop ding hibek hi. Ong piangsak Pa’n Zomi ding aa ong piangsak hi napi thupi simlo in Chin, Kuki peuh kici nuam hihang. Zaw icihteng Zo ahihlam genkhin hihang. Tua i santheih kei leh tuni aa Zo akici teng nidang aa Zaw akici, laimal gawm kibatloh hang hibek hi. Tua ahihman in Zo akici i etkik ciang Zaw teng Zomi teng Mizo teng ahihman in tawm nawnlohi.

Chin in namdangte ongpiak min hi ci aa itheih gige hih min mah deih veve hang cih pen angsung hamphat nading, tom kal met nading ngaihsutna bek ahihlam kilang mahmahhi. Zomi aa kilo teng kua ong piak cih itheihloh zah aa ei leh ei kilawhna ahihman in lunglen om nawnlo ding aa Chin aa kilo teng hunkhat teh a mipi in banghang “Lai” aa ki lo lo ihihiam ci-in mipi’n khua ong muh ciang tuni aa makaite ong mawhsak in, ong buaisan ding uhhi. Ong lungleng ding uhhi. Lai cih kammal abei sak nuam aa kipan uh ahihi. Mipi in khua ong muh ding uh kisam aa, tu tadih in ahihleh makai te’n meng, khem zo phot uhhi. Makaite ginaatlohna khangthak hunteh ong muding uhhi. Kei banglian in, Chin aa kilawh liangsang, Lai in kilo lehang ei leh ei kilawhna hizaw lai kasahi.

Beh leh phung
Pasian in minam khat aa ong piansak bek hilo in beh le phung neiding man aa ong piansak hilaihi. Ihbeh ihphung cihte ei bawltawm hilohi. Khua theihma pek aa i neihsa hi. Ei deihthu aa kinei hilo in ei utthu aa kipaai thei hilohi. Tua kimlai pen thupi laaklo, thuipi ngaishutlo in kithutuahna susia ci-in peuh phiat nuam kha hihang.A piangsakPa simmawhna ahihi. Ih zatkhialh man hi aa zangthei hilehang ahoih mahmah ahihi. It huai mahmah hi.

Leitung thu leh vantung thu
Pasian, ong piangsakPa in amah (apiangsakPa) theikik ding aa ong siitsiit ahihi. Kawlgam mundang khempeuh minam, biakna akihelzau laitak, akikal helh laitak Zogam bek omlai hihang. Topa’ ong siit hi. Tua kawmkal ah pawlkhat in, minam leh Pawlpi, Biakna leh kipawlna, taksa leh kha khennuam, leitung leh vantung vai peuh in khenkha hihang.

Pasian piansak mual leh guam, vanduum, tuipi, singkung lopa hoihsa in i phatphat laitak, Pasian piansak veve Zomite phatding mangngilh kha hihang. A piansak minam tawh tutkhop khawlkhop ding thupi simlo kha hihang. Zomi Namni bawlna aa kihel ding leitung vai in ngaihsun khial kha hihang. Zomi Nam Ni apiangsakPa tung lungdam koh masak ding, thungetna tawh hunpat ding thukimlo kha hihang. Pasian piansak mual leh guam luitui, singkung lopa thupi simlo, kepding cin ding puahding ngaihsun khalo in su siasia kha hihang.
Pasian’ piansak minam in amah apiangsakPa thei in, ama’ hoihna, vangliatna i phat valkan aa Pasian lungdamna lian om nawnlohi. Minam khat aa ong piansak adeihna bulpi in amah apiangsakPa phatding cih simloh adang omlohi. Tua ahihman in i mipihte tawh Pasian phatkhop ding leitung vai, cilehsa vai, sa kha kei ni. Minam manthang ding kipatna ahihi.

2. Kipawlkhopna neilo hihang
Kipumkhat, kipawl khat cih a omlo zah ahihi. Tual Biakna biak lai in khua khat tual khat hi aa, Tual Biakna bawl khawm, bia khawm cih omlohi. Khuado zong minam bup pawi ahihhang khua khat leh khua khat kibanglo hi. Manthan nading olsak tuamhi. Buddhist Biakna ong tun ciang Kawl gam ah Kawl minamte ong kithutuak uh aa, namdang tuamtuam genloh, Zaw (Zo) tampi amau minam asuah uh ahihi. Tu in Zaw(Zo) te in ko Zaw(Zo) hi-ung cinawnlo in Kawl hi-ung cita mawk uhhi. Kum 100 sungbek ahihi. Buddhist biakna minam biakna suah uh aa, a minam uh biakna suah uhhi. A biakna sung vuah sungtang mahmah uhhi. E’n i Christian hihna angsung, aituam Biakna suah in kikhenkhapna suah hihang.

Christian hihang i kicih hang i Christian hihna in i ngeina lui Tual Biakna mah tawh kibang lai hi. Nidangin khua khat Tual khat bek hi aa tu in Zogam khuate ah Pawlpi atawm pen Pawlpi li bang om hamtanghi. Tual khat pan Tual li aa kisuah ihihi. Ygn ah Zomite phuh Pawlpi kisim zolo zah ahihi. Mangthang lai mahmah ding cihna hipahhi. Ih biakna minam biakna suah lo in angsung biakna suah hihang. Kipawl khoploh, kipum khat lotawh piang nawnlo hi.

Tua ahihman in,
Zomi icih in Pasian piansak ahihlam i phawk masiahi kipum khat masiah, i hihna khempeuh i thupi muh masiah, mailam kalsuanna ah ihsep khop masiah a mangthang ding minam ihihi.
Tuateng hang in 2010 kum aa kibawl CCJC Pawipi ah Zomi khempeuh sak le khang, suah le tum, sim le maal kikai khawm in thukimna, kiciamna khat kinei aa adeihna bulpi in Pasian sung ah kithutuak ding, kalsuan khawm, sepkhawm ding cih ahihi. Thupha ngah minam cihna pan, Pasian zat minam ikici ta aa, “zang” cihna in semkhawm, bawlkhawm cihna ahihi.
Topa tawh asemkhawm abawlkhawm ding minam hita hihang.

Hihpen kithutuahloh, kipumkhat loh tawh mangthang mahmah laiding cih phawnna cini.

Hang Khan Lian