AD Kum 2011 – Kualalumpur aa kibawl Zomi Nam Ni pan Zo suante tung phawn thakna – 2

Zomi uleh nau,
Abeisa November kha aa galkap kumpi makaih kiteelna enkik lehang, Kawlgam sung aa mualtung mite tenna state atamzaw ah minam dang te’n kalhelh in, adiakdiak Kawl leh mualtung mite kileek kim zah dong in tam tuaktuak uhhi. Ka cihnopna in Kawl in kal helh khin ahihman in Kawl (Bama) min tawh zong kuang lui thei uhhi.

Zomi te’n zong Kawlpi(Kalay) township ah tul 50 val ihihman in, Zomi min tawh kiteelna kilut thei ahihlam i theihciatsa hi aa, tua pen mimal aa tam cihna ahihi. Mualtung mite omna ah Kawl (Bama) mintawh kiteel lutzo cih pen tam mahmah uh cihna hipahhi.

Tuakawmkal ah, Zogam ah ahihleh Kawl(Bama) kici leh namdangte tua zah in tamlo in mimal aa simzawh phialding bek ahi uhhi. Tuazong kumpi nasem teng khawng cihding hilelhi.
Hih pen Pasian ong kepna khat hi-in alungdam huai mahmah ahihi.
Ahihhang lam khat pan ong uk galkap kumpi ii etsatna, etcikna leh target pi i ngahna hipahhi.

1990 kum kiteel lai in Tamu Township pan Zomi makaipa’n teel cing ong ngah ciang galkap makai teng patau in Kawlpi leh Tamu kikal ah Kawl khua ong saat pah uh ahihlam i theihsa ahihi. Tua mah bangin tu’n zong Zogam ah namdang tawh ong kalhelh zawh nading ong hanciam ngelngel ding uh aa ei khamtheih, ei thu neihna hilo hi. (Gtn. Meiteite nangawn mun pia mawk uhhi)

Tuabek zong hilo laihi.
Tutak Zogam ah Christian 90% val i om lam i theihsa hi. Lungdam huai leh zong nuam mahmah pahhi. Nam dang in ong kalhelhlo ahihman in Biakna dangte’n zong ong kalhelhlo hipahhi. State dangte, minam dangte ah Biakna dangte’n kalhelh zolel ahihman in awlmawh huai nawnlo ahihhang, Zogam ah awlmawhloh apha mawh ong suakhi. Abeisa kumte aa ka pulaak zel mah bang in galkap kumpi in NLD. ZNC sang aa amuhdah zawk in na Christian hihna ahihi. Christian ihihnaak leh gawt theih gawt mawh hipah aa, a ip bawl uhzong hinawnlo zah dong ahihi. Tua ahihman in hih zong, Zo suan tate’n phawk kawmkawm in i sepna, i bawlna, heksuk hek toh kidop mahmah ding leh mailam ong tungding hunte ah kidop mahmah ding, AD Kum 2011 Kualalumpur Zomi Nam Ni pan Zo suan tate tung phawnna – 2 kaci nuamhi.

Hang Khan Lian