Abaih sanlo ding thukhat ~ Pu Thangboi

Abaih sanlo ding thukhat ~ Pu Thangboi

Leitung ah minam itna anei phadeuh a kiciamteh pen Israel te ahi hi. Minam itlo bel kuamah omlo ding a, amau’ itdan suksan deuh cihna hi.

Ki nampi sak in “Ei pen Pasian’ teltuam hi hang. Midang tawh teh theih hilo hihang” ci phadeuh uh hi. Tuadan a ei leh ei ki pimuh deuhna (ethnocentrism) bel minam kim in akinei tek ahi hi. Eimi sung nangawn ah zong akinampi sak phadeuh khawng om mawkmawk hi. Kawlte leh Zakhaite bang tualam ah suksan mahmah uh hi.

Babylonte hong thahat in gam khat khit gam khat hong lak ziahziah laitak un kamsang Jeremiah’ tungtawn in Pasian in Judah kumpite’ kiang ah “Babylonte’ khut sung ah ki surrender lel un” ci hiaumawk hi.

Baihsan ding hiam?

Gam leh minam it mahmah khat’ kiang ah “Na gam, na lei, na minam leh nang mahmah na galte’ khut sung ah ki ap suk lel in” cih mawk pen hamsa mahmah kha ding hi. A mipih te’n mawhsak mahmah ding a, azi ata mahmah in zong zungkawk hiau ding ahih man in tua sawlna pen zuih hak mahmah in ka um hi.

Judah kumpipa Zedekiah in Pasian’ sawlna mang zolo in Babylon kumpi hong lehdo hiau hi. Kei hileng zong tuaci kha in ka ki-um mai hi. “Sih leh sih” kici khamai ding hi.

A galdona hong lawhcing hetlo a, azi atate mahmah ama’ mai ah kithat in amah zong amittang tegel kikhei khiat sak hi. Tua ban ah sikkol kibulh in Babylon gam ah asih dong thongkia hiau hi.

Baih sanlo kan ding hi!

Zedekiah’ khit a Judah kumpi asem Jehoakhin in Babylon kumpi lehdo nawnlo in ki surrender ziau hi.

Alamdang mahmah khat

Jehoakhin kum 37 sung Babylon gam ah thong akiat khit teh suakta kik in akumpi tokhom ngahkik mawk hi. Tua ban ah akhan sung tawntung Babylon kumpi in vak ngiat ci hi.

Jehoakhin pen migina ahih loh hang Pasian’ thumang, Pasian’ sawlna zuimi suak mawk hi. Tua ban ah kum 37 sung athongkiatna sungah kisik kikna leh Pasian’ maipha zonna khat na nei zong hi khathei ding hi.

More: Tulai gamvai ngaihsutna tuamtuam ~ Pu Thangboi

Leitung pen ih deih bang in hong pai dandan hetlo ahih man in thu haksa mahmah kawmkal ah ut hetkei mah taleng Pasian’ aw mah ngai in ama’ thu mah manh teetaa ding mah na hizaw hi.

Tuteng Pasian’ Thu ka lungngaihna pan in hih thu in hong lawng lua mahmah ahih man a hong hawmsawn kahi hi. Genkhialh a om leh ngaidam, Lungdam, Mung Laan Thang (Tonzang, Zogam)