A Zi cihloh Ap

Pasal khat a sanggamten sim mawh cihtak in simmawh in bawlsia lai hi.
Hih zah in bawl siatna a thuak pasalte innkuan pen innkuan nuam hi
hetlo cih ki lang hi. A sanggamten a sim mawh manin gamdang na tung
kha citciat hi. Sim mawhna a tuak laitak in ka sanggamte nikhat niteh
thusia mah tawh thukkik ding hi-ing cih a ngaihsun hetlo hi.

Cidam in gamdang hong tungta hi. Gamdang a tunteh mi innkhat ah na
hong sem hi. Citak tak in na hong sem ahih manin a na sepna pu te
innkuan sung khantoh cihtak in khangto sakzo mawk hi. Na sep hahkat
hi. Citak in nasem hi. Hih zahin na asepteh a pu in muang semsem hi. A
tawptawpna ah a pu in a innkuan sung vai khempeuh a geel dingin hong
muang mahmahta hi. Muan huai takpi hi. A pu in muang luata ahih manin
a neihsa khempeuh a zeek ding leh a innkuan sung vai kisam khempeuh
hong apta hi.

Thukhat om hi. Innkuan sung vai khempeuh a ap hangin a Zi ap samlo hi.
A pu pen agam uh ah u lianpi khat na hi sawnsawn ahih manin a nasep pa
muang luata a nasempa kiangah hih inn sung vai leh ka gam sung vai
khempeuh nang kong ap hi. Ahi zongin ka Zi cihloh kong ap hi ci a pu
in gen hi. Amah zong a pu in a innkuan sung, a gam sung ap ahih manin
citak tak in na hong semin a gam sung uh hong nuam hi. Gamnuam hong
suak hi.

Nikhat a sanggamte omna gam ah kilpi hong tungin a simmawh mahmah uh a
sanggam pa om na gam ah Antaw dingin hong pai uhhi. A sanggamte antaw
dingin a pailam a muhteh a sanggamten zong a muh uh hangin a mel asa
na tel nawnlo hi. A sim mawh uh asanggam pa ulianpi na suak ding cih
genloh a si khin dingin ngaihsun uhhi. Amah na si lo ulianpi na suak
hi.

Simmawhna a tuakpa in asangamte a muhteh hehpih huaisa mahmah hi. A
beisa in asanggamte simmawh bawlsiatna te a phawk hangin thukkik ding
cih peuh mah ngaihsunlo hi. Hih bang lungsim a pua vilvel te mah
Pasian in ukna neih ding, mipil dingin na siam hi. A simmawh
asanggamten amah atheih notloh uh hangin aman na tel mahmah lai hi.
Antaw dingin a pai asanggamte anlim tak in vak hi. A ciahteh an tampi
tak puasak hi. A kik ah antaw dingin a unau tengun pai kik in ankuang
um khoppih hi. Tua lai ah a vekpi un ki theita uh ahih manin itna
khitui luangin hong om uhhi.

Innkuan ki lemlo, sanggam ki lemlo panin khankhia himah leh hihte
khempeuh a lemtuah dingin gamdang na tung hi. Pasian in mite a ki
lemsak ding, innkuan a ki lemsak dingin gamdang na tungsak hikha ding
hi. Gamdang a tunteh asanggamte bawl siatna a theih hangin thukkik
peuhmahlo hi. Bawlpha ding, puahpha ding, zuun ding cih geelna ki cian
neih hi. A sepna peuhpeuh ah citak tak in na sem hi. Innkuan sanggam
ki lemlo ki lemna bawlzo hi.

Gamdang a pai laitak in asanggamte neihsa tawh pai hetlo himah leh a
lawh cinni, a tuahphatni in a sanggamte thusia tawh a thukkiklo mipa
aom nana ah lawh cing gige hi. Mite muan leh suanin hong om den hi.
Hih ih gen pen Lai Siangtho sunga Josept nuntakna ahih manin thupisa
mahmah ing.

A siam ding, a puah ding, a zuun ding Pasian in nang leh kei hih ciang
dinmun hong tungsak hikha thei hi. Hi kha kei phial mah lehzong thusia
tawh thukkikna adeihlo Pasian phawkni. Thuhoih tawh Thukikna adeih
Pasian hi.