A thupi GZA & ZCD kipawlna ~ Dal Sian Hung

A thupi GZA & ZCD kipawlna ~ Dal Sian Hung

Civil Society pen tangzai in dai a, Political party pen toi in thuk hi. Biakna pawlpi pen tangzai in dai a, minam pen toi in thuk hi. I minam sungah kipawlna thupi tampi om a, tuate’ sung panin GZA leh ZCD a thupina tawmkhat kong pulak nuam hi. Tawm bekbek hong gelh ding kahih manin a tawp dong na sim hamtang ve maw.

ZCD (Zomi Congress for Democracy)

1972 kumin Pu T. Gougin, Pu S. K. Samte makai in India le Myanmar gambup Zomi khempeuh minam vai ah lawngkhat in i luankhop theih nangin Daizang, Manipur, India ah Zomi National Congress na kipankhia uh hi. Tua tawh kisai in India kumpi theihpihna zong nangah uh hi.

Minam vai ah thahat theih nadingin kipawlkhawm in “the first World Zomi Convention” cih khawmpi 19-21 May 1988 in Champhai, Mizoram, India ah a masapen Zomi khawmpi kibawl hi.

1988 kum tak ciangin Myanmar ah gam vai haksatna lianpi hong tunga a lotheilo in minam le gam ading mapan ding a kisapna dungzui in minam party khat phuat dingin minam it makai pawlkhat hong kipan khia hi.

Tua hun lai in thu taktak ah ading zo dingin mipil mi tei ki khaat lai mahmah ahih manin Sitni Chin Sian Thang (BA, BA (Law), LLB) angkawi in makai ten na zawn uh a, Pu Cin Sian Thang pen makaipi in hong seh pah uh hi.

India Zomi te patsa ZNC mah min vawh in Myanmar ah ZNC hong ding uh hi. 1990 kum kiteelpina ah ZNC party panin Tedim ah Pu Chin Sian Thang, Tonzang ah Pu Thang Lian Pau (Tulaitak ZRO makaipi) te in gualzawhna hong ngah uh hi.

Ahi zongin galkap kumpi in panmun pia nuamlo bek thamloh party makai teng mat le hen dingin hong zong uh a, tua hun laitak pen India gam Lamka khuk sungah unau belkaang kituh in Paite leh Kuki a kido ciangin Pu Thang Lian Pau pen minampihte lemtuah dingin India lamah va kihei khia hi.

ZNC pan ZCD

Pu Chin Sian Thang pen maban zomin nawk a kulte nawk, phut a kulte phu in party vai ah mat le hen tampi vei thuak hi. Lungkia het loin hanciam toto a, 2015 kum tak ciangin kiteelpina ah lut dingin hong pan ciangin ZNC min naleng hong sanglo in ZCD tawh a kilaih to ahi hi.

Kiteelpina ah ZCD honglut takpi uh a, ZCD sung panin kuanglui mi 9 sung pan mi 6 in telcing dinmun hong ngah uh hi. Zomi tangthu ah a lungdam huai a lamdang gen ding thu khat in ki ciamteh hi.

Kipawlna A Kipzawhna Thubulpi

Hih kipawlna hong kip toh zawhna pen gen ding tampi om kha ding hi. A thupi penpen ah kipawlna sunga mapang khempeuh in a makaipipa Pu Chin Sian Thang ngiat Pa dinmun ah koih ngeu in thupi bawl ahih manin kipawlna a nungta toto suak hi.

Pu Chin Sian Thang (President of ZCD)

• Pa min: Pu Sum Hang
• Nu min: Pi Niang Khan Cing
• Suah ni: April 6, 1938
• Suahna mun: Zampi, Tonzang, Chin State, Myanmar.
• Pianpih: Numei 3, pasal 1, amah a u pen hi.
• Pilna: BA, BA (Law), LLB. (Yangon University)

GZA (Global Zomi Alliance)

Zogam ah Pasian’ thu khuavak hong tunzawh kum 100 cin pawipi 2010 kumin Tedim khuapi ah kibawl hi. Tua mun panin Pasian’ nasem mipil tingteng 300 kiim leh mipi 60000 valte in Zomi mailam ah Pa dinmun hong la dingin teelkhiat mihing 5 nei uh a, tua teng a nuai abang ahi hi.

Makaipite:

• 1. Rev. Dr. Simon Pau Khan En (President)
• 2. Bishop Felix Lian Khen Thang (Vice President)
• 3. Rev. Dr. Chin Do Kham (General Secretary)
• 4. Rev. Dr. Do Suan Mung (Assistant General Secretary)
• 5. Rev. Dr. Gin Khan Khual (Member of Central Committee)

Hih a tunga makai 5 tengin Singapore ah 11 May 2011 in Zomi Innkuan Singapore (ZIS) innteekna tawh kimuh khopna hong nei uh a, kipawlna GZA hong phutkhia uh hi.

6. Rev. Dr. JM Ngual Khan Pau (Member of Central Committee)

India gam panin mipil muanhuai mahmah Dr. JM Ngul Khan Pau zong Central Committee ah mapang dingin a zot uh ciangin Dr JM Pau inzong minam a itna tawh na sang hi.

7. Rev. Dr. Go Chin Zam (Assistant General Secretary)

October 16, 2016 in lamet het loh mang inzong i mat ngamloh i makaipi khat ahi Rev. Dr. Chin Do Kham in hong nusiat vat ciangin Dr. Mung in GS panmun hong let loh phamawh ahih manin Cetral Committee ah AGS hong kisam hi.

Minam a vei, pilna-hauhna khuasak zia ah mi muanhuai mahmah Myanmar gambup OM makaipi Rev. Dr. Go Chin Zam tungah Central Committee panin zotna hong nei uh a, Dr. Zambawi inzong minam a itna tawh na sang pah a, Assistant General Secretary dingin kisseh pah hi.

GZA Kipawlna A Lawhcinna:

GZA sunga kihel khempeuh in Central Committee thupi sim uh a, Central Committee inzong makaipipa Dr. Enno pen Pa bangin ngaihsun ngiat uh ahih manin GZA pen a lawhcing mahmah hong suak hi.

Pa dinmun ah i koih khat Pa bangin i bawl theih pen kipawlna ah cidamna hong piangsak bulpi ahi hi. Central Committee sunga om makaipite khempeuh pen a muanhuai vive hilel uh hi. Ahi zongin makaipipa pen Pa bangin bawl thei mawk uh hi.

Rev. Dr. Simon Pau Khan En tangthu tomno:

• Pa min: Pu Lam Za Thang
• Nu min: Pi Cing Do
• Suah ni: October 24, 1944
• Unau: 5 pha uh hi.
• Pilna: BTh, BRE, BD, Dip in Ecumenics, MTS, PhD.
• Nasepna ah Lawhcing:
• 2000-2002: MBC, General Secretary
• 2006-2010: MIT, Principal

Yangon khuapi laizang ah biakinn lian mahmah i neih TBC ah Senior Pastor dinmun tawh Pasian na semin mi tampi a pantah Zomite’ Pa gina khat ahi hi.

Ngaihsut Ding Thu:

Innkuan khat sungah innkuan nuam a suah theih nadingin i Nu le i Pate i zahtak diamdiam theih mah bangin kipawlna khat peuh ah Pa dinmun-a i teel makaipite pen Pa bangin i ngaihsut theih ding kisam hi.

Pa banga ngaihsun theilo, a ki elel, a ki tuhtuh, a ki gensia thithu kipawlna peuhmah pen hunkhat ciangin hong bei lel hi. Pa’ kicinlahna pholak hetlo a, aseel khiankhian tapa in thupha ngah a, Pa a mindaisak tapa in samsiatna ngah hi. Dal Sian Hung