A Thokik Zeisu kammal masa 7 te ~ Sia Pau Khai

A Thokik Zeisu kammal masa 7 te ~ Sia Pau Khai

Zeisu in athawhkik khit ciangin athupi mahmah kammal 7 honggen masa a, tuate in inuntakna hong khamuang sak mahmah hi.

1- Banghangin kap nahi uhhiam ci hi. John 20:15.

Zeisu in amahangin akapte pen angaihsut ciangin Zeisu aomnawnloh manin akap uh amuh ciangin kapnawn kei un keimah in note kahna kongdawng ding hi cih alahna ahihi. Zeisu pen eite lungkhamna khempeuh aphi ( answer) ahihi. Kua zong nahi uh hiam cilai hi, azonpa un Zeisu amuhnak leh lungkhamna khempeuh vengding cihna ahihi.

2- Dammaw , Laukei un ci hi. Matt 28:9.

Zeisu in dahmel lua sa ahih manin Dammaw cih ahopih ciangin keimah in damna mangpa kahihi cih alahna ahihi. Laukei in acih ciangin kei ka omnak leh note adingin bangmah launa ding om lo cihna hihi..Tuni in zong Zeisu in mimal kim tungah Dammaw hongci lai a idawntheih nakleh damna bukim hongpia ding hi.

3- Banggen na hi uhhiam ci hi. Luke 24:17.

Emmaus pen Jerusalem pan tai 7 agamlatna ah minih lampai uhhi. Thudang agen hipeuhmah leh Zeisu kilang hetlo dinga, ahizongin Zeisu vangliatna thu bekbek gen uh ahih manin Zeisu akilang ahihi. Inuntakna sungah Ei mihing thu leh ihamsatna teng igen gen laiteng Zeisu hong kilang thei mahmah lo a ahizongin Zeisu vangliatna leh hongitna thu igen ciangin Zeisu hong kilang pahpah ahihi. Zeisu pen hongkilang pah takei leh hongtonden na hihi,akilat theihna dingin imathu limgen ni.

4- Nopna ngahta un ci hi. John 20:19,22.

Nungzui te inndei sungah kong kikalh khum in lautakin a omlai takin kongkhak om takei leh Zeisu amaute laizang ah om thei veve a,nopna ngahta un ci hi. Inuntakna sungah ikalsuanna ding lampi leh kongkhak kihong aomhetloh laitakin Zeisu maipha ngahpeuh leng kongkhak hongom ma in Zeisu hongom dinga, Zeisu hong om peuhleh kongkhak thak hongom pah ding hi.

5- Leitung khempeuh ah vakkawikawi unla Lungdamna thu na hilh un ci hi. Matt 28:19-20.

Zeisu in Lungdamna gospel thu tangko dingin tavuan hongpia hi. Lungdamna gospel nasepna sungah akikhel kha peuhpeuh te tungah Zeisu alungdam mahmah ahih manin aituam bawl pahpah hi. Tuni Pasian thu um te leh Pasian nasem khempeuh te nasepding athupi penpen in Lungdamna thu tangko ding ahihi. Hih Lungdamna thutangkona ah, agen ,asawl , athungen cihbangin Topa hongkoihna kibanglo hi. Hong koihna munmun ah Lungkimtakin isepding ahihi.

6- Ngasa na man uh hiam ci hi. John 21:5.

Zeisu nung azui denden Peter ten Zeisu sihsungin ngen na mankik uh a, ngasa matding hongkipan kik sawm uh hi. Ngen tawh ngasa amatsawm hangin bangmah ngasa manhetlo hi. Zeisu in hehhetlo in ngasa naman uh hiam acih bek hilo in angasa matna dingun lamlak a, lawhcing sak mahmah hi. Zeisu in ngasa akhut uh tawh amatsak bek hilo in , ngasa leh khomun aminsa in pia lai hi. A ngen tawh ngasa 153 mansak a, angen keek dekta napin keek saklo hi. Peter pen Zeisu in kei nongit hiam ci-in thum vei dong hi. Zeisu in ngen it nawnlo ding ,ngasa itnawnlo dingin Zeisu it ding , Zeisu itte itding in vaihawmsak hi.

7- Jerusalem nusia kei unla, kapa kamciam nangak un ci hi. Sawltak 1:4.

Zeisu in thu ummite in akamciam Khasiangtho angak zawhloh khakding uh lunghimawh ahih manin Jerusalem na nusia kei unla, Kapa in keitungah hongciam Khasiangtho bangin kongpai kik dong na ngak un ci hi. Tuni in eite zong Topa in huhpa Khasiangtho hongpia nuam den a, ahizongin ngakding honggeelsak den zel hi. Ngakzo leng kamciam kimu thei den hi.

Atunga Zeisu kammal 7 tengin mimal kimtungah honghopih henla, avanglian Zeisu thawhkikna thupha in hongtuam tahen.

Lungdamna tawh,

Siai Pau Khai
April 16