A theihhuai Syria buaina kipatna bulpi leh Middle-East sunga US te ngian
US te’n 2009 pekin Syria President thahnading suai na kai khinta hi: Wikileaks Cables
Sept. 17, 2016: WikiLeaks ten USte keel luphum khat pholak leuleu uh a, a cables uh-ah US ten a sim in President Assad in Qatar gamte’ datsi lawng (oil pipeline) kikhung ding a deih loh manin a thahna ding lai (death warrant) suai Syria buai ma 2009 pekin na kai khin ta uh hi ci hi. Assad in Syria gam-a lut dingin Qatar gamte datsi luanna ding lawng kikhung ding a deih loh manin U.S., Saudi leh Israeli intelligence agencies ten Assad thah ding a lem kei leh a kumpi tutna tokhom panin lawn khia dingin thukimna a simin na nei pah uh hi ci-in WikiLeaks cables report in suaksak hi.
Counterpunch.org reports in a genna ah WikiLeaks ten hih thusim a pholakna ah 2009 in Assad in Syria gamah gamdangte hamphatna ding bekin Qatarte datsi lawng khung ding a nolh manin USte’ secret agent CIA ten Syria kumpi langpang pawl tuamtuamte (opposition groups) sum tawh na holh pah uh hi. Hih thu tawh kisai Robert F. Kennedy Jr. in Politico news ah, “Bang hangin Arab ten Syria ah hong deih lo uh hiam?” (Why the Arabs don’t want us in Syria) kici laipaih ah lim takin na at hi. Kennedy in Syria-a gal pen gal ngeina (conventional war) hilo-in Libya leh Iraq gam bangin kumpi laih nopna hanga gal kipiangsak tawm ahi hi ci hi.
Hih banga kumpi laihna ding mawtaw hawlpipa pen kua dang hilo-in Kidopi Nihna khit nungin leitung-a gam 50 val ah kumpi laih khin zo USte hi ci hi. US pen mipi deihna tawh kumpi kiteelte a laih zongsang gam hi a, Syria gam pen USte bangin a en lah om lo a, thuphuahtawh bawlin kumpi kilaih theihna dingin kumpi langpangte tawsawn uh a, ahih hangin amau geelna bangin piang lo ding hi ci hi. US kumpi in a gammite lungsim laihsak (brainwashed) in a kumpi un a sep khempeuh a man mah sasa uh hi.
Kennedy in US ten Syria ah Islamic ngongtate sum tawh huh in training pia uh ahih manin a gamtatna uh man lo a, million kim khat a sih banah million 7 valin teenna ding nei loin om ta hi ahih manin USte gamtatna pen lungsim leh gamtat hoih om lo (immoral) hi ci hi. Tua banah USte pen buaina tengah a man loin kigolh uh a, a tamzaw pen datsi leh gas a deihna hang uh ahi hi. US in amau zawhthawh/thuzawh (puppet) kumpi Syria ah koih sawm in, Syria pen nisuahna gamte datsi lawng (oil pipeline) dingin zat sawm a, Qatar panin EU ah leisung sumpiangte paisak in, tuate amau sum Dollar tawh uk nuam in, a meette US Treasuries leh US sum nak ah khol sawm uh a, Middle East ki-uk zo leh leitung bup ki-uk zo ding hi cih ngimna nei uh hi.
Syria buaina 2011 in Assad deih lo-a lungphona neite kiphinna hangin hong piang hilo-in Syria pansanin Qatar panin EU ah datsi pai theihna ding lawng khung ding Assad in a phal loh manin hong piang hi ci hi ci-in Robert F Kennedy Jr. in “Syria: Another pipeline War” kici sungah na gelh hi.
Hih pipeline pen Qatar pan Syria ah lutin Saudi, Jordan leh Turkey kizom ding a, Qatar panin Turkey pansanin Europe sunga datsi’ sukbuk khempeuh ah luang lut ding a, 1,5000 Km in sau ding a, $10 billion bei ding hi. Qatar/Turkey pipeline in Persian Gulf sunga Sunni Kingdoms (Sunni Muslim kumpi gamte) natural gas ah thuneihna pia ding a, tua in Qatar leh Qatar gamte lawmhoih US leh USte lawm Arab gamte hamphatna leh meetna pia ding hi.
Hih thu pen Assad in Syria gam pen Shia Muslim gam ahih banah datsi zuak Syria’ lawm Russia adingin supna lianpi hi ding hi cih tel ahih manin nolh in, Iran gam panin Syria leh Lebanon gam-a lut ding “Islamic pipeline” kici a khunsak ciangin Shia Muslim gam Iran in phattuampih in, Europe sumbawlna ah datsi zuak Sunni Qatar leh Sunni gamte adingin supna suak ahih manin Sunni gam ten Assad huat cih takin hua uh hi.
Hih thu hangin Mid-East leh leitung tuamtuamah Iran thahatna a khansak ciangin Sunni gamte heh lua in, US tawh kipawlin Assad thah ding a lem kei leh khet khiat ding bek hong leitang zon uh hi. Assad in a gam mite a humbit nop manin datsi lawng khung ding vai a nolhna hangin Saudi, Qatari, Turkey leh USte hehna hong kuang hi. Bang hangin kumpi khatin a sum bawlpih ding gamte teel theihna leh a leitang humbit theihna ding thuneihna nei lo ding a, kua in dal thei ding hiam ci-in Kennedy in gen hi.
Mi gilo sumbawl gam (Mafia Don) ten a hih theih om sun pen a thuzawh zawh lohpa uh khe tansak ding bek thu om ahih manin US leh a pawl ten gam leh pawl tampi kihelna gal ‘proxy-war’ kici Syria ah hong piangsak uh a, Assad thah ding leh khet khiat theihna ding leitang zon uh hi.
Assad in Qatar pipeline khung ding a nolh phetin US, Saudi leh Israel intelligence ten thukimna khat nei in, Syria gamah Sunnite Assad langpang ding leh lungphona nei dingin tawsawn uh hi ci-in WikiLeaks Secret cables in gen hi. Tua khitin CIA ten Syria kumpi langpangte sum tawh huhna piak ding 2009 in kipan uh a, 2011 in a langtangin leitung bup theih dingin kimu khia pan hi ci-in WikiLeaks in gen hi.
Kum 5000 a gam upa khat (Syria) gam tuamtuamte’ intelligence ten a sim hangun Iran leh Russiate huhna hangin lawhcing zo lo veve hi. 1950′s in zong US President Eisenhower leh Dulles brothers ten datsi a piak nuam loh manin Arab Nationalism pen communism hi ci-in ngawhin na do ngei a, US in Saudi Arabia, Jordan, Iraq leh Lebanon gamte aana tawh a uk kumpite (Jihadist ideologies neite) Soviet Marxism dona dingin galvan tawh huhna na pia hi.
CIA a kiphuan khiat cil 1949 in Syria ah na kigolh pah a, Saudi-Lebanon gam tawh Syria gam kizopna dingin Trans Arabian Pipeline khung ding mipi deihna tawh kiteel president Shukri-al-Kuwaiti a ngen a, a nolh ciangin kumpi lehpei uh a,CIA ten Husni al-Za’im president in koih uh hi. Husni al-Za’im in parliament phiatna ding leh American pipeline kikhungsak theihna dingin hun ngak bek a, nipi kal 14 in president panin kilawnkhia hi.
April 1956 in CIA agent Rocky Stone in $3 million Syrian pounds tawh President Shukri-al-Kuwaiti langpang ding Islamic ngongtatte guai dingin Syria galkapbute zol uh a, galkap ten presidentpa hih thu ko uh ahih manin Syria galkap ten American Embassy sim in Rocky Stone kiman in, thong sungah khum uh hi. Stone thusitna ah kikhel bawl lua ahih manin CIA in Iran kumpi leh Syria kumpi a laihsawmna thu teng pholak a, Syria ulian ten US gum teng manin, gam lehpei ci-in that hi.
Syria gam pen hun sawtpi panin US ten en lah in, a datsi duhna uh, thuneihna/vangliatna deihna uh leh a sum deihna un USte mit bum hai in, US in Syria gam a sim nop den hangin na lawhcing zo ngei lo cih thu mangngilh in Obama in sim leuleu hi. -Your News Wire/ Thang Khan Lian
Comment piaknop aomleh...