A tangcing thu ngaihsutzia ~ Nk Khanno

A tangcing thu ngaihsutzia ~ Nk Khanno

A tangcing ngaihsutna icih in aki thuap ngaihsutna (vertical thinking) le a tumdang/pheipai ngaihsutna (new think/lateral thinking) te akikop aa zat theihna (ahkl) khek kawikawi theihna ahi hi.

1967 kumin De Bono in “A tumdang thu ngaihsutzia (the use of lateral thinking)” cih laibu khat hong bawl khia hi. Tuahun aa kipanin ama ngaihsutna thu te in sumbawlna lam, leitung gamvai lam, nuntak khuasakna le pilna tuamtuamte ah kizel mahmah hi. De Bono ahih leh kum 15 aphak in university kah ta hi. Kum 21 ah doctorate dingin a pilna kicing mahmahta hi. Oxford le Cambridge sanginnpi te panin lukhunelkai 5 bang ngah hi.

A tumdang thu ngaihsutzia icih in ‘Ngaihsutna thak khat ngah na dingin a omsa/ i neihsa ngaihsutna, theihna te pan pusuah khiat theih nading hanciamna ahi hi.” ci hi.

Eite zat det ahi a kithuap ngaihsutna icih pen dum khat a thuk nading in a to suksuk tawh kibang hi. Mundang ah kikhinlo in tua dum bek mah toto lel hi. Kal khat khit kal khat ngaihsun hi.
A tumdang ngaihsutzia ahih leh tua bang hilo hi. Dum khat pan dum khat ah kikhin hi. Thu khat tungah kip tak in ki ngalo hi. Lampi thak le kikhelna zong kawmin ki khin kawikawi hi.” ci’n De Bono in gen hi.

Gentehna (1)

Paupi le Sumtang

Paupi pen kum 5 apha naupang khat ahi hi. Amah pen Austrilia ah a nulepa tawh om hi. Khat vei a lawmte in a khelbawl nop na un sumtang nih tel sak hi. Khat pen a tang gol Austrilia dollar pek 1tang le khat pen a tangneu dollar pek 2 tang ahi hi.

“Paupi, sumtang tegel ah nang koi tel ding? Na deih pen la inla tangsuak o”

Paupi in tua sumtang tegel hong en gige hi. Tua pan in a golzaw pek 1 tang hong tel hi. A nungsang ah a lawmte in zahpih in ciamnuih in gen uhi. Paupi pen ciimlo, teilo ci uhi. A tangneu pen a manphat zawk lam theilo hi ci uhi. A khelbawl nop sim un alawmte in Paupi sumtang tel sak thithe uhi. Paupi in lah a lak ngeisa a tanggol pek 1 tang mah tel den hi. Khat vei a ute khat in mu ahih manin Paupi hong sam in “Paupi aw ka gen hong um o. Sum tang a neuzaw pen a golzaw sangin a zahkhat bang aa manpha zaw ai maw. A gol zaw na tel pen khial teh” ci’n hong genpih hi.

Paupi in zong a upa deihsaknate hoihtak hong ngai hi. Tua khit ciangin

“He himah, ken zong theimah ingh. Ahih hang a manpha zaw a tangneu pen ka theihna bangin a tel hi zenzen leng amaute in hong telsak thithe nawnlo ding uh hiven.” ci in hong dawng hi.
Paupi ngaihsutzia pen tumdang diak hi. Ama ngaihsut zia in a dinmun uh (situation) ki lumlet sak hi. Amau le amau thei akisa a lawmte mihai suaksak hiau hi.

Gentehna (2)
Pata tegel le aalu lei

Khat vei putek khat in thonginn sung aa mat a thuak a tapa kiang ah hi bangin lai hi. “Ka ta aw thonginn sung ah na om zawh ka lungsim thanem mahmah inleh ka kum tam tawh bangmah zong semzo nawn keng. Tun aalu tuh hun hita mahleh i aalu lei kiak le lopa tawh khawhloh in om….”

A tapa’n zong a pa lai a sim khit ciangin lai khat hong at in a pa hong khakkik pah hi. A lai at na sungah “Pa aw, na patau kei in. Lo aa ka phum aksa vuite (bengvui) na zuak inla asem ding mi na cial in…” hong ci hi.
A zingciang in palikte a lo vuah aksavui zongin mun citeng to in thapai uhi. A tawpna ah bangmah mulo ahih man un ciahkik uhi.

Tua zawh a sawt lo in a pa kiang panin lai khat hong tungkik leuleu hi. “…Ka tapa aw, aalu na tuh thei ta ing…” cih ahi hi.
Thonginn sung pan in a lo uh kigal khawh theih lo hi. Mi cial ding cileh zong sum kicing neilo kha ding uhi. Ahizongin a ngaihsutna akhuak a zat theih na in hih buaina khat lemsak leuleu hi. Khat veivei ciangin i ngaihsutzia te suakta tak in daipua lam (out of the box) ah khah khiat ding kisam zel hi.

Gentehna (3)
Daipualam ngaihsutna (Thinking out of the box)

Tuma kum za tampi lai in ah, Italy gam khuaneu khat ah sumbawl khualzin khat sumbawlna ah tuahsia ahih manin khuasung aa sumhau pa tung a lohkik ding sum leibat tampi hong nei hi.
Sumhau pa pen putek, mel hoihlo meigong khat ahi hi. Sumbawl pa tanungak pen hoihsa in pakta hi. A kiciamsa uh ahi sumte lohkik ni ding hong tuntak ciangin sumhau pa in sumbawl pa kiang hibang in thu khat ong gen hi.

“Na tanu tawh nong kiteen sak leh nong leibat teng hong maisak ding. Nong kiteen sak kei aa leh na neihsa teng hong matsak ding” ci hi.

Ahih hangin sumhau pa in khuasung mite theih khat le zahtak khat ahih na tawh hibang a sep ding kilawm kisa lo hi.

Tua hi aa hibang in ngiankawi khat hong ngaihsun hi. “Hih na huansung aa suangpak tangkhat le suangvom tangkhat ka ip sungah koih ning in na tanu in tel hen. A zenzen in suangpak a lak khak leh na leibat teng hong maisak ning. Na tanu zong nangmah tawh om khawm ding hi. Ahih hangin a vom a lakkhak leh kei tawh kiteng ding hi. Sum leibat pen lohkik kullo ding hi. Hih kong cih dan na ut kei aa leh lah na neihsa teng hong matsak ding bek thamlo thonginn hong puak ding hi ingh” ci’n lungsim dik khat bangin hong pau hi.

Hi bang hun ah Sumhau pa cih bangin san ding lo siah a dang lampi omnawn lo hi.

Sumhau pa’n huan sung aa suangtang nih hong tawm in a ipsung ah hong guang hi. Hi mun ah sumhau pa zuautat hi. Sumhau pa in suangtang a vom tangnih a ipsung ah a guan lam nungaknu in mukha citciat hi.

Hui.. himun, hibang hun ah koi cih ding.

(i.) “Suangtang vom tegel lak khia in sumhau pan hong khem sawm” cileh zong kingah ahih hang a leibat uh lohzo tuanlo ding.

(ii.) Suangtang tegel a vom ahih lam thei pipi aa sawk ding” in a pa thonginn taan nading pan hon khia ding ahih hanglah hibang mi tawh kiteng nuamlo zel.

(iii.) “Sawk vetlo ding” ci lelah a tuahkhak uh haksatna pen kiamtuam tuanlo ding le piangtheilo hizel.

Ama mailam nuntakna tawh kisai thu khat ahih manin nakpi tak in hong lung ngai hi. Tua panin Sumhau pa ip sung aa suangtang hong sawk hi. A khut sungah humcip in kawl-tuikhuk sung ah thakhat thu in hong lawnsuk hi.
“Nu! Na heh kei o.” hong ci seisai pong hi.

“Na sawk pen a vom hi ei. Ken thei ingh.” ci’n sumhau pa hong awngkhia hi.

“A vom cih ding hithei pah kei” – Sumbawl pa le a kim a om mihon te in ci ngeingai uhi.

Sumhau pa zong maisia tak in “tua leh khat vei sawk pha kik leh hilo dia” hong ci hi.

Nungaknu in “Sawk phat ding kul sam ken cia. A cian lai suangtang pen enle hang kei sawkkhak pen kithei pah ding hiven” hong ci phei hi.

“Na ipsung aa a cian pen suangpak ahih leh kei sawk pen a vom hi ding. A cian pen a vom ahih leh kei sawk pen a kang hiding hi ven” hong ci lailai hi.

Sumhau pa’n a sumte lah ngahkik lo a lunggulh nungak nu lah ngahlo in a inn ah khutguak tawh hong ciah kik hi.

Hih thu in ahih leh a tumdang/a pheipai ngaihsutna (lateral thinking) ziale dan hong telgen mahmah hi. Nungaknu ngaihsutna in a pa’ haksatna, buaina pan honkhia zo bek thamlo amah zong suakta zo cih imu ding hi. A tumdang in a ngaihsun den mi khat in hi dan ngaihsutnate nei thei zel hi. Hih a tumdang ngaihsut dan neih theih nading in kisin ding kisam hi. Mite kivak ngaihsutna ahi a kithuap thu ngaihsutzia (vertical thinking) pen thupilo hi cih na hipah lo aa hidan a tumdang ngaihsutzia zong om hi cihnopna hi zaw hi.

Edward De Bono in khuak i ngaihsutzia, ngaihsutdan ah namnih na khenlai hi. Zomi ten kha mit icih/ lungsim theihna (perception) le theihna te a paizia (processing) te ahi hi. Hi tegel pen ki helh diamdiam/ki kan zingzeng hi. Tua hi aa mihing’ khuak pen computer tawh kibang lo hi.

Gentehna (1) aa Paupi thu en kik ding hileng, Computer khat hileh Paupi bangin ngaihsun het lo ding hi. Dollar pek 2 tang pen mah tel ding hi.
Tua hi aa hih Edward De Bono thu ngaihsutna ah lungsim theihna le theihna piazia (perception and processing) kikal aa aom kilamdanna pen a bulpi ahi hi.

Khat veivei ciangin ei mihing te in i khuak ngaihsuhzawh na pen i ciangtan thei hi. Dai kikai huang suk ciang bek ah ikhuak nasep na i neusek suk hi. Tua in i khuak pen computer khat hih theih nading a hanciam tawh kibang hi. Hih in bang hang hiam ci’n i ngaihsut tak ciangin eite pen a man/ahi bek i ut man ahi hi. Khialh ding i lau man ahizaw hi. A zenzen tuni aa man hi, khial hi nacih thute in a khial thei thute vive mah ahi lel hi. Hih thu te in kum, kha, ni kici hun hawlpi hong nawk khak ciangin damdam in hong ki hei thei hi.

Gtn. Tuma kum zalom 14 lai in Leitung in Ni kimkot hi cih thu athei le a genkhia Nicolas Copernicus pen zuau thu gen ci’n sih dan kipia hi. Ahi zongin tuhun ah Leitung in Ni kimkoh lo hi ci leng miten ahai aa hong kithei ding cih ahi hi.

Tua hi aa buaina, haksatna khat peuh ah dawnna (solution) khat bek hi thei denlo hi. Khuak ngaihsutna zaisak in, khahkhia leng buaina alem sak ngaihsutna te zong kingah thei hi cih ahi hi. Tua hi aa dai pua lam ah suakta tak le zai tak in ngaihsutzia khantoh nading hahkat ni.

(Pasian in leitung uk dingin mihing hong bawl ahi aa, mihing khuak in leitung ah seplah neilo hi. Hi khuak nasem dante ahih le a kikhel den leitung thu te ah kinga aa kong gelhkhiat ahi zaw hi.)

Lai-at; Nk Khanno

Ref; Lateral thinking by De Bono
Lateral thinking le khuak zalen na by Lutlat Eing (Kawllai)
Inspirational Short Story