A Pa’ hun $20 tawh alei numeino

A Pa’ hun $20 tawh alei numeino

Hun khat lai-in nupa kopkhat in tanu meino khat nei uh a, a pa in company khat ah nasem in lup hun lo buang inn ah tam om ngeilo hi. A zi leh a tanu tawh a kikholh khop hun uh tawm mahmah ahih manin a tanu in a pa ompihna kikholh pihna cihte lunggulh mahmah hi. A lawm a gualte ahih leh a nu leh pa tawh vakkhawm hialhial, kimawlna paakhuan (park) khawng ah paikhawm a muh ciang eng mahmah hi.

Nikhat, a pa kiangah Pa aw nang na nasepna-ah naikhat bangzah ngah na hi hiam ci-in hong donga, a pa in naikhat $20 ngah ing ci-in dawngkik hi. Tua ni-a kipan amah zong sum khol hong kipanin, inn kiim inn kiang khawngah mi’ sum tang kiatsak nengneng peuh kai khawm in, tua leh a nu leh a paten moh man dingin pek khat pek nih a piakte uh hong khol thiamthiam a, nitak a lup ding ciangin tua a sum muh sunsun te gawm khawm in hong sim zel hi.

Ni tampitak tua danin hong kaihkhop khit ciangin $20 hong cing ta ahih manin, a zingsang thawh ding bang ngaklah lua kisa-in zan bang ihmu theilo liang hi.

Zingsang a thawh phetin a pa’ kiangah tai pah vingveng a, “pa aw, na nasepna-ah naikhat $20 ngah na hih leh ken tuni na hun naikhat $20 tawh kong lei ding hi, na hun hong kileisak in la, kei tawh hong kimawl khawm in kei tawh hunnuam hong zangh khawm in,” ci-in agen tak ciangin a pa lungsim sukha lua mahmah ahih manin a pa in zong a tanu ngawngkawi in hong kapziahziah hi.

Tua ni-a kipanin a pa in a zi leh a tanu ading hun hong khenin a tanu in a eng mahmah a lawm a gualte mah bangin a innkuan un vakkhawm kimawlkhawm in hun nuam hong zangh khawm liailiai thei ta uh hi.

Hih taangthu tungtawnin pate’n i ngaihsut ding thu pawlkhat om hi. Pate pen inn sung lutang ihih mah bangin innkuan adingin i sep/bawl loh phamawh, i hahkat loh hong phamawh ahih manin pate’ dinmun zong bel baih hetlo hi. I nasep a tuam, i innkuan (zi leh ta) leh a langlang i huh/et nopna tawh hong hilai mawk ahih manin i vangik mahmah hi.

Ahi zongin nasep hanciam lua hahkat lua lianga i tate hun ipiak zawh vetloh zong na hoih hetlo zel hi. Pate in zi leh tate tawh hun nuam zat khop ding lem gige napi-in zi leh tate hun nuam i zatpih kei leh ei pate’ khialhna mah hong hizel ding hi.

I tate pen a neulai un nu leh pa tawh hun tampipi laak khop ding lunggulh uh a, nu leh pate mah tawh kikhawlkhawl nuam uh hi. Tawm hong gol khin le uh nu leh pa tawh kikholh ding khawng a neu lai zahun hong lunngulh nawn khollo thei ding uh ahih manin ei tawh a kikholh nop lai un hun nuam zatpih zel ni a ci nuam ihi hi.

Tate a neu lai un hun nuam zatkhoppih ngei mello a, i koihcip mawk leh ei tawh omkhop kikholhkhop sese loh hang phamawh hongsak nawnloh hun uh hong tung dinga tua hun ciangin ei nu leh pate mahin khasia-in i khitui hongluang ding hi.

Hibang i ki gen ciangin, nasep khawl lawh liang, nasep kipelh liang leh vai khatpeuh kipelh liangin tate tawh kikhawl ni, hun la khawm ni, aci ihi kei-a, i buai kawmkawm, i manlah kawmkawm mahin tate ading hun khen dan siam ni, cih a kigen/phawksak nuam ihizaw hi.(Kei zong ka kisinsin thukhat hi). Laisim mimal kim tungah lungdam. Ngaihsutna kiukhat pan, Khazih sungah, David Tuang