A kizangthei mi suahsawm in

A kizangthei mi suahsawm in

Mipil, misiam leh makai i cihte pen a kizangthei mite a hihi. Innkuan sung, vengsung, pawlpi sung, khuasung leh minam sungah a kizangthei mi hih ding kisam hi. A kizangthei mi i suah nadingin pilna i zon ding kisam hi. Ki tat kul hi.

Pilna tam a zong zo te ki zangthei semsem hi. A kitathiam zolo te in bunzolo hi. Mihonpi bunzolo hi. Vai hawmna te ah a thulutzolo hi.

Pilna a zongkhempeuh ki zangtheilo leuleu se hi. Pilna pen i zat ding vanzatkhat hilel hi. Vanzat a zangding mi omkeileh vanzathoihte a mawkna hilel hi.

Inn sungah computer khat om napi a zangthei mi omkeileh a mawkna hi. Tua computer sangin a kizangthei naneuno khat thupi zaw hi.

Tua hiaa tuni in mithupi na ut leh a kizangthei mi suah ding hanciam in. Na omna pan in a hithei zahzah ciangtawh mite a’ding nasem in.

Na kizatnopna mun a’dingin a kituak kitatna leh ki bawlphatna phungam in. Kipia ngam in. Bawlphatna leh suihna tam thuakzo semsem lecin na manphatna a khangto semsem hipah hi. A sangpi na tunnopleh tua dingin ki piakhia ngam in.

Gilkial dangtak, neuetna, zahpihna, sikcilna zongh hong om masa thei hi. Tuapen a hithei thumah a hihi. Tua mun mah ah citaktak in, kaplo, lungkialo, nungkiklo in na omzawh leh a manpha mi, a kizahtak mi, thupi a kisa mi leh nasiatak aa a kizangthei mi na suak ding hi.

Mite muhna ah na manphatna khangsak in. Mite tawh kikhen in leitungah na nungta thei tuankei ding hi. Hihpen mite muhna ah na manphatna na khansak nading thute a hihi. Siamsim Library