Pa Sian Za Lal (Zogam Lal Pu) phawkna/ khakna ~ Zen Lian
Kaneu lai, Sunday zingsang khat kikhawm ding ka tungbaih pian hi.
Lawibual lam pan Tangval pawl khat in Electric guitar, bawltawm amp & soundbox leh Battery hong khai in Biakinn sung hong lut diam2 uh hi.
Pasian minphatna hong nei uh in, nuam kisa mah2 hi. A sawtlo in, Pawlpi hong zom uh hi. Tua hun aa ki pan a mau Ubau tawh khat leh khat ki it in, tanau bang in kinei in, hunnuam tampi ki zang khawm hi.
A Pa, Pu Thang Khen, biakna lam theihna madawk in, upna kician leh Dinmun kip a len mi khat na hi hi. Pu Thang Khen sungsuak atate teng in Pasian sung nuamsa in thahat uh hi.
Sia Lal Pu in, khutsiam mah mah khat hi in, Hun khat lai in Tedim myomah veng ah, Agape puankhui sai khat tawh sumzon hong kipan masa hi. Khutsiam mah mah khat a hihna tawh, a innka lui Dolpeek pi guitar in sui in, a khut tawh coil te vial tawm in, electric guitar suah hi. Tua hun lai in a kua mah peuh in bangmah kineilo pha diak hun a hih tawh, Radio pen amp & specker ding in ki zang hi.
Aman bel Amp bawltawm in, Specker a tuam in bawl hi. Ka tumcil electric guitar pen A ma bawltawm Guitar, Amp& specker te na hi gige hi. A Unau teng leh a lawm leh a gual te tawh ko inn ah lakhum in, tua a lakhum te a mau phuah tawm vive na hi hi.
Tua khit laphuak lam hong hanciam in, Ebenezer Series tawh kpan khia hi. Lynn studio ah ki khum in, Symphony Band( pre IC) in zem in,Kei bang a Music khumsungteng a kisam bang bang panpih ding in zanhak in ka om hi. La hoih no no tamsim mah phuak khia hi. Laphuahte hoih kisa in, Zogam sung ah mitheih mahmah khat hong suak hi.
Ki khangual hetlo napi in, ki maingap in khangual khat bang in ka ki phin phin uh hi. A ma lasak lak ah a min thang pen bang a hih leh, ” Min Thang Kei Mawk Ni” hi kha in um ing. A man a mukha theilai hi leh nui ngek ngek in teh) Heh thei ngiatlo in, a tup na khat hoih ihsak pih loh hang a khawl peuhmahlo pawl na hi hi.Zomi sung ah milamdang khat in ka ngaihsutkhat zong na hi hi
Yangon pan Tedim ka ciah ciang in na nuam mah mah aa, ka tum ding Guitar, Effect leh amp hong inn puak in, a tawntung aa ka practice ding hong deihsak mah mah hi. Guitar uk mah mah mite bek in thei kha in cin, Guitar uk pen, sum leh paai in hong gal bawl bang liang in, baih hetlo hi. Sia Lal Pu in zong nakpi mah in phulkha mah mah hi. Topa in om pih in Yangon khua ah teng in, a tapa Man San bang in MBBS hong zo in ka angtang pih mah mah hi.
Tu in a hih leh,Vantunggam Topa angsung ah om in tawlnga ta hi. Tua vantunggam zong a nuntaklai a theihkhit,gam mah hi in Leitung haksat lungkhamna te hong theihkhak pih nawnlo hi.
A innkuan pih U Lam Cing, Suah pih U & Nau, Tu & Ta te aw, A nuntak sung aa , ki thuah na leh ki-it na te ngaihsun leng, lungzuan huai demdam mah mah hi ta leh Topa hongkep na tawh hizah ciang kithuah kha cih ka tel to to ciang, Topa in hongkembit taktak lam ka phawk aa, a kizom suak Topa hong itna leh hong kepna te in na khitui hong nul siang zo ding lametna ka nei hi. Hih lai tomno tawh Pa. Sian Za Lal ( Zogam Lal Pu ) mangpha khakna in a nei hi ning. Hong it, ZenLian !!!!
Comment piaknop aomleh...