A kiciamteh kammal

A kiciamteh kammal

Laisiangtho in kammal vangliatna hoihtak in hong hilhcian mahmah hi. Topa Zeisu mahmah in ‘leilehvan a mangthangzongin ka kammal mangthanglo ding hi’ ci hi. Luke 21: 33. A cihnnop na ah: akimuthei, et lawmtak leh lamdangtak in ka bawlsa nate kisia theiding aa ahizongin akimutheilo (a piangsakpa) kammal kisia thei nawnlo, ki phiatthei nawnlo ding a ci a hihi. 1 Peter 1:25 sungah ‘the word of the Lord stands forever’, ‘Topa thu (kammal) ahihleh kiptawntunghi’ ci in kingelh hi.

A mahpen Pasian ahihmanin a kammal akisiatheilo hi i ci nuam khatheiding hi. Mihingte kammal pen Pasian kammal mahbangin a tawntung dongin kiciamteh a hihlam Matt 12:36 sungah i muthei hi. ‘Thukhenni ciangin mi khempeuh in phattuamna a omlo a kampauna te uh khempeuh bangin thusitna a thuakding uh hi’ ci hi.

Banghun, bangni, kumbangzah i phak aa i ngen cih om tuanlo hi. Kua tungah i ngen, i hehlaitak, i lungdam laitak aa i pau mawcih om tuansese lo aa ih kampau bangbang in na ci ziau hi. Tua ahihmanin i ngensa ih kammal khempeuh a vekin a tawntung a’dingin kiciamteh hi cih i theihtel ding thupi mahmah hi.

‘Na kammal hangin na suakta dingaa na kammal hangin mawhsak thukhenna na tuakding hi’. Matt 12:37 sungah ci hi. Hihmun i simtak ciangin ih kampan aa a pusuak kammal te in ih maiah hong ngak gige ahihlam i muthei hi. Ih kammal bangin at kik tektek ding cihthu teltak in i thei hi.

Tua ahihmanin i hauhnopleh hauhna kammal, i ci a damnopleh damna kammal, i suahtaknop leh suahtakna kammal, i pilnopleh pilna kammal, i ngualzawhnopleh ngualzawhna kammal i zat ding pen Pasian dan ahihi.

Na ut bang pulak inla piangin. Tuapen mikhempeuh in a septheih dingaa Pasian ii hongpiak vangliatna ahihi. Pasian hong ompihna a hihi. Siamsin Library