A ki-dophuai “a lua”

A ki-dophuai “a lua”

Khatvei vei ka ngaihsun khazel hi. Banghang-in, a ki-it mahmah tektek, a ki-itlo tawh kibang den mawk hi ding? Mimal ngaihsutna pawlkhat hong gualsuk ding hileng, kam kinial nuam zonglah tampi om ding aa maw ci zel ingh.

Pilna nei te’n a pilna mah suang aa, hong nialthei ding; thutheih a hau te’n, a thutheihna uh mah suang aa, hong nialthei ding; i neih bangbang suang ciat aa, ki nial ngeingai thei ding hinapi-in, bangbang hita leh ci-in, mimal ngaihsutna te ka gelhsuk kha veve hi.

Innkuan sung, u sung nau sung, khua sung, biakna sung, beh le phung sung, ki-pawlna tuantuam sungah, a thupipen pen ITNA ahi hi. Itna in, maisak zo aa, itna in, siangsak zo hi. Itna bekmah in hong itsak zo hi. Tua itna mah a langkai tak aa, hong om tak ciangin, It Luatna, hong piangto hi.

Tua it luatna in, a dang khat it zawhlo’na hong kipansak nahi gige hi. Tua it luatna in, ki-puahphat nading a kitangsam thanemna tuamtuam-te hong musak lo hi. Tuatak ciangin, tua it luatna mah in, guptuam nopna hong neisak ta hi. Guptuam i neih tak ciangin, paihtuam zong a nei i hipah ta hi.

Innkuan sung, u sung nau sung, biakna sung, beh le phung sung, ki-pawlna tuamtuam sungah, ”it luatna” limlim hong om tak ciangin, guptuam zong kinei tamai aa, guptuam i neih tak ciangin, paihtuam zong a om ahi tamai hi.

I neihkhop, i neih i lam i gamh -te…
I zuunkhop, i khua i tui, i minam -te….
I upkhop, i zuih i upna I biakna -te….
I kibatpih, i mel i puang, i sisan -te……
I sepkhop, i minam nasepna tuamtuam-te…..

“Ko” i kicih theih nading “Kei” tawh i kipan aa, “Kei” tampi i gawmkhop ciang; “ Ko” hong piantheih mah bangin, “Ei” cih zong a piangthei veve hi. “Ko vs No” cihte hatsak lo zawin, “Ko + No” = “Ei” cihte i hatsak zawh nading, i ki “ It Luatna” ah “A lua” i kidop ding pelmawh hong kitangsam kha ding hi.

I itluat manin, aituam ngaihsut khathei hang aa, ei aa bekmah langkai takin, i it khialthei hi. Ei aa bekmah a dik i sa khakhial thei hi. I neihkhop, i zuunkhop, i upkhop, i sepkhop, i kibatpih tuamtuam-te ki-phawk kha nawnlo in, no le ko ci-in i tonkhop theihlo’na-te, i ki-langneih khakna’te, i ki-muhdah man nahi lo’in, i ki it luat man nahi zaw hi.

Tua ahih leh, “A Lua” limlim kidawm-in ki itsawm leng, guptuam nopna hong nungta zo kei-in, paihtuam nopna hong nosuah kei nakleh, “No le Ko” kikal vai tuamtuam-te, itna in hong maisak zo ding aa, itna in hong siangsak zo in, itna tawh a kilam, a ki lungdampih thei, a ki tawsawn thei, a ki it taktak innkuan, pawlpi, minam-te i hi pelmawh ding hi. Itna tawh, LTP