A khangto hun kilaih sungah makai te kisap panmun lakzia ~ Pau Do Lian

A khangto hun kilaih sungah makai te kisap panmun lakzia ~ Pau Do Lian

Hih ih leitung khuasak na ah, Technology bek akhang to hilo in, ih Pawlpisung ihnasep kipawlna sung (organization) leh ih innsung te ahzong genzawh lohphialding in khantoh na omhi.

Tua hi a, khantoh ding lunggulh natawh ahoihzaw a alaih theite akhangto hi a, laihding ngaihsunsun in hunbei toto ahih man in pawlpisung, kipawlna (organization) sung te ah khantoh ding zah in khangto lo hi. Tua pen kua mawhpuak hi a, kuateng pangkhawm in sem ding hiam cih thupi leh lunglut huai kasa mahmah hi.

Maikai ihcih te kua

A mau naseptawh kisai in makai siam na atuamtuam in kigen theihi. Himah leh mipilten’ makaisiam acihte uhpen agelsiam (good planner) hi ci uhi. Siam natawh lawh cin na pen kam’ phat (luck) natawh akingah hi zenzen hilo a siam na i gah hizawhi cileng atamzaw in dikding hi.

Ei khangno te ih Nu ih Pa ten’ naliat ciang bang nasem nuam a? hong dawt ciang ih khua, ih pawlpi, ih minam etc makai ding ut ing cih atam zawte dawn nahi. Sangsung ah siate aizong in, siaten’ sangnau pangte kiang ah sangmanle cin bangsem nuam cih dawt na a om leh makai uting cih tam kiza pen hi. Hi lua hi. Makai cihpen Pawlpi sung aizong, kipawlna (organization) sung aizong a zalian pente bek makai hilo in, bangbang ihsem zong in genteh na: innphiat nasep ahi zong in citak mahmah in paubang het lo a nasep natawh min hongpakta in bektham lo, midang ten’ nangsep hoihsa ahih man in, nangsep bang a asep uhpen makaih kipat na hipah hi. Lunglut huai kasak khat ah ka nasep na a’ manager pa pen coordinator angah nading in ama, i management siam nabek evaluation bawllo in leadership asiam hiam cih naktak in en zaw uhhi.Pawlkhat leuleu ten’ makaicih pen nungzui a nei mite hi, nungzui neilo mikhat makai kicithei loding hi zong aci om hi.

Khantoh na leh hun kilaih zia

Telephone mukhia pa Alexander Graham Bill leh Antonio Meucci (1876) ten phone amuhcil lai uhleh, tuma 1947 kimpawl khawng in akizang landline phone te ih etciang in nakpitak in tu a ihzat iphone tebang tawh kilamdang mahmah hi. Tun’ tulai iphone te leh tua lai a phone te a kilamdan’zia ih muh tek mah bang in, vanzat dangdang te zong tua bang mah in nakpi tak in khangto hi.

Khangto (develop) cihciang in amal atam (quantity) aliat na (size) te tawh kiteh hi lo in azat nopzia, athahatzia leh amanphat nate tawh kiteh zaw hi.

Internet akizat ma in US leh Kawlgam lai ihkhak nop ciang in ni sawmleh ninga bang sawt hi. Tun’ ahih leh email tawh minute khatsung in kingah thei, bek tham lo in VZO, Skype tetawh maitang kimu in kiho thei ta hi.

Tua lai-ip tawh ihkhak kha lang bang asawt leh minute khat sung a ihkhak theih email sung a ihgen thute i thupitzia akibang hilel a, lai-ip tawh itun’hang athupi hituan lohi. Tu hunciang in electronic signature ki sangta in US leh gamkhangto te ah online application tawh sang ki apply thei ta hi. Laidal beilo, manlangzaw leh lamkal ah mangthang cih om lo lai in lem mahmah hi.

Genteh theiding tampi om lai mah leh, atung atawm ih gente en kawm leng, khua hun (khausak zia) khantoh tawh kizui in ih nasep makaih zia, pawlpisung, kumpinasep na, leh organization tuamtuam te ah zong nasep zia tampi tak in khang to hi.

Pawlpisung khantoh nading bangkisam

Amasa in pawlpisung khantoh nading abulpi pen Pasian KhaSiangTho a ten na leh a ma mizat te om na hi hamtang ding hi. Pasian in ama limleh melsun a hongbawl mah bang in siam/hihtheih na pawlkhat zong hongpia hi. Roman 12:6-8 a tuamtuam siam na hongpia a, ei ading in gelna hoih (good plan) zong ka nei ci hi Jeremiah 29:11.
Ahih hang ihkhantoh ding zah a bang hang a khangto lo ihidiam?

Ih muhna toilua

Atangpi in ei Kawlgam sung a om thu-um mileh Pasian nasem ten’ (keimahmah zong) milimbia Buddhist tekhawng tawh kinak thuah leng ih up na asia sak zah ding bang in kingah sun hi. Biak nadang cihtha dah, Christian vive hinapin’ pawlpidang te nangawn ahopih nuam lo khawng ki om lai hi.

Ih theih na kicinglo

Makai siamten azat uh dan(technique) pen zatui (medicine) zatdan tawh kibang hi. Cidam lo khatpen anak natheilo pi in zatuipia mawk leng, kisia zawtham ding hi. Anat na tel dikdek phot in tua khit teh akituah pihding zatui piakding hipan hi. Ei (keimahmah akipan) pawlpi makai tebel anat na ihtheih ma a, zatuipiak sawmpahpah ihih man in, ihpawlpi adam’ cih thadah natbeh zaw thei hi. Nungkum (2011) sung in Loikaw ah ka omlai tak in, eimi azalian simkhat acidam phalo in clinic ah apaileh sayama nu malaria sa in zatui apiak leh allergic ahihman in anuntak na hong beilawh hi. Pasian in agel sa zong hisam ding hi, hi mahleh mihing mitmuhna pan in allergic tawh hongsihciang in ahun nailo pi asi aitam peuh kici nuam hi. Bangleh bangleh, ihtheih loh man a ithuak tampi tak zong omveve hi. Kawlte paunak khat ah ih neihloh sang in ihtheih loh haksa zaw hi uhi.

Ih theihloh na ah makaih zai

Robert E. Quinn in Deep Change cih laibu sung ah “walking naked into the land of uncertainty” cih hi “itelloh na mun ah bangmah neilopi a pai” hong huhding omlo, ih muanding omloh na mun a guaktang apai te cin, makai te min navawh hi. A ngei angei den keei pawlpi, kipawlna leh ei mau nisim nuntak na mahmah hita leh, tuabang a angeibang dente khangto kici ngeilo hi. Paul in Colossians 2:6-7 nasung ah thu ummite khan toh na ding level atuamtuam in nagen hi. Tua ahihleh nang (makaipa) leh kei in ihmakaihzia ding thei nawn lo in ihpawlpi mi maw ih nung hongzuiten zong atheih nawn lociang bang cih ding? Buai na hong omciang in hih anuai abang in Ronald Heifetz in na bawlhi.

Hih atung a ihgen nop bulpipen in, buaina khatpeuh pawlsung hitaleh, khuasung hitaleh, organization sung hitaleh aleptuah dan namthum in nakhen hi. Buaina pawlkhat pen aleptuah nang kitheilua zenhi, buaina pawlkhat pen itheih naleh, ih omna muntawh kituak a ihzuihding pawlkhat oma, khatleuleu pen aleptuah nading theihlo ihihman in makaite leh ihnungzui or ihlawmnaseppite tawh pankhop aleptuah ding kisam hi.

Mi/organization/company dangte bangcizawhding

Pawlpisung, khuasung, organization leh company tuamtuam te kidemziahziah hi. Kidem na ahoih om in ahoihlo zong om a, hihsung ah ahoih te ihgending hi. Khuakhatsung a AG ten’ biak innhoih honglam leh Tuiphumte zong lamding in hanciam pah hi hipen khantoh na hi a hoih mahmah. Ahih hang organization leh company te kidem dan pen kibang lodeuh in amau ilunggulh pen, ko nasep kuan deuhpending kua in costumer tam ngah pending cih bang in market kidem bawl uhi.

Tulaitak leitung ah company brand amanpha pen Apple hi in $96 billion man hi. Coca Cola $ 95 billion pen nungkum ciangciang akhat na hina pin Apple in makhelhto ziau hi.

Apple company i thusim khatpen Blue Ocean strategy by W. Chan Kim gelh azat man uhi. Campany atamzaw inpen Blue Ocean leh Red Ocean teltaktak lo in Red Ocean strategy tamzat zaw uhi. Blue Ocean strategy gelhpa i, angim nalian pipen bang hiam cih leh, azenzen in campany maw, organization maw makai khat/anei khat na hihleh adang te sang in nalawh cinzawk nading in, demnawnlo ding hiteh cih mawk hi. “If you want to win the market place stop competing” Blue Ocean i ngim na pen, ihmuh natan bek paisawm loding ihmuhloh hang lawhcinmasang paiteiteiding aci hi. Red Ocean bel asan’(red) a ihmuhzelzal natantan pailelding cih hi.

Biakna pawlpisung enleuleu leng, Leitung apawlpilian pen Yoido Full Gospel Church, Pastor David Yonggi Cho S. Korea in 2007 report kipiak na ah 830000 kikhawm in kampau nam 16 in kilet hi. Pasian in asapcil in ama ngimna pen vak kawikawiding in lungdam na thu mitung agending cih hi, ahihhang athunget na tungtawn in Pasian in mimalkhat ta a thugensang in genkhat in mitultampi mai ahgen leh lawhcingzawding acihciang in tua strategy tawh alawhcing hi, cileng kikhiallo dinghi. Yonggi Cho muhna pen mitekiang ah vapaiding hi a, miten amah azuatding pen piangtheilo hi. Ahih hang nakhempeuh i bulpi Pasian tawh kithei a, Pasian in tua strategy zong nahilh pah hi.

Ei Kawlgam munkhat te ah, pastor, evangelist pawlkhatten, Christian thu-um samite kiang ah pai in amaupawlpisuah nading in vagenpihpih hi. Hihpen Red Ocean strategy hi a, tu eikhang huntawhkizui in lawhcing taktak zolo dinghi. Thu-um naivetlo tekiang ah pai ngam in alawhcingte pen midang te’ pai ngamloh na ah pai ahihman in, khatvei paikhinpeuhleh pai ngam toto ding a zong lawh cing toto lelding hi. Ei zomite abeisa 1990 kumlaikhawng in Tedim leh Tonsim kikal ah vakzuak hoihlai tak in, khat in apuak nakleh midangte zong pua ngeingai ei zomi te dan hi.

Jeffrey Pau Do Lian
Religious Pluralism Studies
Harvard University/Andover Newton Join Program