A etteh huai USA gamsung mite khantohzia: Education, Social, Politics

A etteh huai USA gamsung mite khantohzia: Education, Social, Politics

Leitung ah gam leh minam tampi om a, a hizongin gamsung kipuakzia (political functioning) leh minam ngeina (cultures) kibangkim lo hi. Gam leh minam ngeina a kibatloh mah bangin, gamsung thukhamte (laws) kibanglo pah hi. Tuabang kawmkaal ah U.S.A gam pen minamkim leh ngeina namkim kigawm a, gamsung kipuakna gam (unity in diversity) a hihi.

Hihbang minam tuamtaum leh ngeina tuamtuam ki helzau hinapi gamsung kipuakzia ah buaina om hetlo in khangto mahmah uh a, koicibang in hih a kibanglo minam kim bulomteng nasemkhawm thei in khangto thei uh hiam cih keituahkhak leh sang inn sung ah kasinkhak teng pawlkhat kong hawmsawn nuam hi.

Laisimna sang khan sung paizia (class policies)

College ah sang kakah takciangin, class rules and policies ong ki sim masa sak hi. Tua sangkhan sung thukhun ah:

1. A kibanglo biakna lam tawhkisai upna thute khat leh khat kigen-na leh kingialna te nei loding.

2. I deihna a kibanglo gamvai (political opinions) te tawh sang khansung ah kikupna leh kingialna neitheilo ding.

3. A kibanglo ngeina te leh silh leh teen tetawh ki kum kingial loding.

4. A diakdiak in Thukham sin-na khan (law classes) sung ah debate leh discussion akibawl bawlciangin, kingialna tampi omthei him-mah leh tuathu te hangin a pualam i tunteh ki pehsak nawnlo ding.

5. I deihna leh i muhna a kibanglo te ah khat leh khat i muhnatek ki thupisim sakin ki elna leh ki muhdahna in la lo ding, Cihbang sangkhan thukhun kikoih a, tuabangmah ki zui in kigamta hi.

Immigration law kasin lai in, border protection and immigration issues te vai nakpitakin debate leh discussion kinei a, sang khansung ah khat leh khat kikawk ziahziahin ka ki ngial ziahziah uh hi. A sauveilam pian ciangin mi vom leh mi kang vai in ki kawkna lianpi ongpiang hi. Hihbangciang a tun theihnadingpen ka law instructor pa’ dotna in ong sosuah hi a, a mahbel ka ki sel ngeingai nateng uh ngai lel in khansung a kiu munkhat ah nui hiu-hiau sa in tu a, thukhen mangte (judges) bangin langkhat leh langkhat dotna ong bawl kawikawi lel hi.

Apualam ah a kizalo bek hi in, sangkhan sung ah maitang san veva in ka kiseel ziahziah uh a, adiakdiak in mivom numei khat leh mikang pasal khat ong taksuah mawkin tawlpuak liangin minamvai ong kisel ziahziah uh hi. Hihbang minamvai kitaksuahna ka muhteh kalungsim ah, sangkhan pualam ahbel hihtegeel muhnop kha ngel kikdingin ka lamen mahmah hi. Sangkhan period ongbei a, kavekpi un kapusuak uh hi. Kalungsim bangin hih aki taksuah mi tegeel en simsim kawmin kapusuak hi.

Tua mikangpa’n mivom nu ong naih in ataklamkhut ong pia in tua mivom numei nu bansahin,” sangkhansung i kiselna te class debate bek ahimaw,hehna leh lungkimlohna in laken maw,” ci-in ong hopih hi. Mivom numei nu zong ong nuikhia lualua in,” American immigration issues vai a hoihdingi ideihluat man a, i muhnatek a siksan leh a hoihding ideih luatmanin i lungsim takpitawh a ki dawngdawng kha hi hang, kei kam-mal leh nang kam-mal te mang-ngilh khin ta ing,” ci in ong ki kawi (hug) uh hi.

Hihbang te kamuhteh, a khangto gam a teng mite’n a mun leh a huzui in thupikhualna nei uh hi cih ka mu hi. Thamloin, akhangtogam a mite’n thukhun neu penpen na ngawn zahtaak leh thusim in zui sitset uh hi cizong kamuthuah lai hi.

Sangkhan sung ah mi namkim leh biakna namkim ki helzau in lai kasin uh a, gam 18 pan a USA a tung kahitek uh hi. Sang naupang pawlkhat pe’n gamdang pan aa laisin ong paite (international students) a hi uh hi. Class activities leh research kabawl ciangun small group in kikhen in kakidem uh a, a hizongin kaki thuahna khempeuh uh ah buaina om hetlo in gualzawhna ka ngah uh hi. Hih tawh akibang family law, business law, criminal law, civil law etc…cihte ah debate leh kiselna bekbek tawh hun kabei uh a, ahizongin sang pualam ah kua mahmah a ki satsuah kik kuamah om het lo hi. Hibang te hangin, i kibatlohna te ah ki siksan leh ki dembawl keipeuhleng i vekpi in nasepna leh kalsuan-na khat peuhpeuh ah gualzawhna ki ngah thei veve hi cih ka mu khia hi.

Mi namkim tawh kikholhna (social net working)

U.S.A gam ah a tualtel khin sa teleh a tualsuak lamte tawh kikholh pen ei gamdang pan a peemthak te tawh i nunzia leh i lungsim puakzia kibang hetlo hi.

A diakdiak in, ei Zomi te thum leh li i omkhopnaak leh thu dangdang sangin a kibanglo i muhna, biakna, ngeina, leh gamvai te ah a ki phin nuam phadiak te i hihi. Ei ii muhnatek ultungsak lua i hihmanin, ei tawh a kibanglo te’n ei muhna khat a santheih masiah a hahgen nuam vilvel nuam hamtang minam te i hihi.

USA gam a tualsuak te leh gamsung nuntaak natawh a khangto sate’n mite tawh a kithuah ciangun gending leh genlohding khen uh a, khat leh khat ki selna leh ki totna a piangsak thei thu te (controversial) leh la te mi namdang tawh a kithuahna uh a zang vetvet lo uh hi. “Unwritten rules” cih khat nei uh a, thukham sung ah a kigialh lo biakna vai, ngeina vai, leh gamvai (politics) tepen apualam mite tawh kithuahna ah gen ngeilo uh hi. Midangkhatin a kup-pih phial lehzong hoihtak ngaihsak uh a, a hizongin kup-pih lo lel in “it’s good” ci lel uh hi.

Ka nasepna ah ka leader pa mai ngap mahmah kahihciangin kum 2017 a ding koi party vote nape diam? Kacih leh “ I don’t know” ong cilel in,a ban ong zop-pih het lo hi. Ka super visor pa zong ki mangap mahmah leh thu tuamtuam kikum thei mahmah in, kua vote piading kacih ciangin ong kup-pih ding lawp tuan hetlo hi.

Pawlpi sung nasep-pih mikang mivom tampi tawh ka kikhawlh zawh kum nga bang vaal ta a, tuni dong minam vai leh politics vai kikupna om ngei hetlo hi. Thamlo in,World Relief refugee resettlement agency ah volunteer ka sem a, mikang leh mi namkim social worker tetawh ka kithuah uh hi. Hihbang mite tawhzong biakna, ngeina leh gamvai te gen in zong ka neikei uh a, a dang thu tampi ka ki kumkum lel uh hi.Hihbang nunzia te ka lung ngaih kik-kik teh ka sangkahna class rules tetawh a gamtat te uh kituak kasa a, mite’n rules sung ah om takei leh buaina a piangsakthei thu leh la te apualam nuntaakna ahzong zanglo hi cih ka mu thak kik hi.

I kibatlohna tampi om phial mah ta leh, tuate siksanin ki nawtnawt kei peuhleng ngimna leh geelna tuamtuam te ah kithuah khawmin gualzawhna kingahthei lua mahmah hi cih ka telsemsem hi. USA gam mi piciang sate’n hihbang kalsuan nate ah kikepsiam a hihman un minamkim leh pau namkim a hih hangun khantohna lam ah nasemkhawm thei in khangto mahmah uh hi.

Gam vai kipuakzia (political functioning)

USA gamvai pen gen in panleng thulianpi leh thusaupi a hihman in tampi ka gen zokeiding hi. USA gamsung nuntak zia tawh kisai gen nuam bek ka hihmanin law leh ethnic rules tawmkhat i kikum ding hi. USA gampen “ the land of the law” cih min dangzong kiphuah a, kal khat(one step) i suanzia na ngawn thukam ii phalna leh phal lohna tampi om hi.

A diak in minam tampi lom tenkhopna a hih manin minam tawh kisai kideidan na a omlohnading kidalna (protection) in discrimination law pen thupi mahmah hi. Minam tawhkisai kiko ki zahpihna kam malte i zat leh thukhen zum (court) ah ong ki khia (sue/claim) thei a, thulianpi (criminal case) dong tung thei hi. Mi pawlkhatin i kawlgam lungsim puapua lai in US gamsung ah mipih nam dangte zahkona kam-mal te zang thei hi. Tua te lau huai veve hi.

Ethical rules pen US gam ah thupi mahmah a, bang mun ah na i semzongin mite tawh ki zopziading, hopih ziading,i kampauziading te na ngawn thukham in ong hilh sitset hi. Midang khat tung ah a kilawm leh a kituak a na hopihkeh i nasepna pan in ethical conduction ong ki pia thei hi. Gentehna in, customer nasepna mun ah customer services panmun a sem mikhat in a customer te a nasepna thukhun zui lo in a kilawm a kituak a, a hopih keh a boss or employer te’n ethical conduction tuamtuam la in gawtmun pia thei uh hi.

Kumpi nasem khatin khuami(citizen or public) khat tung ah gamtat leh kampau kilawm hetlo a, a sep leh a nasepna kumpi department thunei te’n ethical conduction tuamtuam la in mawhpaih thei hi. Lawyer khat in zong a client khat peuhpeuh tung ah thumaan lohna leh a kilawmlo gamtatna,kampau na, leh sum laak nate a neih leh Attorney General ah ki khia thei a, tua pan in ethical conduction kila thei hi.

Gamvai (politics) kipuak nate ahzong gamtat kampau zia ding thukham om hi. Kumpi nasem te leh mipi (society) kikaal ah gamtat kampauzia ding thukham om hi. Mataw hawl i siam mahmah a, mawtaw tampi i neizongin USA gambup ah mawtaw a tainading speed limits om in ut-ut na ah tai nop zahzah in kitai theilo hi. Traffic law in ong encik mahmah hi.

Gambup kipuakna vai ah gamvai leh biakna vai thuahkhawm lo uh hi. Ahangin, tuma kum tampi hunlai in biakna leh gamvai na helkhawn ngei uh a, a hizongin buaina leh deih kibatlohna tamlua a hihman un “ the separation of church and state” ci-in biakna leh gamvai pen nasepna khenkhia in, gamvai ah biakna vai tawh thuahkhawm lo uh a, tua hangin gamvai khantohna piangzaw a hihi. Gamvai leh biakna vai a thuahkhop lai un Congress sung ah nasemte’n a mau upna leh biakna tek ultungsak tek uh a hihman un White House leh kumpi zum tuamtuam ah Pasian thugen-na panin buai na om ngit-nget hi.

Congress man pawlkhat te’n a mau ii pawlpi siate’ thugen bek ngai nuam in, pawlkhat te’n a mau paster te’ nek khawm piakbek nenuam a hihmanun khat lehkhat kikaal ah buiana leh kilem lohna tam semsem in gamvai nasepna ah lemtaang theilo hi. Tua a hihmanin Thomas Jefferson hun takteh “ the separation of church and state” ong phuangkhia hi.

Gamsung kipuak na leh ki makaihna te ahzong kumpi lamte leh mipi lam te’n thukham om bangbang cihtakna tawh zui uh a hihman un gamsung khangto hi. Thamloin, gamvai kipuakzia ding tawh kisai mipil political philosopher te’n thu hoih tampi geel in gamsung kimakaihziading leh mipi te lungmuangtak a gamsung a omnading uh geel a hihman un minam kibanglo tampi ten na a hih hangin nuamtakin ki khuasa thei hi.

Athupi mahmah dangkhat ah, gambup leh state bup kikep ziading lamtawh kisai philosophy of law mipil te’n mipi te’ suahtaakna leh lungmuan nading thu kham hoih nono te geel-geel in tuate zatding kumpi tung thapia uh a, tua thukham leh thukhun te hangin minamkim pau namkim tampi in liangko kikim tak in nasemkhawm thei in,khan toh na piang toto a hihi.

Thukhupna:

Ka sangkahna khan sung debate leh discussion tepen bangcih leng US immigration issues tampi daltan theiding cih deihna mungtup a hihi. I deihna kibanglo in kiselna painghi; a hizongin ideihna khat i tun nopdan kibang lo a, a tung nuamciat aa kisel i hihman in a hunbeiteh ikiselna, a veng hilel in mimal kitotna a laak ding hilo hi. Tua ki kamselna tungpanin ka sia pa in thu hoihtampi nala in, a tawpna ah tua thute a kigawmteh opinion hoih tampi ong piangkhia in, ka tupna uh katung uh hi; tuaman in gualzawh na neek khawm kabawl uh hi.

A pualam mi tampi tetawh i kikholh ciangin, i kibatlohna te gen-gen lo zaw in om peuhleng mikhempeuh tawh kithuah theina hizaw a, midangte tungpan in zong hamphatna leh thuhoih tampi i ngah thei hi. Ei thupi i kisak mahbangin midangte zong eizah bangin thupibawl dingthupi mahmah hi. Midangte thugen pen i deihnatawh a kituah keileh kam-mal hoih nono zangin zom keipeuh leng a mau in natel mahmah a, ong genbeh nawnlo lel ding hi. Gamvai, kipawlna, leh pawlpi sung khat peuhpeuh ah thukhun te cihtakna tawh zui sit-set peuhleng buaina leh ki-tu-kalh nate omlo ding hi.

Makai ten thukhun a bawlding ciangun thu ngaihsut siam leh makaih dan a geelsiam te tawh kikum tanghtang in,thusaupi leh mipi leh makai te kikaal, mipi leh mipi te kikaal kipuakziading leh liangko kikim theinading thukhun geelsiam mahmah ding thupi mahmah a, tuabang hileh kipawlna tupna tungto ding a hihi. Gam khnagto te ah a kibanglo mi namkim pau namkim a om hangun, thukhun hoih nono leh gamtat kampau a kilawm te zatbelin nei uh a, khat leh khat kithusim in ki zahtaak uh a himan un a kalsuan nate uh ah khantohna tawh kizomden a hihi. Ei Zomi te’n zong USA te’ social leh political philosophy te et-teh leh zuihin neile hang khantohna tawh i kithuah khawm ding hi. Pa Go Lian Kap (Seattle, Washington State, U.S.A)