Refugee te Malaysia ah nasep theihna kapiazo kei ding uh hi

“Refugee te Malaysia ah nasep theihna kapiazo kei ding uh hi”

June 22 (Monday) ni-in UNHCR in Malaysia kumpi tungah gambeel/galtaai te nasep theihna ding huhna ngen uh hi. Tukum May 31 ni dong UN min ciaptehna ah mi 153,004 om in, Kawlgam panin 142,224 pha hi-in, tua lakah Chin State panin 49,340, Rohingya 46,581, Arakanese 12,298, Shan/Thai Yai 1,510 leh adang 7,538 hi uh hi. Tualo gam dang Sri Lanka pan 1,193, Somalia pan 1,072 leh Syria pan 938 pha uh hi.

Malaysia gam sungah nasep theihna Kumpi tungah a va ngetsak uh pen phalna ki ngahlo hi. Minister te genna ah Refugee te nasep theihna ding vai tawh kisai pen Immigration thukhun tawh ki tuaklo hi. Malaysia Immigration thukhun sungah laibu lo tawh Malaysia sung lut peuhmah khasum ki pialo ding ci hi.

Tua banah laibu neilo Refugee te nasem sak mawk le hang Refugee a kihanthawn hong suak ding a gamgi ah a taang lai mi tul tampite hong lut ziahziah ding uh hi ci hi. Tulaitak in Malaysia gambupah gamdangmi nasem pen 1.9 Million om a, Refugee te nasep khuan pia le hang hih adang gamdangmi 1.9 Million ten zong Refugee ciaptehna ngen hamtang ding uh hi.

Tua banah ih gamsunga refugee te pen hehpihhuai kisa mahmah a, ahita zongin nasep theihna pia le hang a dangdang hamphatna pilna sinna sangkah theih nading, damlohna lam cih bang atuamtuam zong ih piak loh hong ki phamawh ding hi. Tua ahih manin nasem saklo ding hihang ci uh hi. Source : www. themalaysianinsider.com

ZAM Thupuak