A Etteh Huai Christian Innkuan ~ Pau Do Lian

A Etteh Huai Christian Innkuan ~ Pau Do Lian

Laisiangtho sung etna: Pasian in Adam leh Eve abawl akipan in Laisiangtho sunga’ misiangtho, Abraham, Isaac, Jacob (Israel) te ih etciang innkuan athupitzia leh innkuan panmah in Pasian in ama min thangsak hiha kimu hi. Ahizongin Laisiangtho ihsim simciang mawhna, gimna, haksatna, leh adang buaina te innkuan (nupa-couple) kikalpan in hongpiang khia thu vive hi leuleu hi.

Eve pen numei masa, zimasa, numasa hi-a, ahizongin etteh huai gamtatzia (role model) omlo hi. Banghang hiamcih leh ama’ sepkhiatna hangin tuniciang mihing ten’ (mawhna) ihthuak hi (Piancil 1-3). Pasian thuhilh (singgah neklohding) theina pin’ Adam in, azithu mangzaw ahihman in a innkuan sungpan mah un’ Cain leh Abel hongkitualthah pah hi.

Sarah (Piancil 12:23) leh Abraham te innkuan ih etciang Pasian teltuam leh Pasian thumang innkuan te ahi uhi. Sarah min akhiatna, ‘Princess’ cihna hi a Abraham zong (Hebrew 11) upna lam ah a etteh takpen pa’ kici hi. Pian 12:1-3 ah Pasian in minam tampi nang sungpan in kapiangsak dinghi’ cihmah leh azi, Sarah thu mangzaw in anasem Hagar tawh suanleh khakneih ding thukim hi. Tua ahihman in Hagar sungpan’ Ishmael leh Sarah sungpan Isaac te hongkilem lo uha, tuni ciangdong Ishmael suan (Muslim) teleh Isaac suan (Israel+mikangte) kilemzo lo hi.

Rebecca (Piancil 24-28) leh Isaac tezong innkuan nuam leh thu-ummi te etteh dingzah dongin akitendan uh dik kisa mahmah hi. Ahangpen Isaac in azilakdan pen Pasian deihna leh minam ngeina tawhkizui ahih manin thupi mahmah hi. Isaac in Rebecca it in, Rebecca inzong apasal itmahmah a innkuan nuam tawh nungta le uh kilawm hi.

Abraham in Egypt ah apailai un’ azi, Sarah, pen ka sanggam nu hi ci a akhembang mahin Isaac inzong Rebecca amelhoih mawk ahihman in akhualzin navuah’ Rebecca kasanggam hicin’ zuaugen hi. Pasian in ta’ Esau leh Jacob, pia a’ Rebecca in Jacob itzaw in Isaac in Esau it hi. Ih theihsa mahbangin Rebecca in a itzawk Jacob in thupha apakiang pan ngahleh deihsak zaw ahihman in alawmpa tek’ Isaac anuta un Jacob tawh khembawl uh a, a u’ Esau thupha tangdingguk sak hi.

Jacob leh Rachel + Leah te innkuan pan enleuleu ni cileng Jacob in zipi nih leh anasem numei te zineu inla a, tapasal sawmlenih leh tanumei khat nei hi. Pasian in aman, Jacob panin Israel inkhelsak hi. Ahizongin a innkuan sungah kihazatna lianpi hongom in a uten’ Joseph thahding in vaihawm uh a, atawpna ah Midian sumbawl te zuak uh hi.

Pakhat pan’ apiang laiguizom hinapi in thahdingzah dongin kimudah cih pen innkuan nuam kici ngeil loding hi. Hih atunga Pasian mizatte tuni ciangdongin, Abraham Pasian, Isaac Pasian, Jacob Pasian ci’n Pasian sapna in ihzat mite ahi uh hi. A innkuansung paizia te uh ihet ciangin genzawhloh buaina leh haksatna om hi. Tua tetungpan in Pasian geelna thukpi eite tungah hongkilanghsak ahi hi.

Tulai Christian Innkuan sung etna

Billy Graham Innkuan: Billy Graham November 7, 1918 in Charlotte North Carolina ah suak hi. Evangelist, Mordecai Fowler Ham tungpan in piangthak hi.[1] Vantung gam namuh nop uhleh ka innsung hong en uncihzah dongin a innkuan sung ah anungta Pasian thutawh pantahzo hi. Tudong hongdampihlai (kum99) ahihman in thu-um mite adingin alungdam huai mahmahkhat ahi hi.

Graham khangli (Graham four generations) mukha bek hilo in avekun, Billy Graham, Franklin Graham (atapasal upen) Will Graham (Franklin Graham ta upen) leh Quinn (Will Graham ta) tengtawh khangli sitset Pasian maileh leitung thu-um mite mai ah a etteh innkuan nuam kimu thei hi. Ahizongin Billy Graham innkuan zong khuamial sung aphutkhak hunsung na omveve hi. Franklin Graham kum 48 aphakdong apa upna leh nasep langpan in tapa taimangpa tawhkibangzah in gamtatsiatna khempeuh azatloh omlo hi.

Ahizongin tun’ Pasian nasepna ah apatawh kumsawmval sem khawm in apa nungzuizo khat hongsuak hi. Billy Graham, Franklin Graham leh atapa Will Graham khang thum akizom in Pasian nasem uh hi. Gam 180 val mi million tampi telak ah crusade, seminar, leh thusin na neihpih in khamangthang tulsawm tampi manhi. Billy Graham in, “No subject is closer to my heart than the family” – ‘Na dang tesangin kalungsim sungah ka innkuan tebek om hi’ ci hi.

Tulai innkuan nuntak na alau huai ahihna zong hicibangin gen hi, “The moral foundation of our country is in danger of crumbling as families break up and parents neglect their responsibilities” ‘Ih gam (US) sung innkuan omzia kikhenkham mangdingin omkhin a lauhuai mahmah hi nule patenzong mawhpuakna lazo nawnlo’ ci hi.

Tulai Zomi Christian Innkuan

Zomite zogam pualam ah pemta in ihom masiah innkuan kim in zing leh nitak ankuang um’khawm liailiai in ihnungta hi. Damdam in khawhsa leh gamsung sumzon na hongkiam semsem takciang innkuan sungpan khangno te mundang leh gamdang ah sumzongin zinkhia phangphang hi. India, Malay, Thai leh nitum nagam (western) lam atungte bang thupha ngah kisa mahmah hi hang. Ih gamsung hoihloh lua ahihman in gamdang a sumzon theih pen thupha ngahna mah ahi hi.

Ei Zomi Christian te ih nule ihpa tetawh kikhen in khual gamla zin in ih omciang Pasian thusungah hongpan tah ih nule pate kiphawk mahmah hi. Kum sawt tozel in damdam in Pasian thutawh kigamla thei hihang. Ahizongin tuhun ciang media hoihmahmah in simtheih muhtheih zaktheih ding Pasian kammal le lahoih nono tampi ih omna peuhpan zong kingai thei hi.

Hici bangin gam nihna, gamthum na ihtunciang ih nule pate tawhbek hilo in ihzi/pasal le tate tawh kikhen in ih omciang innkuan sung nuntakzia hongkilam dang hiaihiai ta hi. Koikoi ah ih omzong in Pasian muangin amadeihna tawh anungta innkuan te ahihleh kiimleh pam in susia zotuan lo hi. Ahizongin nasep sumzon natawh ihhun tepia khin mawk ihih man in innkuan sung zile tate kikal ah ihtheih ngeiloh haksatna te honglut hi.

Zomi Christian Innkuan Etteh huai

2016 kum in ZCMF-USA conference ah kapai thei a, inntek (Tulsa) ten’ hotel ah hongtungsak uh in nuam mahmah hi. Tungbaih pian kahihman in khangno te in ka utna room khatah hongkoih uh hi. Keitawh room khat a omkhawm ding khangno khat hongtung a, tuapa pen Dr. JM Ngul Khan Pau tapa, Daniel ahi hi. Zannga sung bang tungkhawm kahih man un, lamdangsa leh etteh huai na ka mu hi.

Nitak lup hun madeuh sim minute 15 sung bang anule pate room ah vapai gige in nitaksim lupma in hunzang khawm ahih lam uh katel hi. Tuabek hilo in Zomi USA leh Europe lamte ah zong sia paupu ten’ nupa innkuan sung hong veina tawh Zomite innkuan tawh kisai in seminar neipih kawikawi uh a innkuan tampitakin zong kikhel lawh hi.

A etteh huaideuh khatlai ah’ amau nupa zinkhawm den uh ahih man in thupi kasa hi. Hihpen sumneih manleh khua muhnopman te hilo a, amau nupa panmahmah in hong sinsak thute uh lakkhia (exhibit) pah thei uh hi. Leitung pilna leh Laisiangtho bulhtuah in akip nuntakna, lawhcin na cihte khangno uham te adingin athugen te uh manpha mahmah hi.

Billy Graham in kum 60 val Pasian thugen na ah milawpsakna dingleh mite maipha ngahna dingin ciam nuihcihte khatvei zong gen ngeilo in himah leh kua mahin athugen cimtak theilo hi. Tua mahbangin Sia Paupu zong ciamnuih leh thudangte thuhilhna te-ah genin neilo a, anungta Pasian kammal mahtawh honggen ngiatngiatpen damdam in mite thupi sa zawta hi.

Ngeina kibanglo, kammal gamtat kibanglo lak ih Zomite ihtun ciang ngeina ihzuih khialh (cultural bias) tampi ihneih lamzong kithei lo hihang. Ih omna (context) tawh kituak in Pasian kammal bulphuha ihnuntak dingpen kithei napin’ kineizo lo hi. Tua ahihman in Laisiangtho sunga Pasian mizat Abraham pan ih etsuk ciangin zong innkuan ciatah haksatna, buaina leh mawhna tampi nei uh hi.

Tua akicinglo innkuan panmah in Pasian umteitei a’ akalsuan tetung panmah in Pasian in ama vangliatna honglangh sak hi. Akicing innkuan omkei mahleng anungta Pasian sungah ihom nakleh khialhna, mawhna, leh hoihloh napan ama hoihna hongmu sak veve ding hi ci in Laisiangtho tungtawh hitaleh tulai Pasian mizat te tungpan in tha akipia hi hang. Agelh= Dr. Pau D. Lian D.Min, (Ph.D. Student) ​[1] Lewis A. Drummond, The Evangelist: The Worldwide impact of Billy Graham (Nashville: Word Publishing, 2001), 2