A Etlawm Khe (Beautiful Feet) ~ Evan. Suangh Dal

A Etlawm Khe (Beautiful Feet) ~ Evan. Suangh Dal

Mawhmaina le Suahtakna – Mawhmaina pen Pasian’ kiang pan ih kisap hi deuh-in Suahtakna pen Satan’ sila hihna pan ahi hi. Hihte gel pen a nih-in Jesu’ ong tatkhiatna hang bekin a piangthei Kha thupha ahi hi.

Upna le Kisikna:

Mawhmaina le Suahtakna i ngah theih nadingin upna le kisikna kisam leuleu hi. Topa Pasian tungah kisik ding (Repentance toward God), Topa Jesu sungah um ding (Faith toward our Lord Jesus Christ (Sawltak 20:21). Pa Pasian tungah i kisikna Tapa Jesu i upna tawh lak ding.

Mawhna hong kiphawksak Topa Kha Siangtho:

I kisik theih nadingin mawhnei mi ihihna ki-up kul hi. Ei le ei kihonkhia thei lote, mawhna silate, mi hoih kuamah om lo ihihna, migi lote, galte ihih laitak Jesu bekin hong honkhia thei ahihna cih thute i up kul hi. Kisikna maan a pian theih nadingin mawhna kiphawk kul cih thu i up mahmah kul hi. Mawhna kiphawksakna pen Topa Kha Siangtho nasep hi leuleu hi. Paul thugente a um a sang thei dingin Topa Kha Siangtho in Lydia lungsim na hon sak hi, cih khawng (Sawltak 16:14).

Up ding thu kisam masa:

Tua hi-a kisikna sangin up ding thu kul masa zaw hi (Faith precedes repentance). Hih thute i up ciangin kisik thei pan hi. I kisik sawm gawp ziate in hong um thei sak hi loin Pasian’ mai-ah za ah za mimawh ka hi cih i ki-upna in kisik ding hong kul sak thei pan hi zaw hi. Kha Siangtho in mihing’ lungsim hei mawhna hong kiphawksak a cih bangin kiphawk theihna pen Kha letsong hi leuleu hi. I kiphawk takteh belh ding muanhuai kilunggulh pan hi. Tua ciangin Jesu bek up ding le muan ding a kulna maan takin na lungtangah hong tung ding hi.

Hilhna le zakna kisam: Tua ahih manin upna a pian theih nadingin Khrih thu zakna kisam leuleu-a, zak theih nadingin hilhna, genna, taangkona kisam leuleu hi (Rom. 10:17). Taangkona, hilhna, genna a pian theih nadingin sawlkhiatna kisam leuleu hi (Rom. 10:14).

A hilh dingin kuankhiat kul:

Mawhmaina le Suahtakna tawh kidim hih zah-a a lian mahmah Lungdamnathu hilh ding, gen ding le taangko dinga a kuankhiate khe bangzah-in etlawm hi lo hiam! (Isa. 52:7; Nahum 1:15; Rom. 10:15).

A kuankhiate khe etlawm mahmah, Adonairam Judson te, William Carey te, Cope topa te ii khe bangzah in etlawm ding! “How beautiful are the feet of those who preach the gospel of peace, Who bring glad tidings of good things!” A Etlawm Khe! Evan. Suangh Dal