A cihnopna kilamdang kammal “Kideidanna” le “Kilamdanna” thu

A cihnopna kilamdang kammal “Kideidanna” le “Kilamdanna” thu

Mangpau-in kilamdanna pen distinction na ci hi. Kideidanna pen discrimination na ci hi. Kideidanna pen mihingte bawltawm hi a, kilamdanna pen Pasian bawl ahi hi. Pasian ong seh kilamdannate pen kideidanna hi lo hi. A pasal lutangin nei lo ahih manin Pasian in Eve (numeite) pasalte’ zawhhawhna a thuak dingin na hamsiat hi. Hih hamsiat ma pekin numei pen pasal ukna nuai ah a om dingin Pasian in a seh khitsa ahihna thu a bul (OT) le a dawn (NT) Pasian’ kammal Thuciam Thak kizopna sung pan hong kilang khia hi. Singkung a gah in kithei a cih mah bangin a bul ii thu a dawn ah hong kithei hi.

Pasalte ukna nuai-ah omna pen hamsiat ngahna hi lo-in thupha ngahna ahi zaw dingin Pasian’ seh ahi hi. Tua ahih manin numeite pen pasalte ukna le lutanga neihna panin suahtakna kisam lo hi napi-in a kizawhthawhna pan’n bel suahtakna kisam hi. Zawhthawhna panin lapsangna a kulna le ukna nuai-ah lutang neih a kulna thute a kilamdanna ih theih kul hi. Tu-in hamsiatna hangin pasalte in zawhthawhna tawh numeite kideidan lua kha khin ahih manin tua laimun ah Pasian in numeite a lamdangin na bawl veve hi. Pasian in numeite lamsang hi. Ahi zongin hih numei lapsangna pen pasal’ ukna nuai le lutang a neihna pan pialkhiatna ahih loh ding cih thu a kigen nuam ih hi hi. Pasian in kuamah deidan lo-in, mihingte in ahih leh mi kideidan hi. Pasian’ ong seh numei le pasal panmun kilamdannate kideidanna hi ci-a ngaihsutna pen Pasian lehdona hi a, tua bang kideidanna lungsim neihna mun ah Pasian in a seh kilamdanna beisak tuan lo banah a deidan mite lungsim le ama’ seh thupiak a zuite kikal ah kilamdanna piang sak tawntung hi.

Pharaoh kumpi pa in ama mite le Israel te deidan hi. Moses le Aaron makaihna tawh Israel te a paikhiat dinguh phal lo-in deidanna tawh Egypt gamah sila-in a khawi theih tawntung nadingin hanciam hi. Paikhiatna a lian sagihna khawng pan’n na sim lecin Egypt gamah gimna a kitunsakna pen Pharaoh kumpi pa in Israel mite le ama’ mite a deidanna hang ahi hi. Ahi zongin tua gimna pen Israel te omna ah a tun lohna pen kilamdanna ahi hi. Pharaoh in mi deidan vial ahih manin Pasian in kilamdanna piang sak hi. Ih theih dingah, Pasian in a kilamdanga a piansak a seh thu pawlkhatte pen kideidanna hi ci-a ih ngaihsut khialh loh ding thupi hi. Tua banga ngaihsutna in hamsiatna hong ngahsak thei hi. Piancilna 11: 7na ah “Ahih hangin Egypt mite le Israel mite a kilamdangin Topa in bawl hi…” na ci hi. A deidan mite tawh a kilamdang dingin Topa in a tate bawl thei hi. Haleluiah!!!

Pasian pen kideidanna hi lo hi. Pasian pen kilamdanna ahi hi. Ih gennop thu a tomin zom kik pak rehang numei lamsang nuam lua feminism te in Pasian seh panmun ahi pasalte in lutang hihna tawh ukna thu a ngahna le numeite pen pumpi ahihna tawh a ki-ap ding ahihna thu a kihilh ciangin kideidanna thu sa uh hi. Pasian’ ong seh hih a kilamdang panmun (roles) te pen kideidanna a piangsak thu hi laizang lo hi. Kideidanna banga ngaihsutna pen “kilamdanna” le “kideidanna” thute ih theih tel loh hang ahi hi. Pasian in ahong piak tua numei le pasal kilamdanna pen Israel mite le Egypt mite kikal ah Pasian bawl kilamdanna tawh kibang lo hi. Egypt mite le Israel mite kikal ah kilamdanna pen kideidanna thu hangin a piang ahi hi. Ahi zongin numei le pasal kikal kilamdannate pen kideidanna hang hi lo hi.

Tu-in Feminism in numei le pasal kikal ah kilamdanna (distinction) om lo hi ci uh hi. Banghang hiam cih leh amaute in tua kilamdanna (distinction) pen kideidanna (discrimination) sa kha uh hih tuak hi. A sak kei uh leh zong a tel thei lo uh hi ding hi. Pasian’ ahong seh numei pasal panmun kilamdanna beimang sak sawmna pen kideidanna lungsim ih neih man na hi zaw hi. Tua bangin kideidanna lungsim neih luat mana kilamdanna nangawn bei tumsak mang sawmna pen Pasian seh thute nialna ahih manin, tua bang mite le Pasian seh banga pasal lutang hihna thu a zui mite kikal ah Pasian in a sawt lo-in kilamdanna piang sak veve ding hi.

Na zui nuam a, na zui nuam kei zongin Pasian ong seh numei le pasal kilamdanna panmunte pen bei ngei lo dinga, tua a bei ngei lo kilamdanna pen kideidanna hi ngei lo ding hi. Kideidanna (discrimination) le kilamdanna (distinction) thu tua ciang ih gen phot ding hi. Gentehna in, numei hihna le pasal lutang hihna thute pen kideidanna hi leh bel, tua bel a beimang zawh nading hanciam kul ding hi. Pasal lutang hi dinga, numei lutang hi thei lo hi cih Pasian seh thupiak pen kideidanna (discrimination) hi lo ahih manin, tua numei zuih ding le pasal’ zuih ding kilamdanna (distinction) thute a beimang ding thu hilhna pen Pasian kammal lehdona ahi hi.

Suang Dal