A 5 veina ZCLS B.M Meeting Report na

A 5 veina ZCLS B.M Meeting Report na

Dear Zomi Akuamapeuh,
THU MASA:-
ZCLS Myanmar in a (5) veina Board of Management Meeting pen March
13-15, 2015 sungteng Nanphalong Tuiphum Biakinn, Tamu ah thupi leh
lungkimhuai takin kinei thei hi. Tutunga pen Zolai Simbu i neih zawh
kum (100) cinna leh Matthew Lai Siangtho i neih zawh kum (100) cih
Lungdamkohna leh Apna hun thupi in zong a kineih ban ah ZCLS kiphuh
zawh kum 35 cinna zong a na hi gige hi.

ZCLS tawh a kipawl local pawlpi, Association leh Section sungpanin
tangmi Delegate sehtan kipai ciat a, sapna ngah mi 105 lak panin mi 77
kipha hi.

A gamla pen Yangon panin Revd Khoi Lam Thang (General Secretary, Bible
Society of Myanmar) hong kihel thei a, Lamka panin Sia Dal Sian Pau
(G/S ZOLLS) leh Revd Dr Sut Khan Thang a kipan mi 5 hong kihel thei uh
hi.

Innteek hong sem ahi, Nanphalong Baptist Church te in hicizaw leh cih
om lo zah dongin zing phatakpi-in hong do uh a, kitangtai mahmah ciat
ahi hi. ZCLS zum min tawh a pai teng Nursery sangah hong tungsak uh a,
tua lote a munmun, tui zatna a lem danin tungsak uh hi. Annei-tuidawn
pen ansai an dan vive, sameh vive tawh hong vaak uh a, pakan/plate
zong a standard nei pente mah na zang mawk uh a, etteh tak kisa mahmah
hi.

MEETING HUN LEH BIAKPIAK HUNBAWLNATE A TOM A ZAKSAKNA:-

A. MEETING HUNBAWLNA:-

March 14, 2015 (Saturday) ni, Am.8:00-5:00 PM sung hunbittakin kinei
a, kizo thei ngaingai sam ahi hi. Meeting hunah O.B teng a vekun hong
kihel thei uh hi. Revd Mang Suan Khup (President), Revd Go Za Nang
(Vice President), Revd Hau Khen Kham (Executive Secretary), Revd Kai
Za Cin (Asst.Secy), Upa Kam Za Kham (Tresurer) leh U Gin Khan Pau
(Joint Tresurer) te in Meeting hun hong makaih uh hi.

Literature Committee, Communication Committee leh Financial Committee
panin Report piakna kinei ciat a, datna leh dawnna tawh hun thupi
takin kizang thei hi. OB teng zong Meeting hunsung kimtakin hong kihel
thei ciat uh hi.

Thukhensatnate’ sungpanin a thupi diak leh mipite’ theih ding kilawm
kasak hih a nuai a bang ahi hi.

1. 2015 KHUADO PAWIPI & SEMINAR BAWL DAN DING ZAKSAKNA:

A beisa ZCLS E.C Meeting pan a kipuak to sa ahi, 2015 Khuado Pawipi,
Kalaymyo pen ZCLS & ZOLLS makaihna tawh Leipi BC Hall pi ah nasiatak a
bawl dingin ki thukim khin ta ahi hi. Amun pen innteekte tawh kithuzak
ding bek in sam lai a, lem dingin kilamen zaw hi.

(ZOLLS = Zomi Language & Literature Society, cihna hi a, a zumpi uh
pen Lamka CBA inntung ahi hi. Hih kipawlna ah Zomi, Paite, Gangte,
Vaiphei, Simte, Kuki leh a dangdang biakna tuamtuamte’ lailam
kipawlkhopna hi a, Sia Dal Sian Pau pen tulaitak thuzekpi ahi hi. Amah
zong tutung hong kihel thei a, hih Khuado Pawipi vai tawh kisai zong
ZCLS OB teng taw limtakin kikum uh hi).

A hun ding pen Kawlgam Kiteelpi na hangin a kipelhna a om kei a leh
Oct.25-27, 2015 dingin kigeel hi. Sun nih leh zan thum sung kibawl
dinga, sunsung thusinna, Seminar leh nitak thum sung Ngeina lam tawh
kisai, thugenna leh Concert cihte dingin kigeel hi.

SUM VEINA DING GEELNA:-

Sum vei ding geelna ah a tawm pen Ks.4,000,000-5,000,000/- (Lakh
40-50), dingin kigeel hi. Ih Zumpi panin Ks.10 lakh hong kihel ding uh
a, Lamka, ZOLLS panin zong Lakh 20 pawl bang hong kihel zawh ding uh
lunggulhna leh lametna om a, tua lo a kisam lai teng Mimal ahi a,
kipawlna tungtawn ahizongin Huhna-Panpih ngetnate lai tawh kiciantak
in hong paisak ding uh ahih manin tha i piaksak ciat ding thupi ding
hi, cih i theisak khol nuam hi.

(1) Nitak masa, zintun nitak pen Zongeina lamsang Lamlahna leh Khuado
Pawi vai genna hunin kizang ding:

(2) Nitak nihna pen Zomi Fashion Show & Model Show leh a kallak ah
Item tuamtuam pawlkhat leh hanthotna hunpi-in kizang ding, a kihel te
teelkhia a, pahtawina lici sim tek piak dingin kigeel hi.

(3) Nitak thumna pen Zomi Concert nasiatakin kibawl ding a, a kallak
ah item tuamtuam zong om thei lai kha ding hi. Nitaksim hanthotna hun
tomno tawh zong thuah ding geelna kinei hi.

Tua lo sun hun nih (ni nih) sung pen Seminar huni kizang ding a, mi
500 pawlbang pha leh cih lunggulhna om hi. An vaak ding. Thu-lu ding
pawlkhat kiguang pah hi. Thugenpi ding hih a nuai a bang teng kiguang
phot a, a lem lo a om a leh a hunzui a geel toh hi ding hi.

a) Revd Khoi Lam Thang (G.S, BSM) – Zolai tawh kisai lam teng.
b) Bishop Felix Lian Khen Thang – Zomi leh Kipumkhatna.
c) Prof.Nang Suan Kham (Hist. Ph.D) – Zomi leh Gam Ki-ukna.
d) ZOLLS lam pan mi khat-le-nih in zong hong nei ding geelna om hi.

2. Zolai Zuunna, kha nih sim a kihawm khia den pen tukum May kha a
kipanin kha sim a hawmkhiat dingin kikhentat hi. Laibu sung a hel ding
thu-le-la zong a beisa hunah Literature lamte’ bek i sep hi ta leh
tukum a kipan Communication Committee lam leh Agent tuamtuamte’
tungtawnin thu kipuak ding a, thu manpha tampi hong kibeh lap dingin
lametna om ahi hi. Thapiakna kawm tawh Zolai zuunna na la ciat ta un,
cih zong a ki zawn i hi hi.

3. Tutungin ZCLS ah Zomi Baptist Chrch, Tahan pawlpite member thak
khatin kisang, kikipsak ta hi. A lut ding a kilawm a kizom kha nai
lote zong hong kingai, hong kingaklah mahmah hi, cih zong kizasak hi.
Tua lo thu dangdangte a kul a leh a hunzui-in i kizak to zel ding a,
B.M sung a kihel kha akuamapeuh in zong behlap tuak a om leh hong zom
ciat le uh teh, ci hang.

A thudang khatah, ZCLS Website sum la het lo a, hong bawlsak ban ah a
kulna bang a hong nungzuitoh sak ahi, Sia Joseph Khaipi (SDA)
Ngennung-Malaysia te innkuan tungah lungdamna lianpi kiciamteh hi.
B. NITAK BIAKPIAK KIHOPNA & JUBILEE HUNBAWLNA:-

1. March 13, 2015 (Friday) zintun ni nitak masa hun ah, Revd Silas
Lang Khan Mung (Leipi BC) in Chairman sem a, Revd Hau Khen Kham
(Executive Secretary, ZCLS) in Vaimuakna leh mel kilahna hong nei hi.
Revd Dr Thawng Lian Thang (Principle of Emmaus Theological College) in
hanthotna hong nei hi.

2. March 14, 2015 (Saturday) nitak, Revd Hau Khen Kham (E.S, ZCLS) in
donghu sem a, Revd Job Nang Khaw Thang (Job Thawngno) in hanthotna pia
a, tha kingah mahmah hi.

3. March 15, 2015 (Sunday) sun hun pen Jubilee hun leh Topa’ Ankuang
zatna hun thupi diakin kinei hi. Revd Kai Za Cin (Asst.Secretaray) in
Chairman sem a, Revd Khoi Lam Thang (G.S, BSM) in hanthotna thupitak
hong nei a, mi masate phawkna leh Pasian’ hoihna tuamtuam tawh lungsim
hong phawng tek mahmah hi. Sia Khoi Thang pen Indonesia pan a tun zawh
a zing teh khu vingvengin hih pawipi hong deih to pah hi a, aman
Jubilee mualsuang nam nih te zong Yangon pan na bawlsakin hong puato
pah ahih manin lungdamna lianpi kiciamteh hi.

Hih hunpi sungah Leipi Baptsit Pastor Area panin Lapawl sakna hong nei
uh a, innteek NBC te in zong lapawl hong nei uh hi. Revd Hau Go Kham
(Emmanuel BC) in ih Tedim Labu neihna tangthu hong gen hi. Revd Mang
Suan Khup (President, ZCLS) in Labu kum 100 cin Jubilee Mualsuang
honna hong nei hi. Revd Cin Za Dal (NBC Pastor) innteek Siapa in,
Matthew Lai Siangtho kum 100 cin Jubilee Mualsuang honna hong nei hi.
Revd Khoi Lam Thang (G/S, BSM) in Lai Siangtho tangthu genna tomkim
cingtakin hong nei hi. Kawlgam mualtung minamte’ sungah LST a nei masa
lampan a thumna hihang a, i hamphatna lianpi khat ahi hi, cih zong
hong gen hi.

Hun-ap thungen, Upa Kam Zam Kham (Sumkem), Sumpi apna, U Gin Khan Pau
(sumkem huh), Ahuam thungen, Revd Dr Man Hau Cing cihbang teng ahi hi.
Revd En Khan Hau (KBC) in Topa’ Ankuang luina ah Siampi vaipuak hong
la hi.

Nitak Hunbawlna ah, Revd Lian Za Tuang (President, Tedim Section) om
Chairman hong sem a, Revd Dr Sut Khan Thang (CBA, Churachanpui) in
hanthotna hong nei hi. Amah pen Revd Lian Khen Pau in ama hun a hop, a
angkhak ahi hi. Innteek Sunday Shool a golpawl in “A hampha Pasian
Mite tawh kikholhna nuam” cih la leh a lim tawh hong lak uh a, muhnop
leh zaknop kisa thei mahmah hi. Photo pawlkhat zong hong khak ung, na
na etsak ciat un.

Monday ni innlam ciat kizuan ta a, Motor khat tawh a paite Yarzagyo
Dum en-in kibaang pak a, ettak sim mahmah, tampi na zo ta uh a, paitak
kasa tek mahmah uh hi.

Mai kum 2016 ZCLS B.M Meeting nading mun pen Laangzang khua, Heilei
Baptist Association (HBA) dingin kikipsak hi. Hih laite zanhal khat
pek a ka gelh khit hi a, photo lut hak lua ahih manin tuni’n hong
khahkhia pan thei pan ka suak hi.

Laisim mimal tungah Topa’ nopna a thakin hong tung hen la, Matthai Lai
Siangtho neih zawh kum 100 cinna leh Tedim Labu, Hymn (Pasian Phatna
Labu, Hymn) i neih zawh kum 100 cinna thupha hong tung ta hen! Amen.

Thupuak,

Peter Dai Suan Kham (a) Peter Khampu
Secretary, Communication Committee, ZCLS)
Kalaymyo