9/11 Ni phawkna ~ Pu Thangboi

9/11 Ni phawkna ~ Pu Thangboi

BBBC&S, Bangalore, India ah B.Th kum nihna ka kah laitak hi. Ka room sung vuah lupna dawl nih te 4 om ahih man in mi 8 ka om uh hi. Minam kim himai e. Atamzaw bel Naga te hi.

Tulai dan in mobile phone kinop zat nailo, social media om nailo, g-mail g-chat g-talk cihte pawl bel Internet Cafe te ah paizo leng om kiaukiau ta sam hi. Nai khat Rs. 30 bang ahih man in kipai zo mengmeng lo hi.

Room sung a om teng kipawl in News Paper 2 kala uh hi. Times of India leh Asian Age hi. Times of India pen thugil zawdeuh hi a, Asian Age pen a photo te peuh muhnop kisa hizaw pian hi. Ken bel Radio ka limngaih mahmah hun lai ahi hi. RFA, VOA, BBC, DVB cihte thupi kasak mahmah hun lai ahi hi.

Zapah

9/11 thupiang pen Radio pan in kaza pah hi. Tulai media te dan mah in uanggen mahmah uh ahih man in Leitung Galpi Thumna apiang pah ding bang liang hi. News Paper te hong tun ciang in a Photo tawh kimu thei pah ahih man in ka linglawng mahmah uh a, tua thu mah kikuppi in kanei uh hi.

India te’ manglai pen thuuk lua mahmah ahih man in News Paper sim ding teh dictionary khat tawi pah linlen kul hi. Zaknop lah zaknop in manglai zong kikhang tuam bilbel hi.

Zaknop Toto

9/11 tawh kisai thuthakte zaknop in lunglut huai thei mahmah hi. Vanleng hawlte’ tangthu khawng zong hong hel toto uh ahih man in news paper hong tun ding kal ki ngaklah mahmah hi.

Afghannistan Dong Ah

9/11 tawh kimei zom in Afghanistan a uk Taliban te supuk ding in US kumpi in hong khentat ta ahih man in lunglut huai semsem hi. Tua hunlai a US kumpi George W. Bush in “Are you with us or against us?” (ko tawh hong pangkhawm ding na vua kalang vuah pang ding?) acih kammal bang thupi kasa mahmah a, tulaitak kawlgam buaina vai ah tua dan kam apaute khawng kazak ciang bang in Mr. Bush kaphawk mahmah hi.

Northern Alliance

US in Taliban te asim ciang un direct in vakap hetlo uh a, amau tawh kilemlo Northern Alliance te hoihtak train in galvan pia uh a, Northern Alliance te tawh kapkhawm uh hi. Sawtlo in Afghanistan gambup lazo uh hi. Kum 20 khit teh Taliban te’n lakik veve uh a, tu’n Afghanistan gambup Taliban khut sung tungkik hi.

9/11 Lungtup

Binladen in WTC tower aphukna ahang tuamtuam akigen hang kei’ upna ah bel: Leitung sum bawlna (economy) alenkip US te’ thuneihna asusia nuam hipi pen in ka um hi. WTC sung a data teng susia zo leng lungtup tung ding cih ngaihsutna hi in ka um hi. (Tonzang a council zumpi akihal tum dan mah tawh angimna kibang in ka um hi).

Ahizong in:

WTC a data te digital tawh zong na kikem mawk ahih man in a innpi ih haltum hang digitalized data te kihal theilo ahih man in Biladen’ lungtup atangtung zolo hi in ka um hi. Ka upna adik kei leh lah ka thutheihna kisam lai hiding hi. 9/11 (nine eleven) phawkna hi ei. Lungdam, Mung Laan Thang (Yangon)