21st Pinlong Conference leh Mualtung Mite

21st Pinlong Conference leh Mualtung Mite
(21st Pinglong Conference and Hills People)
Tulai tak hih Conference in Kawlgam sunga mite hong phawng mahmah a, Mualtung mita dingin hih tawh kisai laigelh tamkhin mahmahta leh tawm kong behlap nuamlai hi. Hih mun ah Mualtung miteng cile hang zailua ahih manin adiak in Mangkangte hong uklai in Frontier Areas Administration ci-a hong ciapte uh ading ka gennuam diak hi.

1. Pinglong Conference cih min puasak napi un bang hangin Pinlong Conference masa lai a, thukimna(agreement) te kikup sawmlo mawk uh hiding hiam? Pinlong agreement teng sih saknop man a, hih 21st Pinlong Conference hong bawl uh a hizaw tam? ahih kei leh bang ngimna takpi tawh hih min hong vawh uh hiding hiam, cih mualtung mite a dingin ngaihsut tak mahmah hi.

2. Pinlong Conference masalai a, Makai pawlkhat in a thu kikupna uah Federal cih a khiatna nangawn theilo in Meeting kah in suaikai(signature) ngawm mawk uh hi. Mangkang kumpite in Zogam makaite tungah Kawlte tawh suahtakna lakkhop ding, ki pawlding a thukim takpi mah na hi uh hiam, ci-in ni 19/04/ 1947 kumin Myamyo ah limtak adot uhteh, thukim mah ung, ci-in nadawng uha, tua ahih leh mualtung mite Federal tawh ki uk ding maw, kawlte khutsung ah District khat hiding maw, ci-in ukpi te tungah limtak nadongh uh hi. Haka ukpi Mang Ling bangin Federal leh District aki lamdanna na theilo mawk hi. Theilo napi un, thukimna suai lah kaikhin zel mawk uh hi. Mipita dingin hici bang makaite pen lungkhamhuai mahmah mawk hi. Mangkang kumpite in zong, mualtung mite mailamding kawlte tawh kipawl le-uh khangto hetlo ding, cih hong muhsaklua khin uh ahih manun Kawlte tawh suahtakna lakkhop ding hong awi hetlo uha, a thukim takpi mah na hi uh hiam, ci-in mualtung mite hong itluat manun hong dongh phapha uh hileh kilawm hi. Tua bang hita leh Zomite paunak ah “ngalha paksa tumkiklo” acih bangin kawlte tawh a thukim nasa uh nakhel themthumlo uh hi. Kawl galkap makaite bang hi leh bel khelpah lelding un upmawh huai hi. Kawl galkapte hong ukdan in Mangkang kumpi te’n hong uk uh hi leh khel kik un, naci lel ding uha, ahi zongin amau tua hunlai pek in Human Rights na zahtak khin uh ahih manun amau thukimna ahih nak leh bangbangh ahi zongin hici koih maini, hong ci uh himai hi.

3. Pinlong Conference ah thukimna(agreement) I bawl bangin Kawl te’n hong zuih lohteh Mualtung mite’n I gam leh I minam kawlte khutsungah thukim tak-in a va-ap I suakkhong hi. Tu-in I ki peipei mawk hangin zusa thangawng mah I bang bek hi. Pawlkhatte thautawi in gamnuai ah kawl galkapte khutsung pan suahtakna ding cih paulap in na asep uh hang, kawl galkapte sangin a mipihte uh tamthat zaw uha, a mipihte uh pawlkhat in kawl galkapte sangin lauzaw mai uh hi. Kawlgalkapte doding acih uh pen tualgal bawl hong lehsuah uh hileh kilawm liang hi. Pinlong Conference masa a, thukimna in Mualtung mite sungah khantohna hong piak gen malak in ei le ei kikhen na, kithahna hong tun zaw hi.

4. Pinlong Conference lai a, thukimnate ki kumlo ding veve ahih leh bang hangin Pinlong Conference min hong zangh veve uh ahi tam? Conference neihna ding mun lah Pinlong khua mun hinawnlo a. A mindang ki zangh thielo ahi diam? Mualtung mite ading in nakpitak in ngaihsut huai hi.

5. Pinlong Conference a thukimna in Mualtung mite ei le ei ki ukna, khahsuah in I gam le I minam in zongh, manthanlam manawh bek hilo in a mangthangkhin dekta hong suahlawh hi. Tua ahih leh hih 21st Century Pinlong Conference in Mualtung mite a dingin banglam ah phattuamna aom zo takpi diam? I gam le I minam in phattuamna tawmcik beek a ngahzo diam, cina bangin genteh pakleng, thokang natna ngah, khuasik cina khat, zatui kician I neihpak kei leh natdawn(paracetamol) pialeng, a damsiangpah zawh loh hangin, tawmveisung nuamtuam sam hi. Tuasung in zatui dang zonbeh in piale-hang, hong damsiang zothei hi.

6. Pinglong Confernce masa March 1946 kum in Zomi sung pan ukpi Pu Pum Za Mang leh a lawmte na kihel a, anih veina February 1947 kum ciangin amah damlo ahih manin a matang dingin saizang ukpi Pu Thawng Za Khup na paisak hi. Tu-in 21st Century Pinlong Conference hong piankhiatna ahang, I et kik ciangin Pu. Chin Sian Thang leh a seppih ZNC/ ZCD makaite’ ngeimna, tupna pen Aungsan Sukyi tungah a pulak uhteh 21st Century Pinlong Conference hong piangkhia hi, ci-in Aungsan Sukyi na ngawnin nagen hi. Pinglong Conference thu I etki ciangin a masa leh a nihna a gahsuah zawhna dingin Zomite ma napang khaden ban ah, tulai tak a, kawlgam sungah a thang vanghvangh 21st Century Pinlong Conference hong piankhiat theihna dingin Zomite khuak mah Pasian in hong zangh zel hi leh kilawm hi.

7. Mangkangte khutsung pan suahtakna zanggam leh mualtung mite’n a ngahna dingun makai in Zomite na kihel ciatciat a, Kawlgalkapte khutsung pan kawlgambup a suaktak na dingin zong, makai in Zomite mah na kihel ciatciat hi. Mangkangte khut sung panin suahtakna ngahna ding leh kawl galkapte khutsung panin suahtakna ngahna dingin a milip a, a tam hetlo makai in Zomite aki helkhak det pen a lamdang mahmah Pasian zat hiding in upmawh huailiang hi. Zomite gam le minam vai a kipan minamdangte tawh nasep khopna ah gim le tawlteng siden in anek dingteh, pan munkhawng aki hawmteh hong ki nawlkhin zel ahih manin Lai Siangtho in gul bangin na pil un acih phawkhuai hi.

Tua hi-a, tutung 21st Pinlong Conference pen lamkhat pan enleng, Mualtung mite’n zong, bangciang gam le minam itna nei, bangciang khangtosakzo ding,a gam le a minam ua ding tupna ngimna neita uh hiam, cih Kawlte lam pan hong theihna, hong muhna khat uh hong suakzel ding hi. Tua ahih manin thukimna suaikaihna dingkhawng aom leh mawkkaihpah buatbuatlo a, limtak mi thugen ngai in, I telkei leh a telte donga, Mualtung mi makaiteng mahmah zong, limtak kimu a, ki thutuah ding thupi mahmahta hi. Ni khat niteh hih Conference pen Kawlgam tangthu hong suakkhading ahih manin mualtung mita dingin limtak mahmah ngaihsut huai a, biakna makaite leh thungen te’n zong thungetna ah phawkding in kilawm mawhlo hi.

Khaibawi