Dr. Chin Do Kham zahtakna leh Phawkna – 2018 Khuado

2018 Khuado – Dr. Chin Do Kham zahtakna leh Phawkna

US Gam sung a om Zomi khempeuh ading in kumsim October kha Kaal nihna Saturday ni pen Khuado Ni in ciapteh dingin Zomi Innkuan USA Kipawlna in kipsak hi. Tu 2018 kum Khuado ni pen tuni, October 13, 2018 ni tawh kituak a, US Gam sung a Zomi-te ten’na khua khempeuh ah Khua kido zihziah hi.

October kha 13 ni pen Zomi Innkuan USA Kipawlna Makaipi khat ahi Dr. Chin Do Kham in mual hong liapsan ni ahi hi. Tu ni, October 13, 2018 ni in Dr. Do Kham in mual ahong liapsan zawh kum (5) acinna ni hi a, US Gam sung a Zomi-te Khuado ni tawh kituak ahih manin Zomi Innkuan USA Kipawlna Makaipi khat ahihna tawh Dr. Do Kham kiphawk mahmah hi. Tua ahih manin, Zomi Innkuan USA Kipawlna Board of Directors pawlin, 2018 kum US Zomi-te Khuado ni in, Dr. Do Kham zahtakna athak in ka pia uhhi.

Zomi-te ngeina sung ah Khuado ni in mual ahong liapsansa it leh ngaih innkuanpih, meeltheih tanaute phawkna tawh daihawh in thupha kibawl hi. Tuamah bangin, kum (5) cinna tawh ahong kituak, 2018 kum US Gam Zomi-te Khuado ni in Zomi Innkuan USA Kipawlna, Board of Directors pawlin Dr. Do Kham ka itna uhleh ka ngaihna uh ka pulak uhhi.

Dr. Do Kham in Zomi Innkuan USA Kipawlna ah anuai a bangin President panmun Term (3), Vice President panmun Term (2) lenin Kipawlna leh Zomi-te hong makaih hi.

• 2006~2007: Vice President
• 2007~2008: President
• 2008~2009: President
• 2009~2011: President
• 2011~2013: Vice President

Dr. Do Kham aw, tu laitak in US Gam sung teng ah Khua a kido laitak hi a, nang hong siimlo na hih manin ka khasia mahmah uhhi. Ahi zongin ih biak Pasian in ama angsung ah atawlnga dingin hong samzo ahih manin, tawldam takin kote ading thu hong ngetsak ding hiteh cih thu ka thei uh a, tha ka la uhhi. Zomi-te nahong itna, Zomi-te ading in na pilna siamna, na thagui thatang, na neih leh lam tampi na piakkhiatnate leh na hun leh vai tampi nusia in Zomi-te vai navaannate manpha mahmah a, kimangngilhlo ding hi.

Leitung ah na dam sung a Zomi-te ading ma na panna khempeuh tungtawn in khantohna gahpha tampi agahkhit ban-ah, mailam hun ahzong Zomi-te sung ah ki-itna tawh kipumkhatna leh khantohna a om semsemna dingin thu ka ngen uhhi.

Board of Directors
Zomi Innkuan USA, Inc,

Tang’in;

• Pu Go Sawm Khup (Chairman)
• Pu Tual Khan Suan (Secretary)
• Pu Do Khan Khup (Executive Director)
• Zomi Innpi, Tulsa, Oklahoma, USA.
• October 13, 2018 (Saturday).