2008 Constitution Dan – 436 puah huaina thu

2008 Constitution Dan – 436 puah huaina thu

NLD Chairman Daw Aung San Suh Kyi leh 88 G Min Ko Naing makaiin Kawlgambup ah Dan-436 puahphat ding mipi tangkona bawl kawikawi uhi. Banghangin Dan – 436 puah huai ahiam cih Zomite in zong theihhuai hi. Dan-436 ah Kawlgam Danbupi 2008 puahnopna a’om leh Gambup Innpi MP 75% thukimna bek tawh kipuah kikheel thei ding hi cih thu ahi hi. MP 75% bek tawh kikheel thei ding hileh galkap 25% lungkim kei leh leitung bei dong kikheel ngeilo ding cihna hi- a, hih Dan-436 puahphat masakna om kei keh adangte zong kipuah thei ngeilo dinga, galkaplui party USDP leh galkap 25% in kawlgam ukcip dending cihna ahih manin NLD leh Democracy ki-ukna deihte in Dan-436 puahloh phamawh hi ci uhi.

Nipidaw ah June 10 ni Mangpi (Minister) khawmpi ah President U Thein Sein in Danbupi khat akibawl leh tawlkhat zatphot ding hoih a, tua hun sungin ahoih ahoihlohnate enin damdamin puah ding hoih hi. Leitungbup gam tuamtuamte emnleng Danbupi tawlkhat zangmasa uh a, hunla -in puah uhi ci-in Dan 436 apuahnoplohna thu gen hi. Galkap Manglianpen Sr. Gen. Min Aung Hlaing zong 2008 Danbupi kikheel kei leh galkap kuanglui dingin lutin 2015 President hiding hi cih akigen pen 2008 Danbupi puah ding aki gen ciangin galkap sungmah ah omsuak ding cih thu kiza leuleu hi.

NLD leh 88 G makaiite 2008 Danbupi puah ding akigen ciangin Kawlgam mipi in NLD leh 88 G nungzuiin 2008 Danbupi puah ding tangkona pawi ah mi tampi apai ciangin USDP kumpi in mipi lungsim khenna dingin Kawlbiakna leh Kawlminam Kemcing Ngeina Kawlgam innpi ah henlut uh a, Buddhist phunggyi – biakna Siate politics semsakin Kawlmi lahih leh Buddha hiding cih lungsim tawh mipi lungsim vatmai hi. Buddha biakna mipi atampen hinapi, Buddha pan biakna dang atai ding launa tawh biakna dangte ngaihsun hetlo-in amaubek kikhualna ahih manin Christian, Muslim, Hindu leh adangte Kawlgam ah lungmuamna om nawn lo hi cih kimu a, NLD, 88 G leh biakna kipawlna 100 val in deihlohna pulak hi. Biakna pansarin USDP kumpi in mipi lungsim akasak hi ci-in mipi in mu hi. Biakna dangte zong Politics ah kihel hun hi cih tangkona tawh kibang hi.

2008 Danbupi puahnopna pen Kawlgambup mipi atamzaw lungsim ah om hi cih atheih ciangun mipi lungsim lakna dingin Kawl biakna leh Minam Kemcing ngeina guang a, Buddha baikna atamzaw kumpi tungah alungsim uh hei uhi. Kawlgam tangthu ah gambup biakna Buddha hiding hi ci-in U Nu leh adangte in ahanciam hunhunin gambup buaina piang hi. Tun zong, Kawlbaikna leh Kawl minam Kemcing ngeina akip azat nini pen Kawlgam kitapkhap ni hiding hi. Kawlgam utlua, nuamsa a kibel hiloin Kawl leh Mikangte in mualtung mite akhennenna akhennensa hi-a, hi thei hileh amau minam ciat tawh kigawm nuam ding uhi.

Kawllte inzong amau minam lehbiakna akepnop bangin minam dangte leh biakna dangte zong amau mah bangin aminam abiakna uh kem nuam zawkanlai dinga, aminamte uh tawh pumkhat suah ding kal angaklah tampi om hi. Hih thu thei hileh Minam leh Biakna Kemcing upadi bawllo dinga, mipi deihna tawh dan-436, Dan -59(S) leh adangte puahzaw ding uhi. Shan icihte Siammite hi. Kachinte Yunan ah alang om hi. Nagate in

Nagaland nei uhi. Zomite Manipur leh Mizoram ah atamzaw om hi. Karente Thaigam ah tampi om hi. Kawlminam leh Kawlbiakna Kemcing ngeina in Kawlgam hong khenkham dinga, Dan – 436 apuah kei leh Kawlgam mipi galkap khutnuai ah omdet acimtakte hangin gambuaina manawh ding hi cih mipi lauthawng hi. Zomi Times