Zu leh Zomi

Zu leh Zomi

*Zangthei leng Zatui hinapi zangthei lo ihih manin Zomi te……..
*Zu lungveimaw, Zi lungvei maw, Nu le Pa sanggam te lung vei maw…. etc:

Nidang ipu ipten khawhsa nakham uh ahih manin Gaal aih, Sa iah , tuhkhopna te ah Zu, Zo Zu te na dawn uh hi. Amau dawnte zong limin tha zong omlel hi. Tuhun Zomite dawn pen akikham thei ding bek a kibawl ahih manin adawn masa sa galsim ding lopi innkuan sung, khuasung ah, naupang te lak ah kihang mahmah hi.
Zu Haang in banghiam?

Ann , niangtui tezong iduh ciang ici hongling hi. Za, Zakaang, Za vom te zong ici ling hi, ici honglingsak nakhempeuh Guihtheih khamtheih hileh nakhempeuh hiding hi. Ahizongin tuate khamleng gilohna tamlo hi.Zu Haang ahih leh ici hongsa in, ilungsim honglok in thukhualna, maizumna, ngaihsut theihnaahi te bei-in giitlohna hongtun ahang mahmah Zu haang hi. Za, Ann niangtui te ikhamciang kiduh beh nawnlo napi zu ahih leh hoihbek hun cih neilo a, bangmah iphawk nawnloh dong akidawnzo Zu ahi hi.
Zang theileng Zatui, zang theikei leng Gu tui:

I pu ipa te leh akhangto gam pawlkhat in Zu nazatsiam uh hi. Ahizongin amau zong azangzang te ateek dongmah adawn keileh cidam lote bangin damlo-in zawngkhaal uh hi. Dawn thei leng Zatui hinapi Zomi te Zu azang thei ki omnailo hi.Nidang Zu te tha omin zong limtakpi lel hi. Tuhun ah sum ngahna ding bek in kihuan ahih manin, khedap khah, cikhum hel cihbangin kihuan a, haikhat dawn a ahai pah zong tampi ki om hi. Tua ahih manin Zu dawn hilo-in Gu/hai tui dawn kisuak ta hi.

Abangci miten Zu dawn kipan uh hiam?

Limsa a Zu dawn sang’, adawn dawn cianga lungap milmel nopsa, limsa tamzaw khading hi.

1. Hun awng tamlua:-I Kawlgam khuahun hoihloh tawh kizui-in ikhangno te tansawm hong ong tale uh college kizom theilo/zom thei mahleh zong tuasang manleh bangsem ding cih omlo, sepding ommah lehzong khasum kikhomlo ahih manin kilawp lo mawkin seppak dinglah omlo… tuahun sungin itate zuphual natungta uh hi.

2. Lawmle gual hangtawh:-Khuasung lampi a hong pai deldel khat “kawpai ding….” cile cin “pamciang” hongcilel ding uh hi, apaina ding mun kician omlo, mawkvak cihna hi a , tuate alawmten Zu sai ah sam leh zui pah deldel in, nidang ciang amahleh amah tungthei ta hi. Lawmhoih kisam hi.

3. Lawmngaih buaina hangtawh 😛 awlkhat te alawmngaihte tawh deihbang theilo ahih manin Zu tawh kihehnem in atawpna ah duhsuak uh hi. Leitung ah deihbang honghih pakloh ciangzong Zu tungah tusak kei ni.

4. Innsung nuamsalo, lungkhamna tuamtuam hangtawh:-Innsung NulePa makaih siamlo te atate innsung nuamsa theilo a, anopsak na munding atut kho nading azon ciang Zu phualmah hongtung ta hi. NulePa te tate sepding zonsak leh ilungnopsak dingzong kisam hi.

Zukham mana Gilo maw, Giitloh nopman a Zu dawn;

Khangno akizang dawn muan pawlkhat lobuang miphin nuam, gilo nuam a Zu dawn tamlo kha ding hi. A Zukham khit cianga ahehna hongsuak kik paungamta/ leh Ahehsa a zudawn pawlkhat agilo omthei hi. Khasiatna pan zu tung kitu, zutung pan hehna so kik, hehna sokik napan lungkimlohna aki muthei a pulaak khia… mitam mahmah hi.
Zu lungvei maw, Zi lungvei maw, Nu le Pa Sanggamte’ lungvei;

Mi pawlkhat Zu adawn ciang agilo dinga kibawl omhi cih kalawm ten hong gen ngei hi, ahi zongin Zu dawncianga kitom thei khempeuh Zu lungvei nahilo thei a Zi lungvei, Nu le Pa lungvei nahi zaw thei hi. Napasal lungkim phalo a vak Zudawn sa a hongciah leh, aw neem tawh naho ngap keileh peel zaw-in. Nupi pawkhat te apasal Zukhamsa a hongtung sang amah lawhmawh zaw in kamkhauh tawh paupih masa, khut leng masa, khe zang masa ahih manin a so vilvel sa a hongtung a pasal pen kikeem zonawnlo in akhut akhe hongzang ta hi. Tuate pawlpen zu lungvei hilo a Zi lungvei hizaw hi. Mipawlkhat innkuan te leuleu atapa/asanggampa zu dawn pen zu adawbloh ni nangawn in pate nute leh tate kipawl in zu dawn pa simmawh den ahih manin azu dawnpa in zu akhamni khatin khelbawl semsem mehlimlo pia, ahih manin suahkikna , lungkim lohna honglak ta hi. Tuate pen Zulungvei hilo-in pa/ nu leh sanggam te lungvei hizaw hi. Ui hamham khat tawng se inla dawng gawng lecin hong ham semsem dinga, tawngse kenla ama ut bangin koih lecin hong khawl lel ding hi.

A Guallelh den Zu dawnte /Mihamsia zudawn te:

Innkuan sungah vankhat mang/sia leh hileh hita keileh Zu dawn pa mahin mawhsakna saatna velna ngah masa den hi. Lamdung avaak kingap tetek a kilaipen Zu nam/dawn pa mah gilbem tung masa zaw den hi.
Nakhat pepeuh ah Zu dawnte in lelhden, maipha ngahlo den hamtang zaw hi. Tua ahih manin mi kician, mimuan nasuah nop leh Zu tawh nakipelh nang hanciam in.

Zu’ Sila/Nasem

Ka kumtawm lai-in lawmte tawh farewell(sangkhak tutkhopna) ading ci-in sum kathalawh uh hi. Lei nasep ahih manin kaciah uhciang tawllua in Zu kadawn uh leh nikhat tawntung khua-ulsa luanga gimtak a kathalawh uh sumte hong kicing lo lai mawk hi. Kangaih sut kikkik ciang farewell a ding sumthalawh kihi lo-in, Zu adinga sum thalawh ZU-SILA kahih lamuh kaphawk san hi.Tua ahih manin nasemsem napi-in zu mah nadawn dawn aleh Zu si-la nahihlam kiphawk in. Mi nasem zong ollo hi, Zu sila suak lawmlawm laiding nahiam lawm.
Zudawnte khialhna inneh/ Ze-etna in zolden;

Zu ikhamciang maizumna, kikhualna, ngahisutna theihna te kikep theihnate bei-in nakhat pepeuh ah kikhial baih mahmah hi. Leitungah Pasian nasepna lamdang tam mahmah a, Satan nasepna zong thuneu tuanlo hi, Satan tawh kipawl mi honkhat in Zudawn te khemnop sa in, ahai sungah, za, sihza, haiza, lungsim manlohza leh zatui hoihlo tuamtuam nakhah sak thei uhin, tua zudawnpa in lah am milmel mawk ahih manin Satan nasep nasung tungpah hi. Tua ahih manin nidang ipu ipa te Zingsang athawh uhciang a tuikuanga tui haikhat bua phot/ tui adawn dingciang ahai sunga tui tawm bua phot / mi-in apiak leh apia pa ciamsak masa cihbangin nahih uh hi. Khut khialh khak khitciang ol nawnlo hi, Satan khutsung natun khitciang haksa ta hi, tua ahih manin Zu tawh kipelh lecin/ dawn kei lecin hih alauhai te sungpan nasuakta ding hi.tuahangin zu dawn theite Khialhna khat olno takin khial a, ze-etna in ngakden hi.

Zu dawn hangin hunmawk bei;

Zu i dawnciang nasep kician/ masuan kician kinei thei lo a, Zu mahtawh hun kibei zaw ahih manin ihun manpha mahmah te mawk bei den hi. Na tansawm onding/ na gamdang paiding/ na inn neih ding/ na zi hoih neih ding te pen Zutawh hun beisak in khekmawkmawk kei in.

Zu’ Sila pan paikhiat sawmin;

Amasa penin nang mahmah kideek nopna lungsim nei masa in, nakideek ciang hongpia nuam hong tulh nuam tamsemsem ding a nang le nang kideek nopna lungsim naneih keileh nial zolo ding hi teh. Zu mun tawh kinai na mun pelhin. zing sang tung mahin nagil kialsak ngei kei-in, na sepding / nacim loh nading nangle nang zongin…Gtna-TV en, nasem, kimawl etc… na khua ul aluangsak zo ding nate sem in. Nalawm hoihlo te tawh naki muhloh theih nading mun ah omin… akisap leh khualzinin nalung sim kikhel sakin…. Khangno ihih laitak isin nop tam hi, Zu idawn lehzong dawn kha mahni… ahizong khawlhun ineih kul hi. Mawtaw in khawl hun neikei leh kibung a, vangleeng in tuahhun neikei leng mangthang a mihing zong nakhat pepeuh khawl hun ineih keileh kisiatna manna piang hi.

Zu dawn Zu ngawlnuam te panpih in;

Zu dawnkhat kikhel ding nadeihleh na tottot sang thudam tawh genpih in a ut theih natawh zol bawl in. Rev.Go Za Nang in “Zu dawndawn lamdung vakvak tepen akhauh paiteng hi, amau khauhpaina napawlpi sung, na innkuan sung ah nazat theihleh napawlpi/innkuan khangto ding hi. “ (Ref: Feb’09 Thaangnuai, Crusade) naci hi. Tuamah bangin zu dawn a gilo nuam a om tei hang… dawn nuamlopi , ahoih lohna thei pipi , utlo pipi a zu’ sila asuak mitampi om hi. tuate pen kobawl elbawl se kenla panpih lecin mailam ah na innkuan hongvak, napawlpi sponsor(huhpa/makai) hongsuak dingte nahi thei hi. Na innkuan hongvak dingte, napawlpi makai, gammakai ding te akikhel nadingin panpih denin. zu dawnpa khat i siatna pen Nu le Pa sanggam laaizom te tungah mawhpuak om hi. Panpih nuamlo, koko lel el bawl, a na omleh tua Zu dawnpa lamngei hongtung takpi dinga, na panpih a ahoih lamtawh thu nahilh leh hongkikhel takpi dinga namuanbel nasuan bel hongsuak ding hi.

Tua ahih manin Zu dawn tezong Zu’ sila suakden sawmlo-in kideek sawmin, Nu le Pa Sanggam khuapih tuipih tenzong Zudawn hi mi gina lo hi ci pahpah lo-in panpih theihna te-ah panpih tek ni.

Daniel Mangpu (Laaizom)