ZTK-2 Taangkona No. 1

ZTK-2 Taangkona No. 1

1. Zogam khantoh nading nasem khempeuh in thudik thuman tak in asep ding uh ka lunggulh uhhi.

Zomi ulehnau,
Tulaitak aa Kawlgam aa khangno pilna nei khempeuh lunggulh nasep in aktui, aktak ngah nasep ahihi. Golhguuk tamna, apualam sum ngah tamna nasep ngahte hampha kisa mahmah aa, angahte zong kiphasak zophial uhhi.

Tuabang lian mah in, Kumpi in adiakdiak Zogam puahding ong hanciam ciang Zogam khua khempeuh mawtaw lampi tunding Kumpi budget kingah ziahziah cihding hi aa, lampi tun nailohnate ah 12ft lampi leh a tunna sa lampite 18ft in kikeek hi. Lampi sau na zui in sum kingah hi.

Lampi omsa 12ft pan 18ft lamkeek nading 1 mile ah Ks.6000000 rate tawh kisem aa, ahihhang Tedim Tonzang gam ah Ks.4000000 tawh hise dan ahihi. Township dangte tawh kibanglo in tawm zawdeuh aa, ahang akikan ciang ih makai Minister te’n khiam, cilbawl in a val Ks.2000000 tawh mundang ah lamzik cih paulam(zuik takpi) hihtuakhi. Ataktak hih pen alauhuai mahmah ciltatna hi aa kumpi inzong pakta tuan khollo dinghi. Kumpi in khuata khempeuh mawtaw lam zikding ngimna omsa hilel aa ei ciltat akullo ahihi. Tukum i ngah kei leh maikum teh ngahding hilelhi. Khiam ahihman in lamzik contract la te in picing in zik zolo cih paulam pah uhhi.

Tonzang gam thei kha keng, Tedim gam aa lampi kiziikte picing khat zong om tuaklohi. 12ft dingte ah mawtaw ta mialmial, 18 ft dingte atamzaw cinghetlo hi aa, athu akikan ciang akikal ah lamzikna ahilo, mimal ipsung ah tampi thaam tuakhi.

Hakha makaite tung honkhat thaam, mai et kul, Tedim makaite tung honkhat athaam khitciang lamzik nading kumpi piakzah tawh lam kizik nawnlo ahihman leh ulian teng thoihsa ahihman in a zikte’n zong picinglo a zik uhhang lauhuaina om nawnlo hihtuaklel hi.

I gam puahna ding angsung, ipsung tung mangkhin dan ahihi. Supna lian mahmah ahihi.

Tuahangin Zosuan Tuailai Khawmpi pan
Zogam khantoh nading nasem khempeuh in thudik thuman tak in a sep ding uh a kitaangko khia ahihi.

Thuman thutak aa gamtat sawmlohna, aktui aktak, golhguuk nasia mahmah dan ahihi.

Golhguukne aa khantawn a nuamsa khatzong mu nailo ihihman in, makai thuneite ong kidop mahmah kul dinghi. Ei leh ei a ki netum ding dinmun ihihi.

ZTK-2 aa Thusung khat in, “Nidang, namdangte hunlai sang Zomite makaih hunteh nektum ding suuk zaw laimawk ihihman in dah huai mahmahhi, ei leh ei a kinetum ding hilawmlawm zen hihang” ci-in kap dektak lianghi.

MPte, Pension ngaak kawm aa tu hithiat i kisak khaak leh i pension nangawn i tan ding lauhuai kasahi.

Adiakdiak lamzikpi te banghun banghun aa a zaina kiteh thei ahihman in, thuneih laitak kuama’n thu ong bawl ngamloh hang, nikhat teitei ciang thu ong kibawl leh baihlo zaw in ka umhi.

Hihtawh kisai Naypyidaw kah i MP lak ah a kin mahmah khat ombilbel aa mipite inzong panpih ding kisam dinghi. Adiakdiak akhuakhua aa Khangno kipawlnate in hausa upate leh gam makaite sepna hoihtak i sittel ding kisam kasahi. I khua lampi kumpi in nihvei ong ziksak hetlo dinghi.

Gampua pan zong hih lampi zik vai i khuaciat ah zasak aa pi-khau (measuring tape) tawh banteh huai kasahi.

Gtn. in18 ft lampi ahihleh 18ft a cing tai (mile) bangzah, acinglo bangzah ahunlap aa report ding kisam dinghi.

Gam leh minam netum nuamte a dau pai khin hetlo ahihlam phawk huai kasahi.

Khat veivei, Zeisu nei zek mah lehang huaihamna tawm zawdeuh sam hiam kacih hun omhi.

Azenzen in makai thunei te’n neeksim taaksim om kei acih uhleh na khua lampi uh piciang(ruler) tawh nateh pah un. A cinglopi cing ci aa lamzikte sum apiak uhleh nesim cihna hipahlelhi.

Hang Khan Lian
Block 646#13-115
Jalan Tenaga
Singapore 410646