Zongeina sahawmzia lahna – Sia Lang Khan Khai

Zongeina sahawmzia lahna – Sia Lang Khan Khai

Hih sahawmzia limlak pen kuate hawmzia hi a, bang sahawm hiam cih akigencian theihloh hangin Zomite in ganluang khat igawh nak leh, angah ding mi sehsa hi a, laikung laidal tawh ciapteh kullo phialin ngeina kician mahmah anei Zomite ihi hi.

Innsung bangkua ah kuate in bangsa ngah ding hiam cih pen ngaih leh ngaihloh tawh kisailoin pulepa hun lai pek panin ineih ahoih mahmah ngeina ahi hi.

Hibang ngeina hoih anei, leitung ah minam dang kuamah omlo a, Zomite bek ahi hi. Nopna Dahna zuhawm sahawmzia kibanglo a, angah ding a kilawmte bek kipia hi.  Ama ngahloh dingpi akipiakhate – Ko aa hih hi kei ciin kinolh kigen kik tangtang a, ngah ding kilawm angah khalote khasia zo mahmah hi.

Banghanga khasia hiam cih leh tua innsung bangkua ah ama mun kikhel ta ahi ve maw cihna hang ahi hi. Thupi isak mahmah, mangkangten sa agawh ciangin tanau beh leh phung tawh kisailoin amau itte asalimci pia a, asanggam hitaleh, akilempihlote aginalo ahihkei leh, bangmah pialo thei lel uhi.

I sanggam Chinte in ngeina kician zuhawm sahawm nei ginalo a, Kawlte in zong, zuhawm sahawm dan neilo hi.

Zomite zuhawm sahawm pen innkuan bangkua kipuakna akician ineihna hangin hehna thangpaihna leh khasiatna inei zongin zu leh sa atan ding bang kilawm kipia veve a, hih ngeina hoih hangin meltheih tanau kipai theiloin hong gawm den ngeina hoih mahmah ahih manin Zomi, adiakin ZBCM pawlpi mite in ingeina leh zuhawm sahawmzia kanin zang ciat ni.

Zomi biakna makai leh gam makai gina pipi in ingeina theiloin gamtat huai nawnlo hi.

Sia Lang Khan Khai
Zomi, Zogam, Zolai, Zongeina