ZONET Awards 2011 ngahte lungdam pihna

ZONET Awards 2011 ngahte lungdam pihna

Kum a beisim in ki pawlna tuamtuamte khempeuh in hun beisa teng pulak kikna a neih uh mah bangin Zomi International Network (ZONET) pu te’n amau vaihawm siamna leh member tengtawh ki lungtuak tak in kum 2011 ZONET sungah:

ZONET Person of the Year 2011
ZONET Writer of the Year 2011
ZONET Reporter of the Year 2011
cih bangin pahtawi huai mite mipite hong deihtel sak ZONET pute gelsiam kasa mahmah hi.

A masa in ZONET ah lai i suah khempeuh hunleh thatang pia in thuhoih ding deihna tawh ZONET puten a mau lemlawh ding peuhmah om lo na pi, a mipih Zomite a it luat man, a veiluat man bekbek uhtawh hong septoh uh pen PAHTAK HUAH MI taktak in ka mu hi. Hih bangin gam leh minam adingin a ki pia khiatte mi hampha mahmah khat in mu ing.

Pu Chin Sian Thang:

“ZONET Person of the Year 2011” nong ngah kong lungdam pih mahmah hi. Gam thu i gen nakleh amau min i helloh theihloh takpi mawk hi. A lim (photo) te ah i muh ciangin Zopuan mah silh tangtang in Minam vei tak mahin ka thei hi. Et tehtaak ettehcing ka sa takpi mah hi. Hih bangin ZONET Person of the Year 2011 a ngahpen ka deihbang gen siam ta kei mahleng kei mimal in ka lungdampih mahmah hi.

Dr.Hau Za Cin:

“ZONET Writer of the Year 2011” nong telcing kikkik pen kong lungdam pih mahmah hi. A diakdiak in Zomite ki pumkhatna dingleh makai hoih suahna ding, et teh pha suahna ding, mite tawh ki kholh theihna ding, na sep ngah ciang vaipuak dan ding, Zomite a neu a lian khangto lialia na ding cihbang thugil tampitak hong gelhto ziahziah a, mi hampha mahmah khat ban-ah a mipih te zong ih hampha mahmah hi. Kum 3 vilvel bang ZONET Writer of the Year hong ngah cihpen thuneu hilo hi. Tukum ciangciang amah bangin laigelh uk a tam hangin laigelh siam ki tam nailo ahi manin khangthak tampite adingin et tehtaak Dr.Cin i neih pen hampha ka ki sa mahmah hi.

Zomi Daily:

“ZONET Reporter of the Year 2011” nong telcing manin kong lungdampih mahmah hi. Nisim TV tawh leitung
thupiang ih muh hangin a thu taktak ki tello a, nisim News English tawh tampi a om hangin ei kamtawh ka telhetlo khawmkal panin ZomiDaily in Zomite News bek hilo leitung thu theih huai nisim a it a mipihte tungah Zolai ngiat tawh hong suahdente nisim mah in ka simden hi. Tua bek zong hilo Thului leh Thuthak khempeuh a ki suaksak te zomidaily.org ah koih pahpah hi. Kua mah dang hamphatna ding hilo a, Zomibup hamphat nang bekbek hizaw hi. Hun leh pilna a zangh bek hilo sum tampi beina hi a, thagui thatang tampi beina hi. Zomite adingin na lianpi asem taktak Zomi Daily hong hi tawntung ta in.

Zomite sungah a pahtaak huai mite phataakna piakding mah hi aa, a tha hatlo te domto in, a khang cinglo te khang liansak in, tawsawn theih ding mite tawsawn in, mite panpih theihna ding munte ah ki panpih in, ih vek pi in khangto khawm lialia dihni.

Lungdampihna lianpi tawh…,

Thawn Tuang
Zomi Angvaan
21 Jan.2.2012