Zomite Khantoh Nading Thubulpi ~ Tungg Thang

Zomite Khantoh Nading Thubulpi ~ Tungg Thang

Zomite mihing maan dinmun (civilization) i tun sawt nailo ahih manin midangte tawh kiteh lehang khantohna pen a manlang mawhlo khat hi cih kimu thei hi. I hamphatna ah Pasian thu tawh kikhangto pah ihih manin tua in tampi tak in hong mazangsak hi. Zomite i khantoh nading in a kisam thu tampi om kha ding hi, tu in a thu bulpi zaw deuh teng a en pak ding ihihi.

Tu hun ciangin mi pawlkhat genna ah Zomi sungpen Laimi dan bang zolo hi hang ci in kigen pha mahmah hi. A maan zong himai hi. Pawl khat in Laimite phazo nawn kei ni ci liang uhhi. Hih tawh kisai in kei’ muhna ah Zomite khantohna ding hong khaktan thute leh khantoh nading hong panpih thute limtak ngaihsun in kalsuan lehang khantohna pen hong nasia mahmah ding hi cih ka um hi. Mi pawl khat in thei napi in a zangh nailo ihih manin i khantoh zah dingin a khangto lo a kisuak ahihi. Tua hi in khantoh nading in bang teng pelh ding cih a thupi mahmah khat ahihi.

Khantoh nading hong khaktan thuthum

• 1. Kilang bawlna
• 2. Namneu lungsim
• 3. Kikhuallohna

1. Kilangbawlna

Hih kilangbawlna cih i neih laiteng khantohna om thei lo ding hi. Hih pen langpan nopna lungsim hi in, kei bek khangto, hau, pil lengh cih ngaihsutna pan hong piang khia ahihi. Mi dangte zawng, hai lel leh cih lungsim puak hoihlo panin hong kipan khia ahihi. Mi khat in huhna hong ngen leh zong bangmah nei keng, hong huhzo nai kei ning cih tepawl pen limtak ngaihsun lehang, hong huhzo ding a i upte kiang bekah huhna a kingen ahih manin kipanpih noplohna hang ahihi.

Mi pawl khat in hih dan pen kam siam in zangh thei uh hi. Tua banah mi khat ii ma khak tan sak leng cih lungsim nei zong pawl khat ki-om lai hi. Midang (Zomi) khat i huh loh manin amah zong khangto lo ei zong kikhangto tuanlo hi. Midang khat ii ma i khaktan manin ei ma zong kikhak ahih manin supna nam nih a om hipah hi.

Mi khat ii ma na khaktansak leh nang leh nang’ ma zong a kikhak na hihi. Mi khat ii ma na honsak leh na ma ahong hipah hiteh.

Tua bek thamlo in, mi pawl khat in midangte koici nawngkaisak thei ding ka hiam ci in thusia bekbek a zong pawl khat om hi. Tua bangte hangin khantoh ding cih thadah kiam lam a kimanawh zaw ahihi.

2. Namneu Lungsim

Namneu lungsim cih ciang in i beh i phung, i khua i tuibek a en den te cihnopna ahihi. Mi khat thu kigen leh ka beh te lah hikei, thei ngei keng cih dan khat in midang bawl thei den pawl khat om hi. Zomi cih dinmun ah i din masiah in namneu lungsim in hong uk ahihi. Beh leh phung thupit sak luat manin i mittawtna tampi tak omhi. Beh leh phung thupisak loding cilo hihang, lenkip bekbak loding cih nopna ahihi.

Tua banah amah pen Saizang mi, Zote mi, Khuano mi, Teizang mi, Sihzang mi, etc. hilel e, cih bang dan tepawl zong a zangh kiukiu ki-om lai hi. Kei’ mipih hi kei, kei tawh kisai keng cih bang khat in kingaihsun kha thei hi. Hih namneu lungsim tung bekah dinglo in, hih pen i bulpi hisak ding hang a tua tungah nampi lungsim lam to ding hihang. Tua hileh nampi lungsim puakzia zong hong kipin hong kho ding hi.

3. Kikhuallohna

Zomite pawl khat pen kikhualna omlo in gamtat kampau kidawm khollo uhhi. Mailam ah bang hong piang ding cih ngaihsut in nei masa lo in tulaitak dinmun bek ah a ding pawl khat ki-om lai hi. Leitung pen kikhel mahmah ahih bangin a beisa a mihaute zong hau paisuak lothei, mipil te zong pil paisuaklo thei hi.

A dang khat in gen lehang a beisa a, a zawngte peuh hong hau thei, hong pil thei cih bang in thu hong kihei thei mawk hi. Thu dang khat in gen ni cileng vision neilo cih ding zong himai hi. Makai pawl khat in vision a neih loh manin kuamah pantah lo uhhi. Vision nei hileh mi pattah ding ngaihsun ding uhhi.

Khantoh nading hong panpih thuthum:

• 1. Kihuhna
• 2. Nampi Lungsim
• 3. Vision

1. Kihuhna (Deihsakna)

Lai Siangtho in na huhzawh ding mi khat ahih leh huh in, ci hi. Kihuh, kipanpihna pen a thupi mahmah khat ahihi. Mi pawl khat in nei napi in huhna a pia nuamlo om hi, pawl khat leuleu in neilo napi in leitawi liangmah in huhna apia zong ki-om zel hi. Midang khat huhna i cih pen Pasian thu luanzia tawh a kituak mahmah khat ahihi.

Midang a huhte in huhna mah ngah kik ding hi ci-in Lai Siangtho in gen hi. Tua ahih manin midang i huh a leh ei leh ei zong a kihuhhuh mah i hih lam phawk huai hi. I phawk ding thu ah midangte ihuhna pen Pasian in ciamteh gige in mawkna suak ngei peuhmahlo hi.

Midang na huh nop keileh nang leh nang zong a kihuh nuamlo hipahteh. Amah leh a mah a kihuh nuamlo mi zong Pasian in huh theilo hi cih phawk ciat ni. Midangte’ adingin deihsakna a nei mi in khangto den ding hi.

2. Nampi Lungsim

Nampi lungsim i cih ciangin Minam Lian lungpuak, picing cih nopna hi. Beh leh phung thu tawh buai bek nawnlo, minam neu thu tawh buai nawnlo in Zomi a din khop ding lungpuak i gennopna ahihi. Tua hi in Zomi beh zong pan khia lehang ahoih ding thu khat ahihi. Tua hileh i ki-itna, kikhualna te hong lian mahmah ding hi. Tua hi in Zomi khat pen ka mipih hiveh e ci-a don nopna lungsim puak neih ding lung lunggulhna ahihi. A hau, azawng, a pil, ahai, asiam, ahoih deidan lo in Zomi khat ahih nakleh muakna lungsim neih ding i gennopna ahihi.

3. Vision

Vision i gen ciangin pawlkhat in telhak zong sa thei hi. A tawmpen in mailam ading ngimna, gelna kum khat kum nih sung neih theih ding a thupi ahihi. Tua pen vision khat hipah lel hi. Gentehna khat ah, Teklui khua 1918 kum in kisat a, tua laitak in vision nei khat in nidang ciangin mawtaw hong tung leh lampi mun ding zaisak ni ci hi; vision neilo khat in Teklui khua ah mawtaw a tuntaak leh va-ak kang vak cihsan hi. Tua hi in 1970s pawl a kipan in mawtaw tung takpi hi.

Hih vision i cih zong Pasian in i theih loh kal a hong guat na hi gige hi. Mikim in vision neilo hi. Vision neite mah khangto hi. Tua bang mite in Thu hoih, thupha anuntakna ah mu toto uh hi. A kisel cip thusimte nangawn Topa in a um a muang mite tungah a pholak khia ahihi.

Thu khupna

Zomite thu pen Pasian tawh a kizom den ahihi. Tua hi in Lai Siangtho sungah Jeremiah tungah Pasian in a genna ah bot (bawh khiat) ding leh phut (lam) dingin na gen hi. Tu ni in zong ei Zomite in i khantohna dingin bangte botkhia ding, pelh dinga, bangteng phut ding, lamding i hihiam? A tunga igen teng pen kipanin sin pah lehang khantohna hong kilamdang pah dingin ka um mahmah hi.

Khantoh nading hong khak tan hih i gen teng bek hilo in a dang zong tampi omlai hi. Tua mah bangin khantoh nading hong huh thute zong hih teng bek hilo in a dang tampi mah omlai hi. Hih teng pen i kilam thak na ding a, a bulpi i cih nopna ahihi. Suang tung a inn lam bang a i gennopna ahihi.

Apoi mahmah thu in bang a hiam cih leh Zomite in thu hoih leh thu maan thei napi in nuntak pih sawmlo ihih manin hih in hong nawngkaisak mahmah hi. Tua hi in i nuntakpih sawm ni a kipan in i khantohna kimu to pah ding hi. Tua hileh ki-itna zong hong khangin, kipumkhatna hong omto pah ding hi. Topa’ thupha, Tungg Thang (UB Fellow, Silliman University, Dumaguete City, Philippines)