Zomite’ hamphatna bulpi ~ Luan Dep Kim

Zomite’ hamphatna bulpi ~ Luan Dep Kim

1. Leitungah minam tampi om a, tuate sungah ei Zomite zong minam kician mahmah khat ihi hi. Minam khempeuh, mi khempeuh in amau nam ciat-in Pasian a tuamtuam nei ciat uh a, ahi zongin ei Zomite in ihih leh Pasian khat bek i nei hi. Zomite sungah Pasian dang a tuamtuamte apom, a sang om tuan lo-in i vekpi-in a nungta Pasian khat bek i neih pen i hamphatna bulpi ahi hi.

2. Minam tuamtuamte in a kibawltawm sing leh suang Pasiante hita leh, ni, kha, aksite a kipan nuntakna a nei lo nate bia-in, pahtawi-in tua a biak a Pasiante uh tawh lungkim mahmah uh hi. Ahi zongin ei Zomite in tua minam tuamtuamte’ Pasiante pompih, sanpih, buaipih se lo-in, eite a hong bawlpa, van leh lei na khempeuh a piangsakpa, a nungta i Pasian bia-in, pahtawi -in ama thu sungah kiptak leh lung muang takin om hithiat-in i nuntakna pen i minam buppi ‘ hamphatna lianpi ahi hi.

3. Tua bannah tang lai hun bang hi nawn loin tu hun ciangin ahih leh Zomite i neu tung mah pan kipanin i pu i pate in Pasian’thu tawh hong pantah-in, Pasian thu tawh a kipattahte, a khang khawmte ihihna zong i hamphatna lianpi khat ahi hi.

4. Hih a nungta Pasian pen leitung, vantung leh na khempeuhte’pianna Pasian hi napi -in leitung mi tampitakte in thei lo, sang lo, bia lo uh a, nuntakna a nei lo Pasiante bia zawsop uh hi. Ahih hangin ei Zomite in ihih leh a nungta Pasian pen ei guak bek’ Pasian bang zah dongin nei-in ihihna khempeuhah Pasian min mah i lo tangtang hi.

Min i phuah ciangin zong Pasian mah bulphuhin i phuak ciat a, pawlkhatte bang in Pasian cih kammal sung pan ( Sian ) la-in i minte sung nangawn-ah zong i koih hi. Hih bangin Pasian tawh a kiguizuih, Pasian min tawh a ki lo Zomite ihihna zong i hamphatna lianpi ahi hi.

5. Pasian zia pen kei hong pahtawite ka pahtawi ding a, kei hong simmawhte ka simmawh ding hi, cih hi a, tua tawh kizui-in eite hong pahtawi, hong lamsang, hong domsang theipa Pasian pen eite’ Pasian ahih manin mi hampha pente ihi hi. Tua ahih manin i Pasian bek mah i pahtawi den ding hi. Tua mah bangin tu ciang dong amah bek mah phat, pahtawi-in ama thu sungah kiptakin omin ama kiang pan i pial khak lohna dingin bit takin hong kem i Pasian tungah lungdam i ko hi. Eite’ biak Pasian in a tawntungin thupha ngah ta hen!

6. Tu hun-in ahih leh i kim i pam i et ciang mi dangte in amau Pasiante uh nakpi takin pahtawi-in mun khempeuhah hong kizeihthangsak semsem ta uh hi.Tua ahih manin eite zong i omna peuhpeuhah pilvang takin i om ding hong thupi mahmah ta hi.Eite pen vantung gam mite, Pasian’mite ihi a, leitungah tawm vei a khualzin pakte ihih manin Pasian dangte lamah i lungsim a hoi khak lohna ding leh tuate in eite hong zawhzawh lohna dingin leitung mite’gamtatnate i eng kei ding a, amau’ Pasiante’ min zong ngaihsutin nei loin amaute’ gamtatnate zui loin amaute’ gamtat bangin zong i gamta het kei ding hi.

I nuntakna sungah Pasian’ deihna bangin nungta-in i gamtat theihna ding leh ama thu sungah zung thuk khakin kip takin i om theihna dingin lampi man a hong lak Pasian kammal Lai Siangtho i neih mahmah zong gen zawh loh i hamphatna lianpi ahi hi. Tua ahih manin i upna panin puk lo, hoi lo, kip takin i om tawntung theihna dingin i upna pen Pasian kammal Lai Siangtho tawh nisimin khenkipin Pasian tungah citak takin nungta ni.

7. Tua ahih manin ei Zomite in i Pasian tungah citak takin i nuntak ngeisa mah bangin kip takin i om paisuak nak leh i kim i pam ah bangbang haksatna, lauhuai-na, buaina a tuamtuamte hong piang zongin tuate in eite hong nawk zo lo ding a, i minam, i gam, i lei adingin i tup, i sawm, i ngaihsutna, i sun mang, i zan mangte leh i vaihawmnate khempeuhah Pasian in a tawntungin hong panpih den ding a, ma tutna leh gual zawhna lianpite i ngah toto ding hi. Tua ahih manin hizahta-in a thupi a manpha mahmah i hamphatna lianpite i khahsuah khak lohna dingin thumanna leh cihtakna tawh i Pasian adingin i nuntak ding ahi hi. Eite’ biak i Pasian min in a tawntungin thupha ngah ta hen! Amen. Laigelh: Luan Dep Kim @ Kimboih Boih